Cinema ‘76 Cafe ang pangalan ng microcinema na may coffee shop, na currently located sa Terraces Bldg., Morato Avenue corner Sct. Borromeo Street, Quezon City.
Meron ding Facebook page na Cinema ‘76 Film Society, na umabot sa 309K ang followers.
Bakit kamo Cinema ‘76?
Bakit hindi hindi ‘75, ‘77 o kung ano man?
Ito ay dahil ang 1976 ay itinuturing na golden year o ginintuang taon ng Philippine cinema.
Read: PEP Troika’s Choice: Most Noteworthy Films of 2025
Ayon sa Internet Movie Data Base (IMDB), 170 pelikulang Pinoy ang ipinalabas sa mga sinehan noong 1976.
Marami-rami sa mga pelikulang iyan ang socially relevant, o makabuluhan sa kasaysayan ng local movie industry.
Noon ay apat na taon na ang batas militar sa bansa, at hindi pa uso ang internet at cellphone.
Hindi pa rin uso ang mga mall, bagkus ay naglipana ang mga stand-alone cinemas.
Dalawa o tatlong pelikulang Pinoy ang ipinapalabas tuwing Miyerkules sa mga sinehan sa Kamaynilaan.
Puwede noong pumasok kahit anong oras sa sinehan, kahit kalagitnaan ng screening.
Puwedeng ulitin iyon nang ilang beses.
Puwedeng umupo saanman, sa balcony or orchestra.
Sa mga probinsya ay uso pa ang double program — dalawang pelikula ang halinhinang ipinapalabas kada araw. Minsan nga, triple program pa.
Mainit noon ang rivalry nina Nora Aunor at Vilma Santos.
Nakaungos si Ate Guy sa taong iyan dahil sa dalawang natatanging pelikula niya — Tatlong Taong Walang Diyos at Minsa’y Isang Gamu-gamo.
Noong sumunod na taon ay nagpakitang-gilas naman si Ate Vi sa kontrobersiyal na Burlesk Queen, sa direksyon ni Celso Ad. Castillo.
Noong 1976 inilunsad sa pagiging ganap na bituin sina Charo Santos, Alma Moreno, Rudy Fernandez, Daria Ramirez, Trixia Gomez, at Orestes Ojeda.
Noon din ipinalabas ang unang feature film na idinirek nina Mike de Leon at Mario O’Hara.
Ang unang Gawad Urian ay 1977 ginanap, kung saan pinarangalan ang achievements sa local movie industry noong 1976.
Read: PEP Troika's Choice: Most Noteworthy Lead Performances of 2025
INSIANG
Ang unang pelikulang Pilipino na ipinalabas sa Cannes filmfest.
Kinunan sa Tondo, Manila. Ang imahe ng Tondo sa pelikula ay taliwas sa “the true, the good, and the beautiful.”
Isa sa sampung kalahok sa 1976 Filipino Film Festival (2nd edition ng Metro Manila Film Festival o MMFF) ang Insiang na idinirek ni National Artist Lino Brocka.
Sa Gabi ng Parangal ay nagwagi ito sa apat na kategorya — best actress (Hilda Koronel), best supporting actress (Mona Lisa), best supporting actor (Ruel Vernal), at best cinematography.
Iconic ang confrontation scene sa may sukdulan ng kuwento. Nagpaplantsa si Insiang nang uriratin ng inang si Tonya kung may relasyon ba ito kay Dado.
Sa 1st Gawad Urian, best supporting actor si Ruel Vernal for this film.
Sa 25th FAMAS Awards, best supporting actress si Mona Lisa.
GANITO KAMI NOON… PAANO KAYO NGAYON?
Isa sa sampung kalahok sa sampung araw na 1976 Filipino Film Festival (2nd MMFF) noong Disyembre 25, 1976-Enero 3, 1977.
Period drama film na ang setting ay pagtatapos ng Spanish colonization noong 1896-1898, at pag-uumpisa ng American colonization sa Pilipinas noong 1899-1901.
Bida si Christopher de Leon bilang naive indio na si Kulas, umibig kay Diding na ginampanan ni Gloria Diaz.
Sa (mis)adventures ni Kulas, natanto niya ang kanyang pagkakakilanlan bilang lalaki at bilang Pilipino.
Sa Gabi ng Parangal ng MMFF 1976 ay anim na tropeyo ang nakamit — best film, best director (National Artist Eddie Romero), best actor (Christopher de Leon), best screenplay, best music, at best art direction.
Co-stars nina Christopher at Gloria sina Eddie Garcia, Leopoldo Salcedo, Dranreb Belleza, Rosemarie Gil, Tsing Tong Tsai, Jimmy Fabregas, Johnny Vicar, E. A. Rocha, at Odette Khan.
Sa 1st Gawad Urian ay pinarangalan itong best picture, best director, best screenplay, at best production design.
Sa 25th FAMAS Awards, for this movie ay best actor si Christopher, at best supporting actor si Leopoldo Salcedo. Wagi rin ito bilang best musical score.
Read: PEP Troika's Choice: Best Performances in Supporting Roles of 2025
TATLONG TAONG WALANG DIYOS
Three Years Without God ang international title ng World War II drama, na kinunan ni Direk Mario O’Hara sa Majayjay, Laguna.
Tampok dito si National Artist Nora Aunor bilang dalagang si Rosario, Christopher de Leon bilang Japanese-Filipino army officer na si Masugi, at Rafael Roco Jr. (na naging Bembol Roco ang screen name later on) bilang army guerilla fighter na si Crispin.
Puwede rin daw na ang international title nito ay "Three Persons Without God."
Prinodyus ito ng NV Productions ni Nora. Ang tunay na pangalan ng Superstar ay Nora C. Villamayor.
Nagwaging best actress si Nora sa 1st Gawad Urian at 25th FAMAS Awards sa pagganap niya rito.
Ito ang unang best actress trophy ni Nora sa FAMAS.
MINSA’Y ISANG GAMU-GAMO
Dalawang tropeyo ang nasungkit ng Minsa’y Isang Gamu-gamo ni Lupita Aquino-Kashiwahara — best editing at best story — sa 1976 Filipino Film Festival.
Bida rito si National Artist Nora Aunor, at dito niya inusal ang dialogue na, “My brother is not a pig. My brother is not a pig! Ang kapatid ko’y tao! Hindi baboy-damo!”
Co-stars ni Nora sa movie sina Jay Ilagan, Gloria Sevilla, Perla Bautista, Eddie Villamayor, Paquito Salcedo, Lily Miraflor, Leo Martinez, Luz Fernandez, at German Moreno.
MAGANDANG GABI SA INYONG LAHAT
Noong taon ding iyon ipinalabas ang horror movie ni Nora Aunor na idinirek din ni Lupita Aquino-Kashiwahara.
Co-stars naman dito ni Ate Guy sina Tirso Cruz III, Imelda Ilanan, Cristina Reyes, Butz Aquino, Romy Mallari, Virginia Montes, at Bebong Osorio. Introducing dito si Val Iglesia.
Sa 25th FAMAS Awards ay wagi itong best picture, best director, best screenplay, best story, at best editing.
ITIM (The Rites of May)
Gothic supernatural horror, na feature film directorial debut ni Mike de Leon.
Tampok sina Charo Santos at Susan Valdez sa kanilang acting debut.
Nasa cast din sina Tommy Abuel, Mario Montenegro, Mona Lisa, at Moody Diaz.
Ang setting ay Semana Santa.
Nagsyuting ito sa ancestral home ng pamilya ni Direk Mike sa San Miguel, Bulacan.
Sa 1978 Asian Film Festival ay nagwagi itong best picture, at tinanghal si Charo na best actress.
Sa 1st Gawad Urian, wagi ito sa mga kategoryang best cinematography, best music, best editing, at best sound.
Sa 25th FAMAS Awards, panalo ito bilang best sound, best cinematography, at best production design.
Read: Pinoy TV Shows That Ranked No. 1 on Netflix PH (2023–2025)
SAKADA
Socio-realist film ni Behn Cervantes, tampok sina Robert Arevalo, Hilda Koronel, Pancho Magalona, Gloria Romero, Rosa Rosal, Joseph Sytangco, at Rafael Roco Jr.
Tinalakay ang mga paghihirap ng mga trabahador sa sugarcane plantation.
Ayon sa Wikipedia, “The movie spent three weeks in theaters before Philippine dictator Ferdinand Marcos ordered the military to seize copies of the film. The director was also arrested under the order of Marcos.”
LIGAW NA BULAKLAK
Breakout film ni Alma Moreno, sa direksiyon ni National Artist Ishmael Bernal.
Co-stars ni Alma sina Vic Silayan, Marissa Delgado, Anita Linda, Jun Mariano, at bomba star na si Yvonne.
Matapos mag-hit ang Ligaw na Bulaklak ay sunud-sunod na ang mga pelikula ni Alma na bida siya — above the title ang billing.
Kabilang diyan ang Kung Bakit May Ulap Ang Mukha ng Buwan, Mrs. Eva Fonda, 16, Walang Karanasan, Ay, Manuela, Bakit Ako… Mahihiya?, Hinog sa Pilit, Markadong Anghel, at Fantastika vs. Wonderwoman.
Para sa Ligaw Na Bulaklak, wagi sa 1st Gawad Urian bilang best actor si Vic, at best supporting actress si Yvonne katabla si Maya o Mitch Valdes para sa LUNES, MARTES, MIYERKULES, HUWEBES, BIYERNES, SABADO, LINGGO, na idinirek ni National Artist Lino Brocka.
BITAYIN SI… BABY AMA! (TERROR OF MUNTINLUPA)
Breakout film ni Rudy Fernandez, sa direksiyon ni Jun Gallardo.
Pinilahan sa takilya, kaya nasundan ito ng dalawa pang pelikula that year na sina Alma at Rudy ang bida sa direksyon ni Jun Gallardo — Ikaw… Ako, Laban sa Mundo at Usigin ang Maysala.
Strike while the iron is hot, ikanga.
Sa tatlong pelikulang iyan, pagdating sa billing ay mas una ang pangalan ni Alma kesa kay Rudy.
Namukadkad noon ang pag-iibigan nina Ness at Daboy, at ang bunga ay si Mark Anthony Fernandez.
LORD, GIVE ME A LOVER
Launching film ni Daria Ramirez, sa direksiyon ni Arsenio Bautista.
Kuwento ng isang babaeng tila may sumpa sa pag-ibig. Ang mga nagmahal sa kanya ay namamatay.
Co-stars sina George Estregan, Eddie Garcia, Perla Bautista, at Roberto Talabis.
Read: Hubadero 2025: From Tease to Total Reveal—Male Celebs Who Bared
Si Daria ang ikaapat sa pitong mga aktres na magkakasunod na inilunsad ng movie producer na si Jesse Ejercito ng Crown Seven Film Productions o Seven Star Productions.
Naunang ilunsad ni Papa Jesse ang career nina Elizabeth Oropesa sa Huwag Pamarisan! Mister Mo, Lover Boy Ko (1975) directed by Ishmael Bernal; Chanda Romero sa Sa Kagubatan ng Lungsod (1975) directed by Arsenio Baurista; at Alma Moreno sa Ligaw na Bulaklak (1976) directed by Ishmael Bernal.
Ang mga sumunod pang pinagbida ni Papa Jesse ay sina Lorna Tolentino sa Miss Dulce Armor, Ina (1978) directed by Manuel Cinco; Beth Bautista sa Huwag! Bayaw (1979) directed by Manuel Cinco; at Amy Austria sa Nang Bumuka ang Sampaguita (1980) directed by Ed Palmos.
Ligwak sa lipon na iyon ng Seven Stars si Janet Bordon, na inilunsad ng Crown Seven sa Ako Si Emma, Babae! (1977) directed by Augusto Buenaventura. Sumemplang ito sa takilya.
Ang relaunching film ni Janet na Biyak na Manyika (1979) ay prinodyus ng Agrix Films. Ang direktor ay si Emmanuel H. Borlaza.
NUNAL SA TUBIG
Idinirek ni National Artist Ishmael Bernal, tampok sina Daria Ramirez, George Estregan at Elizabeth Oropesa.
Inspired nito ang 1998 film na Sa Pusod ng Dagat ni National Artist Marilou Diaz-Abaya, starring Jomari Yllana, Elizabeth Oropesa, Chin Chin Gutierrez, LJ Moreno, Jhong Hilario, and Apple Zuñiga na nakilala rin bilang Ellie Rose Apple at Nini Jacinto.
ANG BOYFRIEND KONG BADUY
Launching film ni Orestes Ojeda, sa direksyon ni Joey Gosiengfiao.
Co-stars sina Amalia Fuentes, Alona Alegre, Gina Pareño, Barbara Perez, at Helen Gamboa.
INDAY GARUTAY
First starring role ni Trixia Gomez, sa direksiyon ni Elwood Perez.
Ang karakter ni Trixia ay magtutulya sa umaga, kubradora sa tanghali, baylarina sa gabi.
Blurb sa poster: “Ang mga kasawian ko sa buhay ang siyang nagtulak sa akin dito… ang Inday na inyong pangarap at Inday na marumi, lublob sa putikan.
“Sige pagtawanan n’yo ako. Matahin n’yo ko. Yurakan n’yo ang pagkatao ko… alam kong nagpunta kayo rito para pamukhaan ako!”
Read: Filipino actors alleged to use prosthetic penis in movies
Co-stars sina Anita Linda, Marissa Delgado, Rez Cortez, Marlon Ramirez, Rico J. Puno, at Vivian Velez.
BATO SA BUHANGIN
Ikalawang pagtatambal nina Fernando Poe Jr. at Vilma Santos, sa direksyon ni Pablo Santiago.
Nagwagi ng best theme song sa 24th FAMAS Awards.
Matagumpay ang unang tandem nina FPJ at Ate Vi sa Batya’t Palu-palo (1974) na si Pablo Santiago rin ang direktor.
ALAKDANG GUBAT
Noong 1976 din ipinalabas ang pelikulang ito kung saan ang leading lady ni FPJ ay si Marianne de la Riva.
Ito’y sa direksyon ni Armando A. Herrera.
MORTAL
Unang pelikulang idinirek ni Mario O’Hara, na siya rin ang nagsulat. Tumalakay sa mental illness.
Bida si Dindo Fernando. Co-stars sina Lolita Rodriguez, Rosanna Ortiz, at Anita Linda.
Prinodyus ng Cinemanila Corporation na siya ring nagprodyus ng Tinimbang Ka Nguni’t Kulang (1974) at Tatlo, Dalawa, Isa (1974) na parehong idinirek ni Lino Brocka.
Read: Meet the newbies and young standouts of MMFF 2025
FILIPINO FILM FESTIVAL 1976
Setyembre 1975 ginanap ang unang Metropolitan Film Festival, kung saan mga pelikulang Pilipino ang ipinalabas sa mga sinehan.
May mga website na nagsasaad na Setyembre 20 o 21 ito nag-umpisa bilang paggunita sa ikatlong anibersaryo ng martial law (na later on ay tinawag na Thanksgiving Day).
Sa pahina 40 ng coffeetable book na 50 Years of the Metro Manila Festival: Limang Dekada, Sine Sigla sa Singkuwenta, nakasaad na Setyembre 11 nag-umpisa ang naturang filmfest kasabay ng kaarawan ni President Ferdinand E. Marcos Sr.
Best picture ang Diligin Mo Ng Hamog Ang Uhaw Na Lupa na pinagbidahan nina Joseph Estrada at Gloria Diaz.
Ang namahala nito na si Augusto Buenaventura ang best director, at ang bidang si Erap ang best actor. Best supporting actor si Vic Silayan for this film.
Best actress si Charito Solis para sa Araw-araw, Gabi-gabi, at best supporting actress si Nida Blanca para sa Batu-bato Sa Langit (Ang Tamaa’y Huwag Magagalit).
Nang sumunod na taon, ang filmfest ay nag-umpisa ng Disyembre 25, 1976, at tinawag na Filipino Film Festival.
Best picture ang Ganito Kami Noon… Paano Kayo Ngayon? na humamig ng lima pang tropeyo — best director para kay Eddie Romero, best actor para kay Christopher de Leon, best production design, best music, at best screenplay.
Ang Insiang ay nakaapat na tropeyo —best actress para kay Hilda Koronel, best supporting actress para kay Mona Lisa, best supporting actor para kay Ruel Vernal, at best cinematography.
Ang Minsa’y Isang Gamu-gamu ay nakadalawa, best editing at best story.
Ang topgrosser ay ang DATELINE CHICAGO: ARREST THE NURSE KILLER starring Joseph Estrada and Pilar Pilapil.
Ang anim pang kalahok ay sa 1976 Filipino Film Festival:
BAROK nina Chiquito at Trixia Gomez
THE INTERCEPTORS nina Tony Ferrer at Ramon Zamora
KISAME STREET nina Dolphy at Nida Blanca
MAKAHIYA AT TALAHIB nina Vilma Santos at Rudy Fernandez
PUEDE AKO, PUEDE KA PA BA? nina Amalia Fuentes at Romeo Vasquez
THE REBEL HUNTER (True-To-Life Story of Brig. Gen. Romeo Gatan) nina Ramon Revilla Sr. at Boots Anson-Roa
Noong 1977 ay ginawa nang Metro Manila Film Festival ang taguri sa filmfest.
Bale iyon ang 3rd MMFF, at tuluy-tuloy nang Disyembre 25 ang umpisa niyon.
Kontrobersyal sa MMFF 1977 ang Burlesk Queen na humakot ng pitong tropeyo — best picture, best director para kay Celso Ad. Castillo, best actress para kay Vilma Santos, best actor para kay Rolly Quizon, best supporting actor para kay Joonee Gamboa, best supporting actress para kay Rosemarie Gil, at best screenplay.
Box-office hit ang Burlesk Queen, kung saan nag-“change image” si Ate Vi.
Memorable ang kanyang dance of death.
Read: Top 10 Most-Watched VMX Movies of 2025
1st GAWAD URIAN
Best Picture: Ganito Kami Noon… Paano Kayo Ngayon?
Best Director: Eddie Romero (Ganito Kami Noon…Paano Kayo Ngayon?)
Best Screenplay: Eddie Romero at Roy Iglesias (Ganito Kami Noon… Paano Kayo Ngayon?)
Best Actor: Vic Silayan (Ligaw na Bulaklak)
Best Actress: Nora Aunor (Tatlong Taong Walang Diyos)
Best Supporting Actor: Ruel Vernal (Insiang)
Best Supporting Actress: Yvonne (Ligaw na Bulaklak) at Maya Valdez (Lunes, Martes, Miyerkules, Huwebes, Biyernes, Sabado, Linggo)
Best Cinematography: Ely Cruz at Rody Lacap (Itim)
Best Production Design: Laida Lim-Perez at Peque Gallaga (Ganito Kami Noon… Paano Kayo Ngayon?)
Best Music: Max Jocson (Itim)
Best Editing: Mike Jarlego Jr. (Itim)
Best Sound: Ramon Reyes, Sebastian Sayson, at Luis Reyes (Itim)
25TH FAMAS Awards
Ang FAMAS ang nag-iisang award-giving body ng Philippine movie industry mula 1952 hanggang 1976.
Ayon sa Wikipedia, para sa mga pelikulang ipinalabas noong 1976, best picture ng FAMAS ang Minsa’y Isang Gamu-gamo.
Nominado rin ang Ganito Kami Noon… Paano Kayo Ngayon?, Insiang, Itim, at Tatlong Taong Walang Diyos.
Best director si Lupita Aquino-Kashiwahara para sa Minsa’y Isang Gamu-gamo.
Nominado rin sina Eddie Romero para Ganito Kami Noon… Paano Kayo Ngayon?, Lino Brocka para sa Insiang, Mike de Leon para sa Itim, at Mario O’Hara para sa Tatlong Taong Walang Diyos.
Best actress si Nora Aunor para sa Tatlong Taong Walang Diyos. First best actress trophy ito ni Nora sa FAMAS.
Nominado rin sina Pinky de Leon para sa Ang Daigdig ay Isang Patak ng Luha, Hilda Koronel para sa Insiang, Pilar Pilapil para sa May Langit Ang Bawa’t Nilikha, at Alma Moreno para sa Mrs. Eva Fonda, 16.
Best actor si Christopher de Leon para sa Ganito Kami Noon… Paano Kayo Ngayon?.
Nominado rin sina Rudy Fernandez para sa Bitayin Si… Baby Ama!, Vic Silayan para sa Ligaw na Bulaklak, Dindo Fernando para sa May Langit Ang Bawa’t Nilikha, at Tommy Abuel para sa Putik Ka Man… Sa Alabok Magbalik.
Trivia: Mag-asawa sina Nora at Christopher nang kapwa magwagi sa 25th FAMAS Awards. Ang beach wedding nila ay noong Enero 1975 sa La Union. Ang panganay nilang si Ian de Leon ay isinilang noong Disyembre 1975.
Best supporting actor si Leopoldo Salcedo para sa Ganito Kami Noon… Paano Kayo Ngayon?.
Nominado rin sina Dick Israel para sa Escolta, Mayo 13, Biyernes ng Hapon; Ruel Vernal para sa Insiang; Paquito Salcedo para sa Minsa’y Isang Gamu-gamo; at Johnny Delgado para sa Mrs. Teresa Abad, Ako Po Si Bing.
Best supporting actress si Mona Lisa para sa Insiang.
Nominado rin sina Laurice Guillen para sa Lunes, Martes, Miyerkules, Huwebes, Biyernes, Sabado, Linggo; Perla Bautista para sa Minsa’y Isang Gamu-gamo; Gloria Sevilla para sa Minsa’y Isang Gamu-gamo; at Anita Linda para sa Mrs. Teresa Abad, Ako Po Si Bing.
Best child actor si Niño Muhlach para sa Kutong Lupa.
Read: Pinoy and Foreign Movies That Ranked No. 1 on Netflix PH in 2025