Trigger warning: Mention of attempted suicide, self-harm
Bida si Charlie Dizon sa horror film na Near Death kunsaan tinalakay ang mga temang tungkol sa suicide, depression, at paranormal experience.
Bida sa pelikula si Charlie bilang Julia at co-star niya si RK Bagatsing bilang Lukas.
Nakapanayam ng PEP.ph (Philippine Entertainment Portal) sina Charlie at RK sa red-carpet premiere ng pelikula noong October 19, 2025, sa Cinema 3 ng SM North The Block.
Dito tinanong ng PEP si Charlie kung nakaranas siya ng near-death experience,
"Sa awa po ng Diyos wala pa naman po. Opo, hindi pa po umabot sa ganun," umpisang pahayag ni Charlie.
Dumanas man daw siya ng malungkot na bahagi ng kanyang buhay, hindi raw siya umabot sa puntong na-depress siya.
"Hindi ko rin masabi na depressed ako nun kasi hindi naman ako nagpa-diagnose po. Hindi naman po umabot din sa suicidal thoughts, iyon.
"And iyon din yung gusto ko sanang iparating sa lahat, na sana mas maging kind yung mga tao sa isa't isa."
CHARLIE DIZON ON IMPORTANCE OF KINDNESS
Ibinahagi ni Charlie ang natutunan niya mula sa role niya bilang Julia, na base sa trailer ay dumaan sa attempted suicide.
"Kasi tulad ni Julia, yung pinagdaanan niya, triny naman niya. Triny niyang bumangon kahit after nung suicidal ano niya, incident, di ba?
"Triny niya lahat, pero yun, may mga hindi naniwala sa kanya. Nag-try siyang humingi ng tulong.
"So sana sa susunod na tayo, halimbawa, maka-experience ng ganun or may humingi sa atin ng tulong, iyon po sana makinig talaga tayo.
“Kahit yun lang, yung presence na makinig tayo, ibang klase na yan."
RK Bagatsing on
Sa parte naman ni RK, may pagkakataong muntik na raw siyang sumuko sa buhay.
"May mga moments na ganoon and naramdaman ng mga tao sa paligid ko and nag-offer sila ng tulong at humingi din ako ng tulong," ani RK.
Wala naman daw siyang karanasang paranormal o engkuwentro sa multo.
Pagdating sa pelikula, binanggit ni RK na may eksena kunsaan dumulog ang karakter ni Charlie sa Diyos.
"So gusto ko yung ginawa ni Julia sa dulo, kung may mga taong hindi naniwala sa kanya.
"But at the end of the day, parang humingi siya ng tulong sa Itaas.
"In a way, mas gumaan yun, kasi napaka-powerful na. Sobrang powerful nun."
Ang Near Death ay dinirek ni Richard Somes. Ang iba pang cast members ay sina Xyriel Manabat bilang Mia, Soliman Cruz bilang Mang Celso, at Lotlot de Leon bilang Salve.
Kasali ang Near Death sa Sine Sindak Film Festival sa mga SM Cinemas.
Mula sa Diamond Productions, CMB Films at RVS Studios, ang Near Death ay mapapanood sa mga sinehan simula October 29, 2025.
Read: Xyriel Manabat: "Nagkaroon ako ng near-death experience."