Para kay Sharon Cuneta, malalim ang espasyo sa puso niya para sa pinagsamahan nila ng pumanaw na aktor at direktor na si Ricky Davao.
Read: Tearful Jackie Lou Blanco says she had "closure" with Ricky Davao
Bukod sa ilang beses silang nagkatrabaho ay ilang dekada rin ang itinagal ng kanilang pagkakaibigan.
Nakapanayam ng PEP.ph (Philippine Entertainment Portal) si Sharon sa lamay para kay Ricky sa Heritage Park sa Taguig City noong May 5, 2025.
"Yung unang movie namin, mag-boyfriend pa sila ni Jackie nung 1987, yung Kung Aagawin Mo Ang Lahat Sa Akin.
"Tapos we did Kahit Konting Pagtingin. Nung mag-asawa na sila, nagka-baby, inaanak ko yung panganay, si Ken. Pare at Mare ang tawagan namin.
"Si Ricky mahilig kumanta. Kahit saan kami, party, kahit nga burol ng kaibigan, sasabihin sa akin nun, 'May dala akong minus one.' Gusto niya ka-duet niya ako lagi," bungad ni Sharon.
Ang "Jackie" na tinutukoy ni Sharon ay ang aktres at estranged wife ni Ricky na si Jackie Lou Blanco.
May pagkapilyo at "kuripot" din daw si Ricky.
Naging magkatrabaho kasi sila sa Katipunan ng mga Artista ng Pelikulang Pilipino (KAPP).
"Officers pa kami ng KAPP nun, ako ang chairperson, tapos si Daboy yung presidente," ani Sharon.
Ang tinukoy niyang "Daboy" ay ang pumanaw na aktor na si Rudy Fernandez.
Lahad ni Sharon: "Kasama namin si Ricky, kakain kami nun sabay-sabay. Tapos mag-o-offer siyang magbayad, 'Ako na, ako na.'
"Kami naman, 'Wag na, Pare.' Tapos, 'Sige na nga.' So, papayagan ni Daboy.
"Pagdating nung waiter, binigay yung card niya, tapos biglang babalik yung waiter, 'Sir, di po namin tinatanggap ito.'
"Ako naman, 'Ha? Ano bang card ito?' Pagkita ko, ID pala, niloloko niya kami."
Aminado si Sharon na matagal na rin nang huli silang magkita at mag-usap ni Ricky.
"You know, this is the problem. You make friends especially in show business, you know, your friends, your busyness takes it away," saad ng Megastar.
Sabay tukoy niya sa estranged wife ni Ricky na si Jackie Lou, "Kahit kami ni Jackie, nag-reconnect kami niyan kailan lang, e.
"But never nawala yung love, saka yung friendship."
Read: Sharon Cuneta recalls turning over KC Concepcion's savings
SHARON CUNETA ON RICKY DAVAO'S ILLNESS
Nalaman lang daw ni Sharon na may sakit si Ricky nang dumalaw siya sa lamay para kay Pilita Corrales, ina ni Jackie Lou at biyenan ni Ricky.
Itinago kasi ni Ricky ang limang buwang pagkakaratay nito sa ospital dahil sa cancer.
Pagbabahagi ni Sharon: "Kinuwento ng mga anak sa akin saka ni Jackie na he was sick na nga.
"Nagulat na lang kami. Sobra nga akong emotional, nag-flashback yung kabataan namin.
"Saka kaibigan siya ng mga half-siblings ko, sa side ni Daddy.
"Lagi ko siyang nakikita kahit private na events noon, saka siyempre dahil artista rin, nakakasama namin."
Binawian ng buhay si Ricky sa edad na 63 noong May 1.
Nakikidalamhati si Sharon sa mga naulila ni Ricky.
Read: Ricky Davao dies at 63
Sabi niya: "Napakabuti na kaibigan ni Ricky at napakasayang kasama. Napakagaling na artista.
"Seryoso, laging kontrabida. Pero sa totoong buhay, isa sa pinakamabait at pinakamasayang kasama.
"Malaki siyang kawalan. Nakakalungkot nga sunud-sunod. Hindi pa kami nakaka-get over kay Tita Pilita, kay Ate Guy, heto na naman."
Pumanaw si Pilita Corrales noong Abril 12, 2025.
Read: Pilita Corrales dies at 87
Si National Artist Nora Aunor, aka Ate Guy, ay pumanaw noong Abril 16.
Read: Nora Aunor dead at 71
"Pero si Ricky talaga yung mayroon akong friendship with him, talagang nakatrabaho nang ilang beses," dagdag ni Sharon.
Read: Sharon Cuneta: First Million at 15, Billion by 30s
SHARON CUNETA ON RICKY DAVAO SINGING WITH NORA AND PILITA
On a lighter note, na-imagine daw ni Sharon na kinukulit ni Ricky sa kabilang buhay ang mga kasabayan nitong pumanaw na artista.
Farewell message ng Megastar kay Ricky: "Enjoy there. Wag mo nang istorbohin si Tita Pilita saka si Ate Guy.
"Baka naman pilitin mo pang makipag-duet sa iyo, patahimikin mo na.
"Baka sabihin, 'Hanggang dito ba naman.' I'm sure dun perfect na ang boses nila."
Dagdag na farewell message ni Sharon: "Pare, we're going to miss you. The industry is going to miss you. We lost a brilliant actor in you.
"Isa siya sa pinakamasarap na katrabaho, isa sa pinakamasayahin.
"Rest assured we're here for the kids. Mahal namin kayo."