Inamin ni Batangas Governor Vilma Santos na naapektuhan siya nang may mga kumalat na malisyosong akusasyon laban sa kanyang mister na si Acting Executive Seretary Ralph Recto.
"Hindi pupuwedeng hindi ka rin maapektuhan," bungad ni Vilma patungkol sa mga "fake news" laban sa mister.
Hindi nagbanggit ng pangalan si Vilma, pero mahihinuhang may kinalaman ito sa mga usaping pulitika.
Noong Mayo, hindi kaila sa publiko ang banggaan sa pagitan ni Recto at ni Batangas First District Representative Leandro Leviste.
Sa privilege speech noon ni Leviste, inakusahan niya si Recto na sangkot umano sa mga maanomalyang proyekto ng Department of Public Works and Highways (DPWH) sa Batangas.
Idinawit din ni Leviste si Vilma at sinabing ang kampanya ng governor-actress noong 2025 elections ay pinondohan ng kongresistang kasabwat umano ni Recto.
Mariing pinabulaanan ni Recto ang mga paratang na iyon.
Sa kabilang banda, sinabi ni Recto dalawang beses siyang sinubukang suhulan ni Leviste sa kagustuhan umano ng neophyte congressman na makapasok sa pulitika.
Inalok daw siya nito ng PHP1 billion kapalit ng pag-atras ng misis niyang si Vilma sa pagkandidato bilang Batangas governor noong 2025 elections.
Read: Recto claims "bribery" attempt; Leviste alleges corruption
Pagpapatuloy ni Vilma: "But at the end of the day, kapag nag-usap-usap kami, alam mo, kapag hindi ka guilty, hindi ka dapat matakot.
“Masakit kapag may tinatago ka. Pero alam mo, wala."
Pilit daw sinisiraan ang mister niya, pero wala naman umanong basehan ang mga akusasyon rito.
"Ngayon, pinipilit siyang kasuhan, e, di ba?
"Pero lahat nung dumaan na yung kaso, lumabas ba pangalan ni Ralph? Wala naman, e. Dahil wala naman talaga.
"I mean, we’re not being self-righteous here. Pero palagay ko, isang natutunan ko rin kay Ralph, kaya ako tumagal ng ganito...
"Awa naman ng Diyos, wala naman akong kaso," diin ni Vilma.
Hindi nabanggit ni Vilma kung ano ang sinasabi niyang pilit na ikinakaso kay Recto.
Kung titingnan ang recent news, noong June 10 ay ibinasura ng Office of the Ombudsman ang reklamong "plunder, graft, and malversation" laban kay Recto dahil sa kawalan ng ebidensiya.
Kaugnay iyon ng utos ni Recto noong siya ay Department of Finance secretary na ibalik sa national treasury ang PHP60 billion "unused funds" ng Philhealth.
Ayon sa desisyon ng Ombudsman, na inulat ng Philippine Daily Inquirer, hindi maituturing na personal na interes ang pagbalik ng pondo sa national treasury.
Para kay Vilma, hayaan na lang daw makita sa kanyang serbisyo ang ambag niya sa Batangas.
"Kapag fake news na kung anu-ano lang ang inimbento dahil gusto ka lang siraan... Ang pinakamabuti diyan ay kung ano ang totoong iniwan ko sa tao.
"Because ang mga manininindigan, sabihin nila, ‘Hindi naman totoo yan, e.’ Yun lang yon, e."
Hindi raw siya perpekto pero sinisikap umano niyang magsilbi nang may puso sa kanyang mga nasasakupan.
"Natutunan ko rin ito kay Ralph, if you serve, serve from the heart. And then, do some adjustments.
"Not being self-righteous... Sometimes may gray area, natural lang yon. But sometimes there are such things as compromise.
“Hindi naman puwedeng napakagaling mo na tao, hindi, e. Pero puwede ka ring magsilbi na, lagi kong sinasabi, I am no saint. But definitely, I am not the devil."
Read: Viral: “Pinoy” hits back at "pickpocket" in Rome; celebs react
ON SON LUIS MANZANO'S CAREER AND FAMILY LIFE
Nagbigay rin ng update si Vilma tungkol sa mga anak.
Masaya siyang balik-trabaho ang anak niyang si Luis Manzano.
"Lucky is very busy. Balik siya sa kanyang pagmamahal, TV, hosting. And then, meron siyang mga corporate show.
"And the most important thing is he’s enjoying his family.
"Plus, ayoko naman siyang pangunahan. Pagkatapos ng Deal or No Deal, may kasunod na siya ulit. Ayokong ilabas. Siya na ang bahala.
"But, sunud-sunod naman siya. So, I think eto yung bagay na mahal niya."
Sinuportahan daw ni Luis ang Alay Lakad, ang annual walk for a cause ng Batangas City Alay Lakad Foundation para sa out-of-school youth.
"Although pumupunta pa rin si Lucky dito, oo. Alay Lakad, he was here.
"Nag-donate pa siya ng kanyang pera. Para share naman niya sa Alay Lakad. Kasi, Alay Lakad is something about education.
“So, hindi pa rin siya nakakalimot ng puwede niyang maitulong sa Batangas. Pero ngayon, ang priority niya is his family and his work.”
Dalagita na raw ang anak ni Luis at Jessy Mendiola na si Isabella Rose, o kilala rin sa palayaw na Peanut.
"Naku, maarte na siya. Sus, mag-aartista ang batang yun. I swear," saad ni Vilma.
"Pero alam ko kasi, kahit hindi kami nagkikita lately. I’m busy, walang araw naman na lalagpas na hindi kami naka-call.
"Pero dalagita na. Sabi ko nga sundan na nila. Kasi sayang ang ganda ng lahi, di ba?”
Read: Erik Matti to Neil Daza: "Diretsuhin mo ako. Diretso akong tao."
ON SON RYAN CHRISTIAN RECTO
Ang bunso naman niyang anak na si Ryan Christian Recto ay ina-enjoy raw ang trabaho nito bilang Batangas Sixth District representative.
"I could see his enthusiasm. Ang sipag. At excited siya sa trabaho sa Congress because he is learning a lot.
"Tapos ang sipag niya dito magbara-barangay. Sabi ko nga, ‘Baka ini-enjoy mo diyan barik-barik, ha.’ Hahaha!"
Ang barik sa Batangas ay slang term para sa pag-inom ng alak.
Nagpapaunlak naman daw si Ryan ng isang shot ng alak kapag bumibisita sa mga barangay.
"Oo naman,” mabilis na sagot ni Vilma. "Ako naman nung nag-mayor, yun ang una kong natutunan, mag-barik talaga ng gin.
"Kaya lang, mabuti magaling siyang kumanta. Kapag binigyan pa siya ng isa, sasabihin niya, ‘Kanta na lang ako.’
"Madaling salita, he’s enjoying his job. And I’m happy. Nasa kanya yung ano, e, puso at talino."
Read: Robin Padilla questions "one-sided" prosecution in VP Sara Duterte impeachment trial
ON FAMILY TIME
Nagkikita-kita pa ba sila sa bahay?
"Medyo yan ang problema ko ngayon. Kasi, in a way... Kaya sometimes humihingi ako ng time, 'Puwede ba pagbakasyunin niyo naman ako nang konti?' Kasi family yun.
"Kasi, contrast ang schedule namin. Ang Congress nasa Manila. Si Ralph nasa Manila. Ako nasa Batangas.
"By the time na umuwi ako ng weekend, sila naman ang pupunta dito sa Batangas. So, nagkikita lang kami usually Sunday.
"Pero Sunday sa evening, balik na ulit ako dito kasi may flag ceremony kami the next day."
Kahit papaano ay may quality time din naman daw silang pamilya.
"Pero the best time talaga, we just had a break. Vacation sa Japan. We need it. Kahit naman makina napapagod."
Nagpapaalam naman daw siya sa kanyang staff.
"Sabi nga nila, ‘Gov, pahinga ka naman.’ Hehehe! And yun ang perfect time for my whole family."
Minsan lang daw sila nag-uusap sa bahay tungkol sa pulitika.
"Pag meron lang metikulosong important issues. Pero lagi hindi, lalo na kapag dinner, wala.
"We talk about family. Tawanan at saka abroad. We enjoy life.
"Tsaka ano, tama rin si Ralph, e. Sabi nga niya, 'Let’s enjoy work. But let's have time for the family too. Kasi hindi na rin tayo bumabata.'
"Alangan magbiya-biyahe ka naka-wheelchair ka na. You get me?
“Nagtatrabaho tayo, but let’s find time for leisure. And kailangan with the family.
"That’s why yung trip namin sa Japan. My siblings were there. Lucky, well, my apo was there. Ryan was there. It’s really family.
"Recharged ka na ulit. Sa pagbalik ko sa trabaho, inspired ka na naman, di ba?
"Pero pag kailangan ng break, break naman."
Read: Say Alonzo asks for prayers after fire destroys family's restaurant