Kumilos ang pamunuan ng Metro Manila Rail Transit (MRT) System Line -3 matapos mag-viral ang post ng isang netizen tungkol sa umano’y mga “surot” na nakasiksik sa handrail ng isa sa mga bagon o cars ng transit system.
Sa close-up photo ng netizen sa MRT-3, makikita ang kumpol-kumpol ng maliliit na insektong kulay brown.
Pero hindi sila “surot” kundi ipis.
Mabilis na nag-viral ang post, at maraming netizens ang nagkomento at nanawagang gawan ito kaagad ng paraan.
DOTR CONDUCTS CLEANING, PEST-CONTROL
Ngayong Biyernes, March 6, 2026, naglabas ng official statement ang Department of Transportation (DOTr).
Bukod sa paglilinis ng bagon na may mga insekto, pinagpapaliwanag din ang sanitation service provider na responsable sa maintenance.
“Recently, MRT-3 management was informed of a passenger’s post in a commuter Facebook group reporting the sighting of small cockroaches inside a train car,” parte ng post ng DOTr MRT-3 via Facebook.
“Transportation Secretary Banoy Lopez immediately instructed MRT-3 General Manager Michael Capati to check on this and address it promptly.
“GM Capati readily issued a Notice to Explain (NTE) to Sumitomo Corporation, the maintenance provider of the MRT-3 system.”
Paniniyak ng management, “The concerned train set underwent immediate inspection and disinfection by the maintenance team.”
Sa post ay sinabi rin ng DOTr na regular ang sanitation, disinfection, at pest-control measures sa mga train at stations.
Sa report ni GMA Intergrated News reporter Jonathan Andal, ipinakita ng Sumimoto Corp. kung paano nililinis ang mga bagon.
Base sa video, mabusisi ang mga cleaners. May automatic train washing, vacuum cleaning, pest control, internal cleaning, floor mopping, alcohol disinfection, at exterior train washing.
Pero wala pang paliwanag kung paano namahay ang mga insekto sa loob ng bagon.
