Mainit ang naging reaksiyon ng mga netizens sa inilabas na direktiba na nagre-require sa ilang empleyado ng Department of Transportation (DOTr) na mag-commute once a week.
Ang sabi mismo ni DOTr Acting Secretary Giovanni Lopez, maigi raw kung mararanasan mismo ng officials—partikular ang mga nasa road at rail sectors—ang pagko-commute.
Aatasan din silang magsumite ng report, pati na rin recommendations at action plans, kung paano ma-i-improve ang public transport system.
“Yung mga ibang opisyal naman sa ibang sectors, hinihikayat din nating mag-commute dahil ito lang talaga yung paraan para makita at madama firsthand kung ano ba ang hirap na nararanasan ng mga commuters,” hayag ni Lopez.
NETIZENS REACT
Sinang-ayunan ng ibang netizens ang direktibang ito.
Heto ang isa sa mga komento: “Tama naman, no. Kayo ang nag-e-encourage sa mga tao na mag-public or mass transport para maibsan ang traffic pero karamihan sa inyo may sariling kotse. So dapat sa inyo talaga nagmumula ang model na kung anong dapat gawin ng mga tao.”
May isa namang nagbigay ng mungkahi: “Try niyo rush hour para makita ninyo sitwasyon ng ganung oras. Para maranasan niyo makipagsiksikan at maipit."
Susog ng isa pa: “Monday umaga, Friday hapon.”
Nais tumbukin ng netizens ang oras kung kailan kasagsagan ng traffic dahil sa pagpasok at pag-uwi ng mga commuters mula sa trabaho o eskuwela.
Magkahalong duda at hamon ang mensahe ng isang netizen.
“Sige nga kung totoo yan, dapat yung may bagyo at baha para feel nila ang uncomfortable situation at mararanasan nila ang hirap ng mga maliliit na mga Filipino. Ipakita sa publiko na talaga pumapasok sila naka-jeep, tricycle, at bus.”
Sa kabilang banda, may mga hindi natuwa sa inisyatiba ng DOTr.
Katuwiran ng isang netizen, hindi pa raw ba sapat ang mga hinaing ng milyun-milyong commuters tungkol sa masamang lagay ng transport system sa bansa?
Aniya: “Need nyo pa talaga ng DATA from Usecs, Asecs, Directors???
“HINDI ENOUGH DATA yung observations, experiences ng ordinaryong mga Pilipino???”
Banat pa niya sa DOTr: “Ganun sila ka-detached sa experiences ng ordinaryong Pilipino na kelangan may MEMO.”
Ang mungkahi naman ng isang netizen, ang matataas na opisyal ng ahensiya ang dapat mag-commute.
“Dapat yung mga opisyales or matataas na posisyon ng ahensiya nyo ang pag-obligahin mo! Yung mga ordinaryong kawani mo sanay yan malamang mag-commute!!! Papogi ka lang eh.”
Read: Digital copies of birth, marriage, death certificates
Halos ganito rin ang sentimyento ng ibang netizens.
“Yan tama yan. Lalo na mga director, undersecretaries, division chiefs. Sila-sila kasi yung mga may [transportation] service at mga may drivers. Sila-sila din yung may authority na magpasa ng mga policies at mga projects sa ahensya.
“Paano nga naman malalaman kung tamang programa yung i-implement kung mismong mga pumipirma dito hindi alam yung sitwasyon sa ground?”
Pagsang-ayon ng isa pa, “Agree! For sure mga rank and file employees nagko-commute talaga yan.”
May mga nakukulangan naman sa once a week na pagko-commute ng DOTr officials, dahil kalbaryo ito ng ordinaryong empleyado araw-araw.
“Once a week? How about normal Filipino commuters who travel every single day? This is a good initiative, but they should be made to experience it as well."
Read: New Kamuning footbridge and busway to rise in December 2025
Sang-ayon ang iba na kulang ang once a week.
“DOTR, the depth of the transportation problem can’t be viewed by the government once a week. Government officials regardless of rank and department should take the public transport every day.”
Agree ang isang netizen sa ordinansa, pero dapat daw ay walang daya ang gagawing pag-commute ng DOTr officials.
“Yes. Ganyan dapat. Pero dapat hindi naka-special lane, ha. As in pumila sila. Makisiksikan. Maipit. Mainitan.”
Ang komento ng isa pa, “No Grab please… puwede mag-Angkas para maranasan niyo naman.”
Read: 911 emergency hotline set to launch on September 11
DOTR SECRETARY SHOCKED by daily struggles of COMMUTERS
Mismong si Acting DOTr Secretary Lopez, aminado na mala-impiyerno at mala-giyera ang pagko-commute matapos niyang personal na subukan ito noong Lunes, September 15, 2025.
“I think it’s like we’re in a war. It’s like a war… everyone’s chasing the bus to ride on,” pahayag ng kalihim sa panayam niya sa DZMM nitong Martes, September 16.
Nagdetalye pa si Lopez tungkol sa kanyang nasaksihan at naranasan.
Ang bus ay may seating capacity na 50, pero sabi ni Lopez umabot daw sa tinatayang 90 ang sumakay dahil na rin sa dami ng mga pasahero.
Sambit niya, “A punishment. Quite difficult. Exhausting."
Binanggit din niyang “quite chaotic” ang senaryo at kulang daw ang ratio ng pampasaherong sasakyan sa bilang ng commuters.
Kaya kumbinsido siyang akma ang inilabas niyang memo na inoobliga ang DOTr officials na mag-commute isang beses sa isang linggo.
“I want my colleagues to also feel that the reports being given are not true. And you need to feel it. What is heard and said are different; what is seen and felt are also different,” ani Lopez.
Batay sa kanyang mga pahayag, masasabing nagulat, nauga, at na-shookt si Lopez sa ginawa niyang pagko-commute.
Samantala, ang senaryong nakita niya ng isang beses ay araw-araw na nararanasan ng mga commuters kaya umabot na sa puntong pangkaraniwan na lamang sa kanila ang ganitong mga eksena.
Ang susunod na tanong: Magkaroon kaya ng epektibong action plans ang DOTr para maibsan ang problema ng mga commuters?