Iginiit ng Cebu-based lifestyle writer na si Jude Bacalso na pinaninindigan lamang nito kung ano sa tingin niya ang tama kaugnay ng kontrobersiyal na misgendering issue na pumutok noong July 2024.
Naging laman ng mga balita si Jude, dating TV personality sa Cebu at ngayon ay travel at food writer, nang maakusahang sinermunan at pinatayo umano sa harapan niya ang isang waiter na tumawag sa kanya ng “Sir.”
Si Jude ay miyembro ng LGBTQIA community.
Nangyari ang insidente sa Ulli’s Streets Asia restaurant sa Ayala Center, Cebu, noong Hulyo 22, 2024.
Naging napakainit ng usapin at naglabas ng opinyon ang netizens, kabilang na ang ilang celebrities ukol sa isyu.
Inulan ng batikos ang Cebu-based writer.
Read:
- Cebu personality issues apology over misgendering controversy
- Rosanna, Aiko, Kaladkaren react to misgendering issue in Cebu
Sa pinakahuling ulat, limang reklamo ang isinampa ng waiter laban kay Jude sa Cebu Prosecutors Office noong Augusto 28, 2024.
Walang naging pahayag si Jude kaugnay ng patung-patong na reklamong isinampa laban sa kanya. Tahimik din siya sa social media.
Pero ngayong Huwebes, September 19, muling nagsalita si Jude kaugnay ng kontrobersiya nang maging speaker siya sa isang forum.
Read: Waiter files complaints vs Cebu personality he called “Sir”
JUDE BACALSO SPEAKS UP
Si Jude ay inimbitahang maging main speaker sa Mamser: Improving Media Reporting on Gender Forum na ginanap sa Marcelo D. Fernan Press Center sa Cebu ngayong araw.
Ang highlight ng forum ay media reporting pagdating sa LGBTQIA community, tulad ng isyung misgendering.
“I had a valid complaint… I was misgendered not once, but three times,” sabi ni Jude sa kanyang speech na nai-post ng CDN via Facebook.
“When it happened, my standard response is always humor… Inclusivity is very important, especially when you’re in a public-facing industry.”
Nangatuwiran pa si Jude na hindi siya gumawa ng negatibong posts, habang ang mga post laban sa kanya ay mula sa raw sa fake accounts.
Ito ay base naman sa post ng MyTV Cebu via Facebook.
Dagdag pa ni Jude, nang humupa ang isyu sa social media, nagpalit pa raw ng account name ang FB “poser” para ipagpatuloy ang pagbabatikos sa kanya.
Pagtatanggol pa ng lifestyle writer sa sarili kaugnay ng kontrobersiya, hindi raw niya inutusan ang waiter na tumayo sa harap niya.
At bukod daw sa waiter, present din sa pag-uusap ang supervisor at isang babaeng waitress.
Sa kumalat kasing larawan sa Facebook, makikita si Jude na nakaupo sa kanyang table area at nakatayo sa kanyang harap ang lalaking waiter.
Wala namang naging pahayag si Jude kaugnay ng mga isinampang reklamo sa kanya ng waiter.
COMPLAINT VERSUS JUDE
Ang limang reklamo laban kay Jude ay unjust vexation, grave scandal, grave coercion, grave threats, at slight illegal detention.
Inihain ito ng legal counsel ng 24-year-old waiter na si Atty. Ron Ivan Gingoyon sa Cebu Prosecutor’s Offce noong August 28, 2024.
Bukod pa sa mga reklamo laban kay Jude, may labor complaint ding inihan ang panig ng waiter laban sa restaurant.
Kasunod ng kontrobersiya ay nagkasundo raw ang resto management at waiter na umalis na lamang ang huli.
Sinabi rin ng abogado ng waiter na hindi nag-reach out sa kanila si Jude matapos magsampa ng reklamo.
Samantala, matinding trauma raw ang idinulot ng isyu sa kanyang kliiyente na nag-deactivate na rin ng social media.
Read: Is Cebu waiter open to amicable settlement with Jude Bacalso?