Ipinahayag ni Vice Ganda ang simpleng kasiyahan na kanyang naramdaman nang maligo siya sa ulan kasama ang inang si Rosario Viceral at ilang kaanak.
Tila bumalik sa pagkabata si Vice dahil madalas daw niyang ginagawa ang paliligo sa ulan noong kanyang kabataan.
Sa Instagram kahapon, July 21, 2025, ikinuwento ni Vice na pagkagising ay nakita niyang malakas ang ulan.
Ang unang pumasok daw sa isipan niya ay maligo sa ulan.
Kaya naman dali-dali siyang bumangon at pinuntahan ang bahay ng ina.
Kasunod nito ang paliligo nila ni Nanay Rosario sa ulan kasama ang ilan pang kamag-anak.
Sabi ni Vice, published as is, "Gumising ng maaga para magtrabaho. Malakas ang ulan. Naisip ko ung mga araw na naglalaro ako sa ulan.
"Ang saya nung mga araw na yun. Napaisip ako kung anung gusto ko sa sandaling yun. Bumangon ako.
"Pero di ako dumiretso sa trabaho. Pumunta ko sa bahay ng Nanay ko at inaya ko syang maligo sa ulan."
Hindi raw matatawaran ang sayang naramdaman ni Vice noong mga oras na iyon.
Ang inisip lang daw niya noon ay ang makasama ang ina.
Alam daw niyang may trabaho pa siya kinabukasan, pero hindi raw sigurado kung may ulan pa o uulan pa kinabukasan.
Pagtatapos ni Vice, "Napakasaya. Di matatawaran. Sa oras na to gusto ko lang makasama ang Nanay ko at bumalik sa pagkabata . Ang sarap.
"Bukas may trabaho pa ko. Pero di ko alam kung bukas uulan pa. Di din ako sigurado kung makakapaglaro pako sa ulan kasama ang Nanay ko.
"Kaya ngayon na. Ngayon na. #EtoAngTotoongPriceless"
View this post on Instagram
Ngayong Martes, July 22, sinagot ni Vice ang tanong ng isang netizen sa X (dating Twitter) tungkol sa video kung saan naliligo siya sa ulan at nagpagulung-gulong pa sa kalsada.
Saad ng netizen, "Meme bakit ka naman gumugulong sa kalsada HAHAHA ems"
Sagot ni Vice, "Yan talaga yung ‘living my best life’!"
Read: Vice Ganda, binuweltahan ang bashers ng kanyang mga pelikula
RYAN BANG, OTHER CELEBS REACT TO VICE GANDA'S POST
Isa sa unang nagkomento sa post ni Vice ay ang kanyang anak-anakan na si Ryan Bang.
Ang inilagay ni Ryan ay smiling face with heart eyes emojis.
Sabi ni Vice kay Ryan, "anak ko bago ka magpakasal sana maranasan nating maligo sa ulan. Ang saya nak. Masarap sa puso."
Tugon ni Ryan, "awwwww yes mommy ko!! Gawin natin. love you so much and forever"
Ang iba pang nakiayon sa post ni Vice ay sina Jackie Gonzaga, KC Concepcion, Darren Espanto, Alexa Ilacad, Vina Morales, Ogie Alcasid, Eugene Domingo, at Kyline Alcantara.
Read: Ina ni Paolo Tantoco, nagsalita na tungkol sa pagkamatay ng anak