Nagluluksa ang Philippine entertainment industry dahil sa pagpanaw ni Pilita Corrales (Agosto 22, 1937 - Abril 12, 2025), ang multi-awarded Filipina singer na kinikilala bilang Asia’s Queen of Song.
Read: Pilita Corrales: Isang pagpupugay sa Asia's Queen of Songs
Binawian ng buhay si Pilita sa edad na 87 at naulila niya ang kanyang mga anak na sina Jackie Lou Blanco at Ramon Christopher Gutierrez.
Ang apo ni Pilita, ang aktres na si Janine Gutierrez, ang nagkumpirma ng malungkot na balita sa pamamagitan ng kanyang Instagram post ngayong Sabado ng tanghali, April 12, 2025.
"It is with a heavy heart that we announce the passing of our beloved mami and mamita, Pilita Corrales.
"Pilita touched the lives of many, not only with her songs but also with her kindness and generosity.
"She will be remembered for her contributions to the entertainment industry, but most of all for her love of life and family.
“Please join us with your prayers and kind thoughts as we celebrate her beautiful life.
"Further details regarding memorial services will be shared soon.”
PILITA CORRALES EARLY CAREER
Nag-umpisa noong 1957 ang karera ni Pilita sa pagkanta at itinuturing siya na “Pinakamagaling na Mang-aawit” mula sa Pilipinas dahil sa kanyang boses at pagliyad ng balakang sa tuwing umaawit—isang estilo niya na tumatak nang husto sa publiko.
Unang sumikat si Pilita bilang recording artist at television star sa Melbourne, Australia, noong 1959 matapos manguna sa charts ang kanyang kantang "Come Closer to Me."
Ang tagumpay ni Pilita sa Australia ang dahilan kaya ipinangalan sa kanya ang isang kalye, ang Pilita St. sa Forest Hill, state of Victoria, Melbourne.
Nang bumalik si Pilita sa Pilipinas noong 1963, naging radio star siya sa La Taverna ng DZPI.
Nagtanghal siya sa mga sikat na teatro noon, ang Clover at Manila Grand Opera House.
Paborito si Pilita sa concert scene kaya naimbitahan siyang magtanghal kasama ang mga international singer na sina Matt Monroe, Ray Charles, Sammy Davis Jr., at The Beatles.
PILITA CORRALES SONGS AND CAREER HIGHLIGHTS
Naranasan din ni Pilita na makasama sa tour ni Bob Hope (May 29, 1903 - July 27, 2003), ang pinakasikat na American entertainer at producer noon.
Ang "A Million Thanks to You" ang isa sa mga pinasikat na kanta ni Pilita noong 1963.
Siya rin ang umawit sa "Ang Pipit" at "O Maliwanag na Buwan," ang mga popular na awitin noong dekada ’70.
Si Pilita ang kauna-unahang Pilipino na nagwagi na Best Performer sa 1st Tokyo Music Festival noong 1972, at kabilang ang British-Australian singer na si Olivia Newton-John sa mga tinalo niya sa naturang international music festival.
Tumanggap si Pilita ng maraming pagkilala at parangal dahil sa kanyang mga hindi matatawaran na kontribusyon sa Philippine entertainment industry, kabilang ang Lifetime Achievement Award mula sa Philippine Association of the Recording Industry.