Pumanaw na ang multi-awarded theater producer at director na si Bobby Garcia.
Binawian ng buhay si Bobby sa Vancouver, Canada, noong Martes, Disyembre 17, 2024.
Siya ay 55.
Inihatid ni Boy Abunda ang malungkot na balita sa live telecast ng Fast Talk with Boy Abunda ngayong Miyerkules ng hapon, Disyembre 18.
Read: Jersey Boys stars on their director Bobby Garcia: He's great
“Ito po ay isang malungkot na balita para sa mga kaibigan ng one of my best friends in my life, Bobby Garcia, the director.
"Pumanaw na po ang multi-awarded theater director-producer na si Bobby Garcia sa edad na 55..." pag-anunsiyo ni Boy.
Dagdag ng TV host: “The family thanks friends for understanding their desire for privacy during this very, very difficult time.
"Kami po ay nakikiramay sa pamilya at sa mga mahal sa buhay ni Bobby Garcia.
“Bobby was one of the beautiful persons, inside and out, na nakilala ko po sa tanang buhay ko.
"You will be missed.
"And wherever you are, I know you’re in heaven, Bobby, I want you to know that you are loved.”
Read: Jimmy Morato, veteran actor and broadcaster, dies at 78
BOBBY GARCIA'S BODY OF WORK
Si Bobby Garcia ay itinuturing na isa sa pinakamalaking pangalan sa larangan ng teatro, hindi lamang sa Pilipinas kundi maging sa ibang bansa.
Noong 1999, itinatag niya ang Atlantis Productions / Atlantis Theatrical Group of Companies.
Ayon sa nakasaad sa kanyang bio, na nakalathala sa sarili niyang website, si Bobby ay direktor at producer ng mga obrang na-nominate sa Tony, Drama League, at Outer Critics Circle Awards — mga pretihiyosong award-giving bodies na kumikilala sa mga talento at produksiyon sa teatro.
Bukod sa teatro, nakapagdirek din siya sa film, television, at live concert.
Nakapagdirek siya ng mahigit 50 plays at musicals sa Canada at iba't ibang bahagi ng Asia.
Kabilang sa mga naidirek niyang stage productions ay Million Dollar Quartet, Dolly Parton's Smoky Mountain Christmas Carol, Beneath Springhill: The Maurice Ruddick Story, Sweeney Todd, Beautiful: The Carole King Musical, The Band's Visit, Fun Home, Waitress, In The Heights, at The Bridges of Madison County.
Read: Mercy Sunot, lead vocalist of Aegis, dies of cancer at 48
Naging direktor din siya ng Angels in America, Matilda, Kinky Boots, Saturday Night Fever, Shrek, Ghost, The Addams Family, Carry, Piaf, Disney's Aladdin, Next to Normal, Nine, God of Carnage, Disney's Little Mermaid, A Little Night of Music, Xanadu, The 25th Annual Putnam County Spelling Bee, Hairspray, at Rodgers & Hammerstein's Cinderella.
Nariyan din ang Dogeaters, Avenue Q, The King & I, Disney's Beauty & The Beast, Baby, Urinetown, Dreamgirls, The Rocky Horror Show, Proof, Tick Tick... Boom!, Hedwigh & The Angry Inch, Jesus Christ Superstar, How I Learned To Drive, at Rent.
Kabilang naman sa concerts at TV specials na idinirek ni Bobby ay Lea Salonga: 40; Lea Salonga: Playlist; Your Songs, Lea Salonga: The Broadway Concert; Night of the Champions; The Prince of Pop & The Comedy Concert Queen; Lea Salonga: Songs From Home; Erik Santos Solo At The Coliseum; at Lea Salonga: Home For Christmas.
Read: Robert Alejandro, former Art Is-Kool host, passes away at 61
Naging associate director din si Bobby ng Miss Saigon nang itanghal ito sa Pilipinas.
Bilang producer, pinangunahan niya ang mahigit 65 productions sa Asian region.
Sa Broadway, co-producer siya ng historic musical na Here Lies Love, na nagkaroon ng apat na Tony Award nominations.
Ang Request Concert ng Theatre Group Asia ang huling proyekto niya bilang direktor.
Hall of Famer na si Bobby sa Aliw Awards dahil sa mga parangal na iginawad sa kanya.
Si Bobby ay may Masters of Fine Arts degree in Directing for Theatre mula sa University of British Columbia at Bachelors Degree mula sa Fordham University sa New York.