Nag-viral recently ang nursing student na isa ring content creator.
Inulan siya ng batikos dahil sa pagkuha niya ng video ng isang monitor na nagpa-flatline, pati na rin ng mga restricted areas ng ospital.
All for her social-media content.
Tuloy, ang nursing student ng University of Perpetual Help - Calamba ay tinaguriang “Flatline Queen."
Read: Student nurse gets backlash for controversial “flatline” video; school reacts
Hindi pa man lumilipas ang init ng isyu, isa na namang medical intern mula raw sa FEU-NRMF (Far Eastern University - Dr. Nicanor Reyes Medical Foundation) ang naging laman ng mga negatibong komento sa social media.
Siya rin ay isang content creator na nag-graduate nitong Hunyo 14, 2024.
Sa isang TikTok video—na ngayo’y deleted na—ipinasilip niya rin ang buhay ng isang medical intern.
Kasama rito ang pagsasagawa ng Cardio-Pulmonary Resuscitation (CPR) sa isang pasyente.
Bagamat tinangkang i-blur ang mukha ng pasyente, makikita pa rin ang bahagi ng mukha nito habang nagaganap ang intubation procedure.
Isa pa, in-expose rin ng medical intern ang isang patient chart para sa kanyang “penmanship reveal.”
Umani ito ng galit mula sa mga netizens, dahilan upang kuwestiyunin nila ang ethics ng mga medical professionals sa kasalukuyan.
Read: Life story of jeepney driver’s son who makes a fortune in Spain
MEDICAL PROS SLAM INTERN FOR FILMING
Hindi nakaligtas ang medical intern—na binansagan namang “CPR Queen”—sa maaanghang na patutsada ng mga doktor, nars, at iba pang medical professionals na nagkomento sa social media.
(Note: Comments from social media are published as is.)
Sa isang X (formerly Twitter) thread, kinondena ng isang licensed doctor ang inasal ng medical intern, “Ang alarming lang na gagawin lahat for the clout kahit lumalabag na code of ethics.
“Di mo kailangan maging PGI pa para malaman ang tama sa mali.
“Nakakaloka ka gurl. PGH, tutukan nyo ‘tong intern nyo baka magkalat dyan.”
“HINDI PA SYA DELETED. IT’S STILL THERE. NAKAKAGALIT. FEU-NRMF, do something about this. And I am not censoring you girl.
“Pinagsabihan ka na idelete pero ayaw mo pa rin. Gusto mo ng clout, here you go.”
“And bakit mo icocontent ang charts?!?!?!?! THESE ARE CONFIDENTIAL DOCUMENTS!!!! Girl, pagiging doktor ba talaga gusto mo or vlogger?”
Komento ng isa pang doktor: “BAKIT WALANG NAG CACALL OUT SA KANYA?! Napaka-feeling entitled pa talaga nitong batang tooo (re:recent issues)”
Sagot naman ng isa pa, “meron na doc. Nung una pinilit sya ipadelete yung vid pero siguro for the engagements, ayaw nya tapos iedit nya na lang daw with matching iyak iyak hahaha pero eventually dinelete rin daw pero ang alarming kasi juskoooo for the clout talaga”
Ang sabi naman ng isang pediatrician, “Panibagong sakit ng ulo. At this point pwede bang sabay sabay na lahat magreview ng social media guidelines kasi ganun din naman magiging statement pag nahuli. To us all: can we just do our job ethically w/o waiting for someone to call us out.”
Ganito naman ang sabi ng isang netizen: “Di pa to nagiging lisensyadong doktor, ganito na ito umasta: grossly unethical behavior. Di nya pwedeng idahilan na di nya alam na bawal ito, because ignorance of the law excuses no one, lalo na if aspiring doctor ka. She needs to be held accountable, and yes, RA 10173 is waving.”
Ang Republic Act No. 10173, na kilala rin bilang Data Privacy Act ay isang batas na naglalayong protektahan ang lahat ng uri ng impormasyon, maging ito man ay pribado, personal, o sensitibo.
NETIZENS ARGUE OVER VIRAL VIDEO
Samantala, isang netizen naman ang nagsabi na walang problema sa pag-e-expose ng patient charts kung hindi naman nakita ang pangalan ng pasyente.
Aniya, “Pwede yan kahit i myday mo pa yung chart kase wala namang name ng px. Wag lang po talagang masasamahan ng name kasi bawal talaga”
Sabat naman ng isa pang netizen, “Not exactly. Even if the name and sensitive info aren’t explicitly displayed, other information can already give clues that can still compromise one’s privacy.”
Sa isang retweet, ganito naman ang sinabi ng isang netizen: “Dati nakakatakot magpaospital dahil sa bayarin, ngayon nakakatakot dahil pa rin sa bayarin pati na rin kasi baka gawin ka lang content. It’s very concerning how many were doing vlogs/contents on spaces that they shouldn’t be doing so”
Iisa ang punto ng karamihan: sana’y alam ng mga content creators ang kanilang limitasyon lalo pa’t nasa isang propesyon sila na dapat ay nangangalaga, hindi lamang sa kalusugan kundi maging sa privacy ng mga pasyente.
Diumano, ang medical intern ay nasa kanyang post-graduate internship sa Philippine General Hospital (PGH).
As of this writing, walang pang inilalabas na pahayag ang medical intern, paaralan, at ang involved na ospital tungkol sa isyu.
Gayunman, umaasa ang netizens na magiging catalysts ang mga isyung ito para mas paigtingin ang social-media guidelines.
Alam kaya ng pasyente ng kinukuhaan siya ng video? Ano kaya ang mararamdaman ng pamilya?
At paano kung ang content creator mismo ang nakaratay sa bed, gugustuhin rin ba niyang makuhaan ng video?
Ayon sa isang netizen, “It raises the question: where do we draw the line between sharing our experiences and upholding the core values of our profession?”