"Dismissed for lack of evidence."
Ito ang desisyon ng Quezon City Office of the City Prosecutor sa reklamong cyber libel ni Mary Liza Diño laban sa tatlong PEP.ph (Philippine Entertainment Portal) editors.
Ito ay sina PEP Editor-In-Chief Jo-Ann Q. Maglipon, PEP Associate Editor Erwin Santiago, at PEP Deputy Managing Editor Rachelle Siazon.
Dismissed din ang reklamo ni Diño laban sa aktor na si Tirso Cruz III, direktor na si Jose "Joey" Javier Reyes, at Atty. Josabeth "Joji" Alonso ng Alonso and Associates Law Offices.
Apat na consolidated complaints para sa 78 counts of cyber libel ang isinampa ni Diño laban sa anim na respondents.
Kaugnay ito ng Nine-Part Investigative Report ng PEP sa mga iregularidad diumano sa panahon ng panunungkulan ni Diño bilang chairperson ng Film Development Council of the Philippines (FDCP).
Si Diño ay naging FDCP chairperson mula Agosto 2016-Hulyo 2022, sa panahon ni Presidente Rodrigo Duterte.
Si Tirso Cruz III ang pumalit sa kanyang FDCP chairperson mula Hulyo 2022 hanggang sa magbitiw ito sa puwesto noong Marso 2024, sa panahon ni Presidente Ferdinand Marcos Jr.
Si Joey Reyes ay technical consultant to the FDCP chair sa termino ni Cruz. Ang director-writer ang pumalit kay Cruz noong Abril 2024, at siya pa rin ang FDCP chairperson sa kasalukuyan.
Si Atty. Joji Alonso ay founder at CEO ng Quantum Film Productions, isang kumpanyang nagproprodyus ng mga pelikula at TV shows. Siya rin ang founder at managing partner ng Alonso and Associates Law Offices, at kilalang lawyer to the stars.
Nakakuha ang PEP ng kopya ng resolusyon ng Quezon City Office of the City Prosecutor noong March 16, 2026.
FISCAL resolves: NO MALICE IN PEP'S FDCP REPORT
Ayon sa Resolusyon: "As the subject of the published online articles is a matter of public interest, the media has the right to report the subject matter as legitimate news.
"The legitimate media has a right to publish such matter under the constitutional guarantee of freedom of the press.
"Respondents Jo-Ann, Erwin, and Rachelle, as entertainment writers and publishers, merely acted on information they received from their source/s about the alleged irregularities governing the tenure of complainant Liza, a public figure, as FDCP Chairperson."
Sabi pa ng Quezon City Office of the City Prosecutor (QC OCP), hindi nakitaan ng "presumption of malice" ang investigative report ng PEP kay Liza Diño.
Ayon pa rin sa Resolusyon: Ang PEP report sa FDCP ay may kinalaman sa "conduct" ni Diño bilang "public official" nang panahong ito ay FDCP chair.
Dapat daw patunayan ni Diño na may "actual malice" ang inilathala ng PEP.
Dapat maipakita nitong inilathala ang impormasyon kahit alam ng PEP editors na ang impormasyon ay mali o kaya nama'y may reckless disregard sa correctness ng information.
Masasabi raw na merong "reckless disregard" kapag ang author o publisher ay may "serious doubt" sa katotohanan ng ulat o kaya'y may "high degree of awareness" ito na mali ang impormasyon.
Niresolba ng Office of the City Prosecutor na bigo si Diño na mapakitang may "reckless disregard" ang editors.
Ayon uli sa Resolusyon: "Complainant Liza submitted no evidence that the respondents wrote and published the online articles to deliberately destroy her reputation."
Iniulat lamang daw ng PEP ang impormasyong naberipika ng mga ito sa "reliable sources" at pinaniwalaan nilang totoo.
"Likewise, there was no evidence that respondents entertained awareness of the probable falsity of their information."
Hindi rin daw napatunayan ni Diño na naglagay ang PEP editors ng sariling "comments, opinions, and conclusions" sa kanilang FDCP report.
Ayon sa Resolusyon: Bagama't hindi daw tinukoy ng PEP sa FDCP report ang sources nito, binanggit ng piskal ang nauna nang court ruling sa ibang kaso, na acceptable sa batas ang "lone source" kahit na "one side of the story" lamang ito, basta mapatunayan ng reporter na ang iniuulat nito ay hindi maling impormasyon.
Ayon pa sa Resolusyon: "Immaterial" ang claim ni Diño na, dahil hindi na siya public official nang ilathala ang PEP report, patunay ito ng malisya ng PEP.
Dahil daw ang mahalaga ay may "public interest" sa isinulat na report ng PEP at maituturing na "privileged communication."
Ayon sa Resolusyon: "If at all, the respondents were motivated to write and publish the online articles not by malice but by their duties as investigative reporters.
"On that pretext, the statements in the published online articles partook of the nature of commentaries on matters of public interest, thus privileged."
Ipinaliwanag din ng piskal na sinuri nito ang mga affidavit ng witnesses sa kampo ni Diño na nakabasa ng published FDCP report sa PEP.
Wala raw sinabi ang mga itong naapektuhan ang kanilang pagtingin kay Liza nang mabasa ang PEP report.
Kaya bigo raw si Diño mapatunayan ang inireklamo nitong "defamation."
Quezon City Office of the City Prosecutor: "Finally, this Office posits that as journalists, respondents Jo-Ann, Erwin, and Rachelle have the privilege to communicate to the public matters of public concern.
"Without proof of actual malice, this Office cannot charge them with Cyber Libel."
Dahil hindi napatunayang dapat kasuhan ng cyber libel ang PEP editors, hindi na raw kailangang pag-usapan pa ang "alleged criminal liabilities" ng iba pang respondents.
"Since a case for Cyber Libel was not sufficiently established against respondents Jo-Ann, Erwin, and Rachelle, this Office need not discuss the alleged criminal liablities of respondents Jose, Tirso, and Josabeth as none exists."
PEP's NINE-PART INVESTIGATIVE REPORT ON THE FDCP
Ang inilathala ng PEP na investigative report, na may siyam na parte, ay ang mga sumusunod, nakalatag ayon sa pagkakasunod ng paglathala, mula May 18-22, 2023:
- #FDCPIssue No. 1: Insiders troubled by ex-chair Liza Diño's "sole control" of millions for film fests, events, grants
- #FDCPIssue No. 2: Liza Diño reprimanded by Tito Sotto for messing with rules and regulations
- #FDCPIssue: Liza Diño refutes "one-woman rule" charge
- #FDCPIssue No. 3: Insiders say Liza Diño's term marked by "crazy," "lavish" spending of millions of public funds
- #FDCPIssue: Liza Diño "surprised" by probe on her chairmanship; says expenses go through check and balance
- #FDCPIssue No. 4: Liza Diño accused of giving favors to partner Ice Seguerra; Ice earns from FDCP projects close to P1M
- #FDCPIssue: Liza Diño says she gave jobs to Ice Seguerra to "save costs"; Ice accepted them "out of love"
- #FDCPIssue No.5: Did Liza Diño attempt to delay Tirso Cruz III's takeover of chairmanship?
- #FDCPIssue: Liza Diño denies derailing Tirso Cruz III's FDCP chairmanship
LIZA DIÑO'S CYBER LIBEL ALLEGATION
Sa resolusyon ng Quezon City (QC) Office of the City Prosecutor (OCP), isinuma ang "facts" ayon sa sinumpaang salaysay ni Liza Diño.
Idinemanda ni Diño ang PEP—pati na sina Cruz, Reyes, at Alonso—para sa five out of nine parts ng PEP investigative report.
Reklamo niya, naglalaman iyon ng 78 counts ng "defamatory remarks" na nagpapahiwatig na may "graft and corruption, malversation of public funds, and usurpation of government powers" sa panunungkulan niya bilang chairman.
Malisyoso umano ang pagpapalabas ng PEP na siya ay "incompetent, wasteful, profligate, spendthrift in handling public funds" at naging "one-woman rule" ang kanyang tenure,
Diin niya, hindi maituturing na "fair and true report and made in good faith" ang ulat ng PEP.
Ayon kay Diño:
- Sinadya ng PEP na i-sensationalize ang FDCP report nang gawin iyong "five-part series."
- "Unverified" ang report dahil "anonymous" ang sources.
- Sinadya na hindi isama ang kanyang sagot sa e-mail ng PEP nang tanungin siya sa isyu.
- Itinaon ang "timing" ng paglathala ng report para magkaroon ng "maximum damage" sa kanyang reputasyon habang siya ay nasa Cannes Film Festival sa France.
- Kinukuwestiyon din niya kung bakit ginawan ng ulat ang FDCP chairmanship niya gayong wala na raw siya sa puwesto.
Katuwiran ni Diño, kahit pa raw mukhang "investigative journalistic piece" ang FDCP report ng PEP, hindi raw ito protektado ng "privilege communication" na ibinibigay ng batas sa "hard-hitting news institutions."
Kumpara raw sa mga nasabing institusyon, ayon kay Diño, "showbiz website and entity" ang "nature" ng PEP.
Para kay Diño, hindi investigative report ang PEP FDCP report kundi "communication plan" laban sa kanya.
"This is not a work of a truly journalistic endeavor but a work often done by public relations instrumentalities," saad pa ni Diño sa kanyang sinumpaang salaysay.
Samantala, idinawit niya sa cyber-libel complaint sina Tirso Cruz III at Atty. Joji Alonso.
Nakipagsabwatan umano ang mga ito sa PEP para sa inilathalang nine-part investigate report tungkol sa FDCP.
Nakita raw sa e-mail thread ang mga pangalan nina Cruz at Alonso na nag-approve umano ng release ng "confidential FDCP documents" na ginamit na basehan ng investigative report ng PEP.
Nakuha raw ni Diño ang screenshot ng e-mail thread mula sa isang "anonymous" sender.
Inireklamo rin ni Diño ng cyber libel si Joey Reyes dahil ang beteranong direktor daw ang nagparating sa PEP sa insidente sa Cannes Film Festival na sangkot si Diño at executive assistant nito.
Nabanggit daw iyon sa ulat ng PEP, at nakadagdag sa ani Liza ay paninirang-puri sa kanya.
PEP says NO ELEMENTS OF CYBER LIBEL exist IN REPORT
Sa resolusyon ng Quezon City Office of the City Prosecutor, isinuma rin ang "facts" ayon sa sinumpaang salaysay ng PEP.
Idinetalye ng PEP ang masusing proseso na dinaanan sa pagkalap, pagsiyasat, at pagbuo ng investigative report.
Mula simula ay siniguro ng PEP editors na sina Jo-Ann Maglipon, Erwin Santiago, at Rachelle Siazon na anumang impormasyong ilalathala ay corroborated ng "paper trail" o dokumentong pagbabasehan ng report.
Bawat hakbang din ng PEP ay may konsultasyon at payo mula sa legal counsel nito, si Atty. Sandra Marie “Sandy” Olaso-Coronel ng Yorac Sarmiento Arroyo Chua Coronel & Reyes Law Firm.
Idinetalye ng PEP na nagsimula ang imbestigasyon sa pag-interbyu ng sources noong September 2022, at pagkalap ng mga dokumentong magko-corroborate sa impormasyon ng sources mula September 2022 hanggang May 2023.
Tumagal ng ilang buwan ang pag-draft ng report dahil sa "complexity" ng mga isyu sa FDCP.
Siniguro ng PEP na tugma sa "official receipts" at "service contracts" na isinumite sa Commission on Audit (COA) ang anumang inilabas sa investigative report.
Hindi isinama ng PEP sa FDCP investigative report ang wala pa o kulang pa ang supporting documents, patunay na hindi paninira kundi "fair" ang investigative report at lehitimong impormasyon lamang ang isinama rito.
May 17, 2022 nang makipag-ugnayan ang PEP kay Diño via e-mail para hingin ang panig nito.
Inilathala ng PEP ang sagot ni Diño—at nakahati iyon sa four-part report bilang sagot niya sa five-part series na nagtalakay sa mga isyu ng FDCP sa ilalim ng kanyang chairmanship.
Ito rin ang five-part series na inireklamo ni Diño ng cyber libel.
Nanindigan ang PEP na walang basehan ang cyber-libel complaint ni Diño. Walang malisya at hindi paninirang-puri ang inilabas nitong investigative report. Sa halip, ito ay "fair and true report, made in good faith, without any comments or remarks."
Ipinunto ng PEP na hindi napatunayan ni Diño na inilathala ng PEP ang FDCP report na may paniniwalang mali ang impormasyon mula sa kanyang sources. Hindi rin masasabing inilathala nito ang report nang walang beripikasyon ng mga impormasyon.
Sabi pa ng PEP editors, sa isang bahagi ng sinumpaang salaysay: "We did not make anything up, as we have no reason to.
"We are, in no way, connected to Complainant; and thus have no interest in the state of her reputation.
"Our interest and objective is simply to shed light on the alleged irregularities during her tenure as FDCP Chairperson, as it is our moral and ethical duty to do so as journalists.
"It is also the right of the people to know, as the report touches on public matters and public funds.
"Thus, it cannot be said that the subject article was attended by malice, as in fact there was none."
Read: PEP files counter-affidavit to Liza Dino's cyberlibel complaint
TIRSO CRUZ III CHALLENGES CYBER-LIBEL ALLEGATION
Nakasaad din sa resolusyon ang pagsusuma sa "facts" ayon sa sinumpaang salaysay ni Tirso Cruz III.
Idiniin ni Cruz na "unfounded" ang alegasyon ni Diño na siya ay nakipagsabwatan sa PEP para mailathala ang inirereklamo ni Diño na five-part FDCP report ng entertainment news site.
Alegasyon ni Diño, si Cruz ang nagbigay ng go-signal para mapadalhan ang PEP ng "confidential documents" ng FDCP. Base ito sa sinabi ni Diño na "e-mail thread" na nakitaan ng pangalan nina Cruz at Alonso.
Kinuwestiyon ni Cruz ang "integrity" ng "e-mail thread" na sinasabing nakitaan ng pangalan ng aktor. Wala raw patunay na sa kanya galing iyon.
Sa alleged e-mail, ni hindi rin daw nakasaad ang "nature, content, and sensitivity" ng sinasabing confidential documents.
Wala rin daw nakapaloob sa e-mail thread na magpapatunay na may kinalaman siya sa investigative report ng PEP.
Sinabi rin ni Cruz na lampas na ang prescribed period sa paghain ng reklamo ang cyber-libel complaint ni Diño.
Sa batas ay isang taon ang panahong nakatakda mula mangyari ang isang insidente para maghain ng reklamo kaugnay nito.
May 24, 2024 nagsampa ng reklamo si Diño sa Office of the Prosecutor ng Quezon City, habang ang inirereklamo nitong five-part report ng PEP ay nailathala noong May 18-22, 2023.
Read: Tirso Cruz III, PEP file counter-affidavit to Liza Diño complaint
JOSE JAVIER REYES DENIES INVOLVEMENT with PEP REPORT
Sa resolusyon ng Quezon City Office of the City Prosecutor, isinuma ang "facts" ayon sa sinumpaang salaysay ni Jose "Joey" Javier Reyes.
Pinabulaanan ni Reyes ang alegasyon ni Diño na siya ang nagparating sa PEP tungkol sa insidente sa Cannes Film Festival sangkot si Diño at executive assistant nito.
Tingin ni Diño ay may bahid iyon ng paninirang-puri sa kanya.
Ayon kay Reyes, kalat na sa sirkulo ng FDCP ang sinasabing insidente bago pa niya nalaman ang tungkol dito.
Mali raw ang bintang ni Diño na siya ang nag-leak ng impormasyon sa PEP, at wala raw pruwebang isinumite si Diño upang patunayan ito.
Read: Joey Reyes files counter-affidavit to Liza Diño's complaint
JOSABETH ALONSO REJECTS CYBER-LIBEL ALLEGATION
Sa resolusyon ng Quezon City Office of the City Prosecutor, isinuma rin ang "facts" ayon sa sinumpaang salaysay ni Atty. Josabeth "Joji" Alonso.
Mariing itinanggi ng abogada na pinayagan niyang aprubahan ni Cruz ang diumano'y pagbigay ng mga dokumento ng FDCP sa PEP.
Kontra pa ni Atty. Alonso, hindi naipakita ni Diño sa kanyang reklamo kung paano nasangkot ang abogada sa sinasabing release ng confidential FDCP documents.
Tulad ni Cruz, kinuwestiyon din ni Atty. Alonso ang "integrity, veracity, authenticity" ng e-mail thread na iniuugnay ni Diño sa kanila.
Hindi umano naberipika kung lehitimo ang screenshot ng e-mail, kaya hindi raw iyon maaaring gamiting ebidensiya laban sa kanila.
Kinuwestiyon din ni Atty. Alonso ang petsa ng paghain ng demanda ni Diño na sinabi niyang lampas na sa prescribed period na isang taon mula sa pagkakadiskubre ng isang complainant ang inirereklamong offense.
Punto ni Atty. Alonso, noong May 19, 2023 ay may nailathala nang reaksiyon si Diño sa investigative report ng PEP.
Ibig sabihin nito, noong May 19 ay alam na raw ni Diño ang tungkol sa PEP report.
Taliwas daw iyon sa sinasabi ni Diño na May 25 lamang nito nabasa ang mga artikulo sa PEP, na nailathala mula May 18 - May 22, 2023.
findings of FISCAL: no prima facie evidence
Pagkatapos ng pagsusuma sa mga salaysay ng lahat ng respondents, inilabas ng Quezon City Office of the City Prosecutor (OCP) ang pagsusuri nito sa reklamo ni Liza Diño.
Ang findings ng piskalya: Sang-ayon ito kay Diño na pasok pa sa "prescriptive period" ang paghain nito ng reklamo sa piskal noong May 24, 2024.
Wala raw kasing sapat na katibayan para masabing nabasa ni Diño ang mga artikulo nang mailathala ang mga ito noong May 18 hanggang 25, 2023.
Tinanggap ng fiscal ang paninindigan ni Diño na May 24, 2023 na niya nabasa ang mga ito.
Ayon sa QC Office of the City Prosecutor, masusi nitong pinag-aralan ang "facts and evidence on record" kaugnay ng reklamo ni Diño.
Sa huli, ang findings ng piskalya: "no prima facie evidence with reasonable certainty of conviction" exists para kasuhan ng cyber libel sina Maglipon, Santiago, Siazon, Cruz, Reyes, at Alonso.
Alinsunod ang pag-establish ng "prima facie evidence with reasonable certainty of conviction" sa inilabas na 2024 Department of Justice-National Prosecution Service (DOJ-NPS) Rules on Preliminary Investigations and Inquest Proceedings.
Nakasaad sa probisyon nitong kailangan ng "prima facie evidence with reasonable certainty of conviction" o "quantum of evidence" para irekomendang kasuhan ang respondent sa isang complaint.
Makikitaan daw ng quantum of evidence ang isang reklamo base sa "evidence-at-hand, including but not limited to testimonial evidence, documentary evidence, and real evidence."
Dapat daw ma-establish din na lahat ng elemento ng isang "crime or offense and such evidence, on its own and if left uncontroverted, shall be sufficient to establish all the elements of a crime or offense charged, and consequently warrant a conviction beyond reasonable doubt."
FISCAL FINDS "LACK OF EVIDENCE" IN 4 COMPLAINTS
Sa huli, ibinasura ng Quezon City Office of the City Prosecutor ang apat na consolidated complaints laban sa respondents.
- "Dismissed"ang 20 counts of violation of Articles 353, 354, and 355 ng Revised Penal Code kaugnay ng Section 4, paragraph 4 ng R.A. 10175 na isinampa ni Liza Diño laban kina Jo-Ann Q. Maglipon, Erwin A. Santiago, at Rachelle E. Siazon dahil sa "lack of evidence."
- "Dismissed" ang 21 counts of violation of Articles 353, 354, and 355 ng Revised Penal Code kaugnay ng Section 4, paragraph 4 ng R.A. 10175 na isinampa ni Liza Diño laban kina Jo-Ann Q. Maglipon, Erwin A. Santiago, Rachelle E. Siazon, at Jose Javier Reyes dahil sa "lack of evidence."
- "Dismissed" ang 29 counts of violation of Articles 353, 354, and 355 ng Revised Penal Code kaugnay ng Section 4, paragraph 4 ng R.A. 10175 na isinampa ni Liza Diño laban kina Jo-Ann Q. Maglipon, Erwin A. Santiago, Rachelle E. Siazon, at Tirso Cruz III dahil sa "lack of evidence."
- Dismissed" ang 8 counts of violation of Articles 353, 354, and 355 ng Revised Penal Code kaugnay ng Section 4, paragraph 4 ng R.A. 10175 na isinampa ni Liza Diño laban kina Jo-Ann Q. Maglipon at Rachelle E. Siazon dahil sa "lack of evidence."
Napirmahan ang resolusyon ng Quezon City Office of the City Prosecutor noong March 2, 2026.
Halos dalawang taon ang lumipas mula nang idemanda ni Diño ang anim na respondents.
Apat na beses dinaluhan ng PEP editors ang pagpirma at panunumpa ng kanilang mga kontra-salaysay para sa apat na hiwalay na cyber-libel complaints na isinumite ni Diño sa Quezon City Office of the City Prosecutor.
Humarap din sina Cruz, Reyes, at Alonso sa QC OCP nang sila naman ang maghain ng kani-kanilang kontra-salaysay sa cyber-libel complaint.