Markado kay Richard Gomez ang Hihintayin Kita Sa Langit, ang 1991 romantic drama film na pinagbidahan nila ni Dawn Zulueta.
Maituturing na classic ang pelikulang ito na idinirek ni Carlitos Siguion-Reyna.
At makalipas ang 35 taon, patuloy pa rin ang pagkilala sa Hihintayin Kita Sa Langit.
Sa katunayan, isa ito sa dalawang pelikula ni Richard na kabilang sa librong SINE • FILM • PELIKULA: The 100+ Greatest Films of Philippine Cinema ng Summit Books.
Ang author ng libro ay ang veteran journalist at PEP editor-at-large na si Jo-Ann Q. Maglipon, sa pakikipagtulungan ni Joel David, Ph.D.
Ang isa pang pelikula ni Richard na pasok sa libro ay ang Ikaw Pa Lang Ang Minahal (1992), na pinagbidahan din ni Maricel Soriano. Si Carlitos din ang nagdirek nito.
Nagbalik-tanaw si Richard sa pelikula nila ni Dawn sa ginanap na PEP Spotlight: Sine x Cinemalaya event sa Cinema 3 ng Shangri-La Plaza
Read: What you need to know about PEP Spotlight: SINE X Cinemalaya
RICHARD GOMEZ ON WORKING WITH DAWN ZULUETA
Unang beses magkatrabaho noon nina Richard at Dawn sa pelikula.
Batay rin sa kuwento ni Richard, lumalabas na sa pelikulang ito nagsimula ang kanilang relasyon noon.
“Alam ko, at that time, na magaling na artista si Dawn Zulueta, but hindi ko pa siya nakatrabaho,” bungad ni Richard.
“Although we did one, I remember, we did one [softdrink] commercial.
“Nung binasa ko yung script na pinadala ni Direk Carlitos tsaka ni Armida Siguion-Reyna, 'tapos nung sinabi nga na si Dawn Zulueta yung artista, sabi ko, ‘Ganda nun, ah.’
"Sabi ko, ‘Maitim 'tapos payat. Ang ganda.’ Parang perfect dun sa role.”
Sa pagpupulong nila para pag-usapan ang pelikula, ibinahagi raw ni Carlitos noon na ang pelikula ay hango sa classic novel na Wuthering Heights ni Emily Bronte.
Ang nobelang ito ay nagkaroon na rin ng ilang film adaptations sa Hollywood.
Pinayuhan daw ni Carlos si Richard na basahin ang nobela at panoorin ang 1930 film adaptation nito. Subalit hindi sumunod si Richard.
Paliwanag ng aktor, “But deep inside my mind, sabi ko, as an actor, ayaw ko naman na maging copycat.”
Hindi raw ipinaalam ni Richard kay Carlitos na hindi siya sumunod sa sinabi ng direktor.
Katwiran ni Richard, “Kasi I want to interpret the script depending kung ano yung gusto ng director, tsaka yung type ko na acting.”
Pero masaya raw si Richard na ginawa ang pelikula at nakatrabaho si Carlitos bilang direktor at ang late mother nitong si Armida Siguion-Reyna, na producer ng pelikula.
Saad ng aktor: “Kasi si Carlitos was such a technical director.
"So when I was looking at the shots of Carlitos, sabi ko, ‘Master of ano 'to, master of composition.’
"Ang galing niya mag-compose ng scenes, gamitin niya yung landscape.
"And then ang kasama mo na cinematographer si Romy Vitug, so it was a beautiful eksena all the time.”
Kinunan daw ang maraming eksena ng Hihintayin Kita Sa Langit sa Batanes, na kilalang tourist destination sa bansa.
“Doon yata na-in love si Dawn Zulueta sa akin,” biro ni Richard.
RICHARD’S FIRST GAWAD URIAN
Binanggit din ni Richard na dahil sa kanyang pagganap sa Hihintayin Kita Sa Langit ito ay napanalunan niya ang kanyang kauna-unahang best actor award mula sa Gawad Urian.
Pag-amin niya, lagi raw siyang nominated noon subalit hindi nananalo. Nawawalan na raw siya ng pag-asa noon.
Nang ma-nominate siya sa Hihintayin Kita Sa Langit, sinabi raw noon ni Richard sa kanyang manager, ang yumaong si Douglas Quijano, na hindi na siya dadalo sa awards night ng Urian dahil hindi niya tiyak kung mananalo siya.
Pag-alala ni Richard: “Sabi ko kay Douglas, sabi ko, ‘Dougs, hindi na ako pupunta sa Urian… E, lagi namang nanu-nominate every year, hindi rin ako nananalo.'
“And that time, struggle talaga, struggle talaga yung 'Richard Gomez… nominated for best actor.'”
Nakakaramdam daw si Richard noon ng intimidasyon dahil ang mga nakakalaban niya sa award-giving bodies ay heavyweight actors tulad nina Christopher de Leon at Phillip Salvador.
Pero hinikayat daw siya ng kanyang manager na dumalo pa rin sa Urian bilang pagbibigay respeto sa award-giving body.
“So, I went there. And doon na, ‘And the winner is Richard Gomez!’ Naiyak talaga ako,” kuwento ni Richard.
“Sabi ko, after so many years of being nominated, eventually, binigay din ng Diyos, 'no, thank you, dumating din.”
Kaya lubos ang pasasalamat ni Richard na napabilang ang Hihintayin Kita Sa Langit sa SINE • FILM • PELIKULA: The 100+ Greatest Films of Philippine Cinema.
Aniya: “And I'm happy that people are still able to watch this and appreciate the movie and to be included in your list of 100 Best Filipino Films. Thank you so much. Thank you.”
VALUABLE TOURISM material FOR BATANES
Pagpapatuloy pa ni Richard, nakatulong ang pelikula sa Batanes para lalo itong makilala bilang tourist destination.
Saad ng actor-politician: “Hihintayin Kita Sa Langit has become a valuable tourism item for Batanes, na hanggang ngayon they still remember.
“Pag pupunta yung mga tao doon, ‘Eto yung lugar kung saan nag-shooting si Richard tsaka si Dawn for Hihintayin Kita Sa Langit,’ hanggang ngayon...”
Sa katunayan, kamakailan lamang ay nakausap daw ni Richard ang gobernador ng Batanes.
Kuwento ni Richard, “Sabi niya, ‘Hanggang ngayon ginagamit pa namin yung Hihintayin Kita Sa Langit.’
"So, it has become a valuable tourism material for that place.
“So, yung success ng pelikula, maraming klaseng success yung pelikula, e. Could be commercial success, ang laki ng kinita ng pelikula.
“The other success is ang daming pinanalo na awards, 'no? Another success is luma na luma na yung pelikula pero nababasa, napapanood pa natin hanggang ngayon.”
100 SINE. FILM. PELIKULA: The 100+ Greatest Movies in Philippine Cinema retails for P1,799, and is available on leading bookstores National Bookstore and Fully Booked as well as online via Shopee and Lazada.