Si Julian Estrada nga ba ang anak ni Senator Jinggoy Estrada na tinutukoy ng mga balita sa local radio stations na diumano'y nabugbog ng tatlong kabataang lalaki sa Boracay?
Hindi kasi pinangalanan sa ulat kung siya ito.
Pero, kapansin-pansin naman sa Instagram Story ni Julian ngayong araw, Mayo 24, 2025, na meron siyang pinagdaraanan ngayon.
Hindi raw kasi siya makakasama sa Epic, isang party place sa isla, dahil kailangan niyang mag-recover.
May pinagdaraanan daw siya, sa sarili niyang mga salita: "both physically and mentally."
Buong post ni Julian: "To everyone expecting to see me at Epic tonight, I won't be able to make it.
"Got caught in a really unfortunate situation last night and need time to recover, both physically and mentally appreciate all your understanding and support. See you soon"
Read: Julian Estrada admits past relationship with Julia Barretto
LOCAL NEWS REPORT ABOUT SENATOR JINGGOY ESTRADA'S SON
Bandang alas dos ng hapon ngayong Mayo 24, iniulat ng Radyo Todo Aklan 88.5 FM ang tungkol sa nabugbog umanong anak ng mambabatas.
Naaresto raw ang tatlong suspek ng pambubugbog.
Pawang mga 18-anyos daw ang tatlo.
Ayon sa report, nangyari ito bandang alas dos ng madaling araw sa D'Mall, isang sikat na pasyalan sa Station 2 ng Boracay.
Narito ang nakasaad sa buong ulat ng Radyo Todo Aklan 88.5 FM:
"UPDATE: ANAK NI SEN. JINGGOY ESTRADA, BINUGBOG UMANO SA FRONT BEACH SA ISLA NG BORACAY; 3 SUSPEK, ARESTADO
"PINAGSUSUNTOK ng tatlong binata ang anak ni Sen. Jinggoy Estrada at kasama nito sa Station 2 sa isla Boracay bandang alas 2:00 ng madaling araw.
"Batay sa impormasyong nakalap ng Radyo Todo, habang naglalakad ang mga biktima, mula sila sa isang bar patungong D’Mall, nang bigla silang sundan at pinagtulungang suntukin ng tatlong lalaki sa tapat ng isang hotel sa Brgy. Balabag.
"Kinilala ang mga suspek na sina James Carl Vargas y Jason, Dwyne David Mecca y Delos Santos, at Khenjie Sarabia y Dumalaog, parehong 18-anyos at residente ng isla ng Boracay.
"Nilapitan umano ng isa sa mga suspek ang isang biktima at biglang sinuntok.
"Nang umawat ang isa pang biktima, itinulak din siya at inundayan ng suntok ng mga kasamahan ng suspek.
"Agad namang rumesponde ang kapulisan sa lugar at naaresto ang mga suspek.
"Isinugod sa ospital ang isa sa mga biktima para sa agarang medikal na atensyon."
Ayon naman sa ulat ng K5 News FM Kalibo 94.5, dumating daw ang amang senador ng biktima sa Malay PNP Station bandang alas tres ng hapon.
Ayon sa nakasaad sa ulat: "Nasa Malay PNP Station na si Senador Jinggoy Estrada, kung saan kasalukuyang ginaganap ang isang conference kaugnay ng umano'y pambubugbog sa kanyang anak na nagbabakasyon sa isla ng Boracay."
Tinawagan ng PEP.ph (Philippine Entertainment Portal) ang Malay PNP hotline, 8:08 PM, ngayong gabi ng Mayo 24, pero sinabi ng nakasagot ng telepono na hindi siya awtorisadong magbigay ng anumang detalye.
Ito ay bagama't naiuulat na ang insidente ng mga local radio stations at wala namang ginagawang pagtanggi ang kapulisan sa report.
LATEST FROM MALAY PNP AS REPORTED BY K5 News FM Kalibo 94.5
Ayon sa pinakahuling ulat ng K5 News FM Kalibo 94.5, nakaalis na raw ng Boracay si Senator Estrada matapos ang conference kasama ng mga kapulisan.
Nakalagay sa buong ulat: "Kinumpirma ng Malay PNP na nakaalis na ng Isla si Senador Jinggoy Estrada matapos ang isang conference, ayon sa insidenteng pagbugbog sa anak nito madaling araw ng Sabado sa tapat ng isang hotel sa Boracay.
"Samantala, nanatiling nasa kustodiya ng kapulisan ang tatlong suspek na parehong mga residente ng nasabing lugar.
"Nagtanggi namang magbigay pa ng karagdagang impormasyon ang awtoridad patungkol sa nangyaring insidente habang wala pang abiso ng National Headquarters."
Bukas ang PEP.ph sa maaring ihayag ng kampo ni Senator Jinggoy Estrada at sa tatlong akusadong nabanggit sa ulat na ito.