GORGY RULA:
Suportado ng halos buong pamilya Sotto ang premiere night ng pelikulang The Kingdom noong Biyernes, December 20, sa Cinema 11 ng Gateway Cineplex sa Cubao, Quezon City.
Hindi lang ang Sotto family at mga kaibigan ang dumating, kundi ang iba pang Dabarkads ng Eat Bulaga! kagaya nina Jose Manalo at Wally Bayola.
Humahangos na dumating ang bagong kasal na si Jose Manalo na kagagaling lang daw ng airport mula sa Boracay kung saan ginanap ang kasal nila ni Mergene Maranan.
“Ay! Masayang-masaya ang bagong kasal!” bulalas ni Jose nang sinabayan ko sa red carpet papasok ng cinema.
Nagpapasalamat siya sa Panginoon na nalagpasan na raw niya ang mga pinagdaanan niya noon, at ngayon ay masaya na siya sa piling ni Mergene at ng kanilang mga anak.
“Thank you, Lord! Thank You, Lord sa mga pagsubok at mga biyayang binigay sa amin. Galing pa ako sa airport, deretso na ako dito kay Bossing, kasi dapat natin panoorin si Bossing.
“Maganda, e. Hindi ko puwedeng ma-miss. Baka masabay sa honeymoon. So, punta muna tayo dito,” dagdag ni Jose.
Wala pa siyang sinabi kung saan ang honeymoon, pero magkakaroon daw.
Read: Jose Manalo, Mergene Maranan now officially husband and wife
NOEL FERRER:
Bago dumating si Jose sa premiere ng The Kingdom ay nakatsikahan din ng PEP Troika si Wally Bayola na masaya sa kanyang kaibigan.
Nagulat daw si Jose nang dumating silang lahat sa Boracay para maging bahagi sa kasal nito.
“Si Jose, hindi niya ini-expect na pupunta lahat. In-invite niya pero isipin niyo, malayo. Tapos, di ba pag December, iba yung dagat Boracay e, maalon.
“Pero natuwa siya. Sabi niya, grabe, dumating lahat sila, buong pamilyang Sotto, de Leon, lahat.
“Deserved ni Jose na maging masaya. Siyempre after all the struggles na pinagdaanan, eto,” pahayag ni Wally.
JERRY OLEA:
JOSE-WALLY TANDEM, 25TH ANNIVERSARY NA SA 2025
Nabanggit na rin ni Wally Bayola na next year ay 25 years na ang tandem nila ni Jose at may binabalak na sila para i-celebrate ang 25th anniversary ng kanilang partnership sa pag-entertain. Kaya may iniisip na magandang project para sa kanila.
“Hindi ko alam pero magse-celebrate kami ng silver namin ng Wally-Jose.
Hindi pa namin alam… it’s our silver anniversary, 25 years na kami next year.
“Siguro, mag-Araneta? Baka lang… o baka mag-movie,” sabi pa ni Wally.
Read: Comedy tandem Jose Manalo and Wally Bayola on doing another concert: “Nakakatakot po… nakakatakot.”