Aminado si Imelda Papin na malaki ang impluwensiya ni Pilita Corrales kung bakit pinasok niya ang music industry.
Ayon sa veteran OPM singer, ang Asia's Queen Of Songs ang kanyang idolo, kaya't tumatak sa kanya at itinuring na dream-come-true ang lahat ng shows na nagkasama sila.
Nakapanayam ng PEP.ph (Philippine Entertainment Portal) si Imelda sa ikalawang araw ng burol ng namayapang singer, nung April 14, sa Heritage Memorial Park sa Taguig City.
Pumanaw si Pilita noong April 12, 2025 sa edad na 87.
"Unang-una, siya ang idol ko. Siya talaga. Nung bata pa ako, pag tinatanong ako kung sino ang gusto ko na singer, walang iba kundi Pilita Corrales.
"Nasa kanya ang lahat ng qualities ng isang icon, ng isang superstar, ng isang recording artist na alam mong tumatak sa tao."
"Napakabait, sobra… Sana naranasan niyo kung gaano kabait si Tita Pilita, na pag kasama mo sa show, wala kang kaproble-problema, as in. She will talk to you. Ang saya, ang saya niyang kasama."
Read: Ara Davao recalls how Pilita Corrales encouraged Moira dela Torre
IMELDA RECALLS PILITA'S IMPORTANT ADVICE TO HER
Nang balikan niya ang shows na kanilang pinagsamahan, sinabi ni Imelda na may mga pagkakataong hindi siya makapaniwalang makakasama niya ang iniidolo sa entablado.
"Siyempre, tuwang-tuwa ako, galing ako sa probinsiya, di ba?
“’Tapos nung nagkaroon ako ng pangalan, ‘tapos nagkasama kami sa show, di ko akalain na balang araw pala, yung hinahangaan ko ay makakasama ko sa show.
“Sa NPC kami nun, National Press Club, dun kami nag-umpisa magkasama.
“From then on, dire-diretso na yun, lagi kaming may mga shows. We had shows in Vegas. Magkasama kami, maganda yung mga shows namin, successful, we toured all over California. That was the last work na magkasama kami.”
Hindi binanggit ni Imelda kung anong taon sila huling nagkasama.
Ayon pa kay Imelda, sa kahit na anong show nila ni Pilita ay di niya ito kinakitaanng may iniinda ito.
Consistent daw ito sa tuwing magpe-perform.
"I was shocked kasi di mo naman makikita na iba siya on stage, ‘no. It's still the Pilita Corrales.
“Even when we had a show in the States, yung mga liyad niya, yung galing niya sa stage, still Pilita Corrales. I would never forget her."
Tinanong din namin ang singer kung may naaalala ba siyang payo sa kanya ni Pilita.
Sagot niya, "Yes, ang sabi niya lang sa akin, ‘Mel, keep on doing what's on your heart.’
“Kasi ako, if there's a show, I see to it na pinang-aaralan ko muna ang crowd, kung ano ang dapat ko munang kantahin.’
“I told her that. Ang sabi niya sa akin, ‘Tamang-tama yung ginagawa mo. Iba-iba ang audience. Except yung mga hit songs mo, wag mong kakalimutan, wag kang lalabas na di mo kakantahin yung mga songs mo.’"
Pagpapatuloy ni Imelda, "Malaking kawalan, kasi siya naman talaga ang aking ina-idolize, ang aking nirerespeto pagdating sa pag-awit.
“Sa tagal niya sa industriya, siya lang ang nakabinbin ang kanyang popularity, until the time na nawala siya.”
Nang tanunging kung may mensahe siya para sa pumanaw na idolo, sagot ni Imelda, “Tita Pilits, alam mo naman na masaya tayo magkasama. Pag nagtu-tour tayo, hindi lang sa Pilipinas, kungdi sa ibang bansa.
“Mami-miss ka namin, sana ikaw na nasa piling ng Panginoon, ipagdasal mo kami."
Read: Jericho Rosales, Ogie Alcasid pay tribute to Pilita Corrales
JAMIE RIVERA AND JED MADELA PAY TRIBUTE TO PILITA
Kasabay din ni Imelda na nakiramay ng gabing iyon ang mga singers na sina Jamie Rivera at Jed Madela.
Ayon sa dalawa, marami silang fond memories kay Pilita na tinaguriang Asia's Queen Of Songs.
Kuwento ni Jamie, na kilala bilang isang soulful singer: "Nagkikita kami sa mga shows, of course.
“Minsan mayroon kaming show sa Club Filipino, ‘tapos bibigyan kami ng plake. Hinawakan niya ang kamay ko, sabi niya sa akin, ‘Sana ginawa na lang nilang pera para masaya pa tayo,’ pero she's joking, of course.
“Minsan nagkita kami sa airport, "Tita Pilita, yung mata mo maliwanag." Ang sabi niya, 'As early as now, dapat magpa-laser ka na. Gawin mo na ngayon. Pa-laser ka na ng mata mo dahil kailangan natin iyan, mga performers tayo.’ Hanggang ngayon di pa ako nakakapagpa-laser kasi bawal sa akin,” balik-tanaw ni Jamie.
“Most of the time, nakikita ko siya sa Mt. Carmel Church, nagsisimba siya, ‘tapos tinatabihan ko.”
Memorable rin ang mga alaala ni Jed kay Pilita.
Isa raw si Pilita sa mg nagtiwala kay Jed noong nagsisimula pa lamang ang huli sa local music industry.
"Sa mga di nakakaalam, si Tita Pilita was one of the very first icons na sumuporta sa akin. Sila ni Kuya Germs,” kuwento ni Jed.
“I would remember seeing them always sa Greenhills, hanging out. Di pa nila ako kilala nun,
“I see icons na nagha-hang out lang, sila nila Kuya Germs, and then I got to meet them.
“I got to perform with Tita Pilita sa Master Showman,” pagtukoy ni Jed sa Kapuso late-night show ni German Moreno, na pumanaw noong January 2016.
Patuloy na kuwento ni Jed, “And then si Tita Pilita naman, nagge-guest sa mga concerts ko, and then nagge-guest din naman ako sa mga concerts niya.
“When I was starting, people didn't know who Jed Madela was. Sobrang laki ng utang na loob ko kay Tita kasi isa siya sa naniwala sa akin. Kahit wala pa akong pangalan noon, she will include me sa kanyang mga shows.
"Ang di ko makakalimutan kay Tita Pilita, she would always have something really nice to say. As in, wala ka talagang marinig sa kanya na ka-negahan.
“She was such a gracious lady. Sobrang class, but at the same time, she was very funny," pahayag pa ni Jed, na tinitingala rin bilang isa sa pinakamahusay na male singers ng bansa.