Libu-libong mamamayang Pilipino ang nakiisa sa mga rally na ginanap sa Luneta Park sa Manila, People Power Monument sa Quezon City, at sa iba pang bahagi ng bansa nitong Linggo, September 21, 2025.
Iba’t ibang sektor ng lipunan ang nagsama-sama sa kalsada upang ipabatid sa gobyerno at sa mga nasa puwesto ang isang mensahe: Dapat managot ang mga sangkot sa malawakang korapsiyon sa Pilipinas.
Kanya-kanyang isip ng paraan ang mga tao kung paano nila ipapahiwatig ang nararamdaman.
May mga gumamit ng effigies at costumes; may mga nag-chant; may mga sumigaw; at ang pinakakaraniwan, may nagtaas ng banners, slogans, at placards.
May seryoso at mayroon ding gumamit ng humor sa mensaheng ibinandera nila sa placards.
Pero iisa ang layunin ng mga ito: Ang kalampagin ang gobyerno.
Read: Viral "Fishball Warrior," tumakbong mayor ng Maynila
WITTY SLOGANS
Agaw-eksena ang mga bitbit na placards ng ilang dumalo sa rally.
Sa kabila ng seryosong usapin, nailabas ng ilan sa kanila ang wit at creativity para makapukaw ng pansin.
Komento nga ng isa, litaw na litaw ang “Pinoy humor."
Dugtong ng isa pang netizen, “Yung galit ka pero witty ka pa rin."
May humirit ng: “Yung feeling na galit ka pero kailangan mong pakalmahin yung tinatanong mo baka hindi sumagot.”
Marahil ang pinakasikat na satire na ginamit ng marami sa rally ay ang naging birthday wish ng Kapuso journalist na si Kara David.
“Sana mamatay lahat ng kurakot sa Pilipinas,” saad ni Kara sa kanyang 52nd birthday kamakailan.
Ginamit ng maraming ralyista ang pahayag na ito ni Kara sa paggawa ng kanilang placards.
Narito ang ilan sa kanila:
“Pauna na lang po ang birthday wish ni Ms Kara David."
“Birthday wish ni Kara D. sana matupad."
“Sana matupad na ang wish ni Kara David."
“Lord! Dinggin mo ang wish ni Kara David."
Hindi nagpahuli ang isang babaeng nakasakay sa motorsiklo at may bitbit na tarpaulin, kung saan may nakasulat na:
“Sana madinig nila tayo! Pero kung hindi nila tayo maririnig, nawa’y matupad yung wish ni Ms. Kara David.”
Hindi rin pinalagpas ang mga sumikat na dialogues sa mga pelikula.
“Wag mo ‘ko ma-Terry-Terry…Yung tanong ko sagutin ninyo. San nyo dinala ang pondo ng bayan???”
Halaw ito sa dialogue ni Maricel Soriano sa 1994 film, Minsan lang Kita Iibigin.
Ang linya naman ni Piolo Pascual sa Starting Over Again (2014):
“I deserve an explanation!!! I deserve an acceptable reason!!! Sa’n nyo dinala ang bilyong bilyong pisong kinamal mula sa pera ng taumbayan???”
May placard din ang Kapamilya singer na si Darren Espanto, at ang nakasulat dito ay hango sa linya ni Kathryn Bernardo sa pelikulang The Hows of Us (2018).
Ang dialogue na ito ni Kathryn ay in-edit, nilapatan ng musika, at sumikat sa TikTok.
Saad sa placard ni Darren na may picture ni Kathryn: “Pagod na pagod na pagod na pagod na pagod na ang mga Pilipino."
Gumawa rin ng slogan batay sa mga trends na sumikat sa TikTok tulad ng Jet2 Holiday promo ad.
Mababasa sa hawak na placard ng ilang nakilahok na estudyante, “Nothing beats a taxpayer funded holiday.”
At siyempre, hindi mawawala ang masang humor ng mga Pilipino.
May nagsulat sa placard na pang-date raw sana; may isa pa na nagsulat na pangnood daw sana niya iyon ng SB19 concert.
Pero panalo at hard-hitting ang humor ng nagsulat sa placard na ito (published as is): “40 cars??!? Kapatid ko nga tatlo lang brief!!”
Ang banat na ito ay patama rin sa tinatayang 40 luxury cars ng contractor na si Sarah Discaya, na umano’y nabigyan ng bilyun-bilyong piso para isagawa ang anomalous flood-control projects ng Department of Public Works and Highways.
May mga placards ding gumamit ng wit na patungkol sa baha at tax.
Narito ang iba pang placards:
Read: NETIZENS REACT: Vice Ganda, Cardinal David’s views on death penalty
SERIOUS MESSAGES
Hindi rin mawawala ang mga mas seryosong mensahe.
Mga panawagang sapul sa mga kinauukulan:
“Ibalik niyo ang pera ng taumbayan,” mababasa sa placard na bitbit ni Donny Pangilinan.
Ayon sa placard naman ng isang ralyistang dumalo na binalot ng putik ang katawan, “Hirap maging mahirap."
Speaking of pera at hirap, mababasa sa isa pang placard: “Pera namin galing hirap, pera niyo galing sa mahihirap!”
Kuhang-kuha nito ang panawagan ng taxpayers na dugo at pawis ang puhunan sa pagtatrabaho para kumita, pero ang ibinabayad pala nilang buwis ay binubulsa ng mga kurakot.
Sapul ang mensahe ng isang ralyisita: “Lunod na kami sa baha, kayo sa pera.”
Hopeful naman ang bitbit na placard ng isang female rallyist.
Anito: "When the waters rise, so must we!”
Marami rin ang may hugot pero may katotohanan ang itinaas na placard, gaya ng placard ng isang male rallyist.
Sabi rito (published as is): “When the rich rob the poor it’s called business. When the poor fight back its called violence.”
On point naman ang maiksing mensahe ng isang babaeng nakisali sa rally: “The fact that we are here means you’re doing your job wrong!”
Ang kapirasong papel na hawak ng aktres na si Maris Racal ay may iilang salita, pero malinaw ang mensaheng ipinaparating nito.
Ang panawagan niya: “Lahat ng korap, dapat managot.”
Iba-iba ang paraan ng pagpapahayag ng mga dumalo sa rally tungkol sa isyu ng korapsiyon.
Mayroong mahinahon, meron ding nagngingitngit sa galit, ang iba nga idinaan sa mas marahas na paraan.
Pero sa kabila ng mga pagkakaibang ito, malinaw ang mensahe na nais nilang iparating—nakakatawa man o seryoso ang nakasulat sa bitbit nilang placards.
Nais nilang managot ang mga korap na opisyal at matigil na ang malaking problema sa korapsyon sa bansa.