Sa edad na 81, aktibo pa rin bilang CEO ng kanyang sugar refinery business ang OPM legend na si Jose Mari Chan.
Siya ang tumatayong chairman at CEO ng Binalbagan Isabela Sugar Company, Inc. (BISCOM) at A. Chan Sugar Corporation.
Saad ng beterano at respetadong singer, "Yes, I'm still active in my sugar business. That's my bread and butter."
Biro naman ng media, grabe ang kasipagan niya kahit milyonaryo na siya.
"No, no, no, no, no. Don't say that," reaksiyon ni Jose Mari.
At pumapasok pa raw siya sa opisina.
"Yeah, I still hold office. I came from the office kanina when I... Yeah, when I came here."
Natawa naman ang veteran singer sa tanong kung pinapatugtog daw ba sa opisina niya ang mga kanta niya.
Ano ang sikreto at kaya pa ng stamina niya ang pag-oopisina?
Rebelasyon ni Jose Mari, "I don't eat pork anymore. I don't eat beef anymore.
"I just eat fish and vegetables, fruits. And then I exercise.
"I walk every morning for about 45 minutes, brisk walk."
At wala pa raw sa bokabularyo niya ang magpahinga.
Aniya, "No, I still enjoy my work and I go to Negros and I, you know... I still enjoy my work."
Sa ngayon daw, ang kanilang factory ang nagpoproseso ng mga tubo para maging asukal.
Aniya, "We don't have sugarcane plantation. We have a central and a refinery.
"So we process the sugarcane from, you know, from the planters."
Sa kanyang mga anak, may sumusunod ba sa mga yapak niya sa larangan ng musika?
Tugon ni Jose Mari: "Well, you know, my sons, they also compose and they sing.
"But, wala na ang mga opportunities. Not like before during my time when Vicor, Dyna, OctoArts would call me and say, 'May mga compositions ka ba, Joe?'
"You know what I mean? Pero wala nang opportunities. So, my sons have compositions but walang outlet."
Nakausap ng PEP.ph (Philippine Entertainment Portal) at ilan pang media si Jose Mari sa presscon ng upcoming concert niyang Afterglow: Seasons of the Heart noong nakaraang linggo.
Read: Jose Mari Chan on his “sleeping” ABS-CBN stocks, ABS-CBN shutdown
JOSE MARI CHAN ON HIS TALENT FEE: VERY CHEAP
Marami ang nag-iisip na mahal ang talent fee ng isang Jose Mari Chan sa projects o invitations sa kanya para sa isang performance.
Paglilinaw ng music icon, hindi siya mahal maningil at minsan ay ginagawa niya itong libre lalo na pag charity works.
Sabi niya, "No, no, no. Very cheap. Sometimes I do it for free to help raise funds for orphans. I'm very easy to approach."
At naging tradisyon na nga na tuwing papasok ang BER months, mukha niya ang nakalagay sa memes sa social media.
"Because of my Christmas songs," pakli niya.
Kumanta pa nga si Jose Mari ng ilang linya sa sikat na kanta niyang "A Perfect Christmas."
"My idea of a perfect Christmas is to spend it with you, in a party or dinner for two, anywhere will do."
Ang isa pa sa pinakasikat niyang Christmas song ay "Christmas in our Hearts."
Samantala, tampok si Jose Mari sa Afterglow: Seasons of the Heart concert na gaganapin sa darating na July 11, 2026, sa PICC Plenary Hall.
Makakasama niya rito sina Kolette Madelo ng Pinoy Big Brother Gen 11, "Tawag ng Tanghalan" champion Lyka Estrella, at "Tawag ng Tanghalan" 1st Duet Grand Champion at Your Face Sounds Familiar grand winners na sina JM dela Cera at Marielle Montellano.
Magsisilbing tribute ang konsiyerto sa mga kantang pinasikat ni Jose Mari mula nang nagsimula siya sa music industry.
Ang event ay hatid ng QR Events.
Read: Heart Evangelista calls health scare her "hardest wake-up call"