Masaya si Gabby Concepcion na muling makatrabaho ang original ka-love team niyang si Snooky Serna sa GMA Afternoon Prime series na My Father's Wife.
Una silang nagkatambal sa class coming-of-age Filipino film na Underage noong 1980.
"Naku! Nami-miss ko na nga yang si Snooky, e," masayang bulalas ni Gabby nang makapanayam ng entertainment press sa presscon ng My Father's Wife.
Dagdag ng Kapuso actor, "Kaya nung nakita ko si Snooky, 'Snooky, you have not aged a single day. You still look the same. The last time I saw you sa Miracle of Love.'"
Ang Miracle Of Love ay ang pelikula nila noong 1982. Si Gabby ay 17 taong gulang lamang noon, habang si Snooky ay 16 ang edad.
(Kasama sa Miracle of Love ang flight attendant-turned-actress na si Roxanne Abad Santos. Binawian ng buhay si Roxanne ilang linggo bago maipalabas ang kanilang pelikula dahil sa sakit na leukemia. Siya ay 24 taong gulang lamang noon).
Unang beses na nagsama sa isang teleserye sina Gabby at Snooky.
Nang malaman niyang makakatrabaho niya ulit si Snooky sa My Father's Wife, natuwa raw talaga si Gabby.
Paglilinaw din niya, hindi raw sila na-link sa tunay na buhay kahit noong '80s.
Balik-tanaw ni Gabby, "Si Snooky kasi was never my, you know, nothing personal.
"Nagkaroon kami yung love team. Love team lang. Pero meron siya talagang tunay na buhay na love, e."
Paglalarawan pa niya sa dynamics nila ni Snooky, "So ang tingin ko kay Snooky parang kapatid lang, na parang walang emotional attachment, as far as romance is concerned."
Hindi niya niligawan si Snooky noong '80s?
"Never," sagot ni Gabby.
Nang usisain kung bakit hindi siya na-develop kay Snooky, paliwanag ni Gabby, "Wala lang. Hindi lang ano, e...
"Masyado pa kaming bata nun. Parang hindi pa namin iniisip yun."
Sabay hirit ni Gabby, "Yung kissing scene nga, hindi nga ako ano, e… Nag-workshop pa ako."
May special participation si Snooky sa series bilang asawa ni Gabby.
Read: Gabby Concepcion reacts to Sharon Cuneta wearing a ring from him
GABBY CONCEPCION ON CO-STARS IN MY FATHER'S WIFE
Ang gaganap na karelasyon ni Gabby sa My Father's Wife ay si Kazel Kinouchi, ex-housemate mula sa Pinoy Big Brother Teen Clash of 2010. Batchmate niya ang noo'y Big Winner na si James Reid.
Taong 2022 nang lumipat si Kazel sa GMA Network mula sa ABS-CBN.
Ayon kay Gabby, nag-research siya ng past works hindi lang ni Kazel kundi pati ibang katrabaho niya sa My Father's Wife.
Liban kay Snooky, first time raw kasi ni Gabby na makatrabaho ang cast members ng serye.
Nang tanungin kung ano ang impression niya kay Kazel, sagot ni Gabby, "Maganda, maganda si Kazel. I think ilang years pa lang si Kazel sa GMA, so ang galing naman!
"Parang nakikita ko sa kanya yung mga role ni Cherie Gil—yung parang leading lady na bida-kontrabida.
"I think ganyan din nag-umpisa sina Beauty."
Ang tinukoy ni Gabby na "Beauty" ay si Beauty Gonzales, na nakatrabaho niya sa Stolen Life ng GMA noong 2023.
Pagpapatuloy pa ni Gabby sa bida-kontrabida role ni Kazel, "Actually yung role na ganyan, hindi ka mawawalan ng ganyang role, you can be a chameleon."
First time din ni Gabby na makatrabaho si Kylie, na anak ni Senator Robin Padilla.
Paglalarawan naman ni Gabby kay Kylie: "Okay siya. Very professional naman lahat. Halatang nag-workshop lahat ng artista."
Nagbibirong hirit pa ni Gabby, "Parang ako lang baguhan dito, e, kaya nag-a-adjust pa."
Pagsusuma ulit ni Gabby, "So masarap silang katrabaho. Bottom line, nakikita ko yung dedication nila. And thank you GMA for putting all of us together."
Sa direksyon nina Dominic Zapata at Aya Topacio, nagsimula nang umere ang My Father's Wife kahapon, June 23.
Read: Gabby Concepcion reveals how KC's suitor can win his blessing