Hindi na dinetalye ni Gabby Eigenmann, 46, ang scenario nang matuklasan ang katawan ni Jaclyn Jose, 60, sa tahanan nito sa Marikina noong Marso 3, 2024, Linggo ng hapon.
Read: Gabby Eigenmann opens up about special bond with late stepmom Jaclyn Jose
The day before, Marso 2, Sabado ng umaga, binawian ng buhay ang iconic actress, na ang tunay na pangalan ay Mary Jane Guck.
Nataong kaarawan ni Gabby noong araw na iyon ng Sabado.
Nasa Siargao, Surigao del Norte noon ang daughter ni Jaclyn na si Andi Eigenmann, kasama si Philmar Alipayo at dalawang anak.
Ang anak na lalaki ni Jaclyn na si Gwen Garimond Ilagan Guck ay nasa U.S. naman kung saan ito nag-aaral.
"When Andi called me, she was crying," matamang lahad ni Gabby noong Marso 7, Huwebes ng gabi, sa Arlington Memorial Chapel sa Araneta Ave., Quezon City.
"So, yeah, the rest was history.
"I went straight to their house. Yeah, that’s how it went about. That’s how everything happened."
Si Gabby ang isa sa mga umaalay kay Andi, 33, mula umpisa.
"Sabi ko kay Andi, since she was in Siargao, sabi ko, 'Mag-ano ka muna diyan. Book a flight, earliest flight, or whatever.
"'Pero huwag mo munang problemahin, huwag mo munang isipin.'"
Pinayuhan daw niya si Andi na kumalma
Lahad pa ni Gabby. "I mean, 'I'm sure every will probably call, start to call you, to ask questions kung anong nangyari talaga.
"That’s why, natutuwa ako, kasi si Philmar, he’s also there to help Andi cope up with ano, habang hindi pa siya bumibiyahe."
Magkapatid sa ama sina Andi at Gabby. Ang kanilang ama ay si Mark Gil, Ralph Eigenmann sa totoong buhay.
Anim ang mga anak ni Mark sa apat na babae. Dalawa kay Irene Celebre, sina Gabby at Ira Eigenmann; dalawa rin kay Bing Pimentel, sina Max Eigenmann at Sid Lucero; isa kay Jaclyn, si Andi; at isa rin kay Maricar Jacinto, si Stevie Eigenmann.
Malapit si Gabby sa mag-inang Andi at Jaclyn.
Dahil pumanaw si Mark noong Setyembre 2014, si Gabby na ang tumatayong "ama" sa kanilang blended family.
Si Gabby ang isa sa mga unang nagtungo sa bahay ni Jaclyn nang matagpuang walang buhay ang aktres.
Salaysay pa ni Gabby: "So, when I was getting all these information, nung nandun na ako sa house ni Tita Jane, ako mismo, hindi ako nakakapag-update.
"Kasi, I was processing also on how to tell everything. It’s good my wife was there also, siya yung nagre-relay, 'O, ganito na ang nangyari. May mga pulis na, may forensic team na, na pumasok.'
"Yun lang ang naaano, until unti-unti na, we’re gathering everyone’s emotion. Hanggang sa nakausap ko na si Andi.
"Yeah, and the next morning, I picked her up. We went straight here."
Ang tinukoy ni Gabby na "here" ay ang memorial chapel.
May pahiwatig o premonition ba si Jaclyn kay Gabby?
Napabuntong-hininga si Gabby, "I wouldn’t say premonition, pero yun nga, every birthday, isa sa mga inaabangan kong bumati. Kasi, consistent, e. Consistent si Tita Jane, e.
"Pero it wasn’t na parang, 'Bakit hindi ako binati?' Hindi yung dinamdam ko pa na bakit hindi bumati? Or nagkarun ako ng ano.
"Probably busy, e. She loves working. Mahilig mag-taping talaga, e.
"So yun lang ang iniisip ko, na baka busy."
Grabe ang bond nila—ang araw ng kapanganakan ni Gabby ay araw rin ng kamatayan ni Jaclyn.
"I don’t wanna think it that way na nga. Siyempre, happy birthday nga," napapangiting sabi ni Gabby, na may bahid ng pait.
Talagang hindi niya makakalimutan si Jaclyn.
Napatango si Gabby, "Oo naman, oo naman. I don’t want to look at it as a tragedy.
"Celebrating your birthday, tapos may susunod ka pang ise-celebrate na o maiisip na… her death, di ba?"
READ: Andi Eigenmann moved to tears by Coco Martin's eulogy for Jaclyn Jose
THE LAST TIME GABBY EIGENMANN'S WIFE SAW JACLYN JOSE
Kailan sila huling nagkita ni Jaclyn?
"Actually, may opportunity kami na magkita one time sa Ikea," pagbabalik-tanaw ni Gabby.
"Actually, wife ko ang nakita niya. Pero hindi ko ma-recall kung kailan kami last na nagkita, pero we’ve been texting each other lalo na pag Christmas, New Year.
"So eto lang, latter part siguro, mga January ata yun o February, nagkita sila ng wife ko sa Ikea.
"I was probably at the parking nun. Sinusundo ko na yung wife ko, tapos sabi niya, ‘O, si Tita Jane, nandito.’
"May tina-try siyang isoli. Basta it was a funny scene daw! So sabi ko, sana bumaba ako."
Read: Coco Martin says he had premonition about Jaclyn Jose’s death
LONG PHONE CALLS WITH JACLYN
May komunikasyon naman daw sina Jaclyn at Gabby kahit hindi madalas magkita.
"Nagte-text-an naman kami. Last text was, I’ll try to recall, pero yan, matagal na rin kaming hindi nagkikita ni Tita Jane.
"Kasi she’s very busy! And she loves to be busy. She loves working.
"Tuwang-tuwa siya, binalita niya sa akin, nag-text siya sa akin na pumasok siya ng BQ. She was so happy."
Ang tinutukoy ni Gabby na "BQ" ay ang FPJ's Batang Quiapo kunsaan gumaganap si Jaclyn bilang general.
Ayon pa kay Gabby, mahaba raw ang text exchange o phone call nila kapag nag-uusap sila ni Jaclyn.
"Siyempre, marami pang ibig sabihin sa mga text namin. Marami pa siyang sinabi, pero hindi ko na sasabihin yon.
"Pero nakakatawa, nakakatawa! Ano naman yun, e, basta pag 11:00 p.m., nag-ring ang phone mo, ready ka na dapat.
"Dapat may tubig ka na. Puwede kang magkaroon ng popcorn or ano. Kasi, mahabang usapan yon."
Read: Alden Richards recalls Jaclyn Jose was unimpressed by his acting when they first met
JACLYN JOSE'S WELL-ATTENDED WAKE
Hapon ng Lunes, Marso 4, nang inanunsiyo ni Andi sa isang mediacon na pumanaw si Jaclyn dahil sa heart attack.
Si Gabby ang katabi ni Andi noong mga oras na iyon.
Habang kini-cremate ang mga labi ni Jaclyn noong Lunes ay dumagsa na sa Arlington Memorial Chapel ang mga kapamilya at malalapit na kaibigan.
Marso 5, Martes, bandang 12:42 a.m., dumating ang urn na naglalaman ng cremains ni Jaclyn.
Kinagabihan, ang team sa likod ng FPJ's Batang Quiapo ang nanguna sa pagbigay ng special tribute para kay Jaclyn.
Umawit sina Zsa Zsa Padilla, Jona, at Jed Madela. Nag-eulogy si Coco Martin, at inilahad na tila may premotion ng pagpapaalam si Jaclyn sa mga huling eksena nito sa FPJ’s Batang Quiapo.
Viva Night noong Marso 6, Miyerkules.
PPL Entertainment Night noong Marso 7, Huwebes. PPL ang management team nina Jaclyn at Gabby.
Umawit sina Jai ng Agsunta, Yumi Lacsamana, at KZ Tandingan.
Nagpugay si Perry Lansigan, the man behind PPL.