Inilarawan ng Quezon City Police District (QCPD) ang negosyanteng si Lakambini "Lakam" Chiu bilang "the No. 6 Most Wanted Person of Kamuning Police Station (PS 10)."
Ito ay kasunod ng pag-aresto ng QCPD kay Lakam kaugnay ng 124 counts of qualified theft.
Si Lakam ay nakatatandang kapatid ng aktres na si Kim Chiu.
Sa ulat ng QCPD, na may headline na "QCPD Arrests Businesswoman Wanted for Qualified Theft," hindi direktang pinangalanan si Lakam.
Kalakip nito ang mugshot niya na natatakpan ng malaking itim ang bahagi ng kanyang mukha at pangalan.
Ayon sa QCPD, naaresto si Lakam, 45, sa isang parking area sa Saint Francis St., Barangay Wack Wack, Mandaluyong City, bandang alas 4:06 ng hapon noong Linggo, September 20, 2026.
Isinagawa ang pag-aresto ng mga tauhan ng PS 10 sa bisa ng warrant of arrest na inilabas ng Quezon City Regional Trial Court Branch 84.
Nasa PHP5,838,000 ang recommended bail para sa 124 counts ng qualified theft na kinakaharap ni Lakam.
Kasunod ng pag-aresto, dinala si Lakam sa kustodiya ng PS 10 para sa documentation at proper disposition.
“No matter who the person is, a valid warrant of arrest must be enforced in accordance with the law. The QCPD will continue its intelligence-driven operations to locate wanted persons and bring them before the proper authorities,” pahayag ni Police Brigadier General Christopher Olazo, director ng QCPD.
Read: Lakam Chiu, Kim Chiu's sister, arrested over 124 counts of qualified theft
KIM CHIU VS SISTER LAKAM CHIU
Ang pagkakaaresto kay Lakam ang pinakabagong development sa legal battle na nagsimula matapos magsampa si Kim ng qualified theft complaint laban sa kanyang kapatid noong December 2025.
Noong panahong iyon, sinabi ni Kim na napilitan siyang gumawa ng legal na hakbang matapos matuklasan ang umano’y seryosong financial discrepancies sa kanyang business operations.
“After careful consideration and months of internal review, I have made the difficult decision to file a legal case for qualified theft against my sister, Lakambini Chiu, in relation to serious financial discrepancies discovered within my business operations,” saad ng aktres sa inilabas niyang statement.
Inilarawan din ni Kim ang pagsasampa ng kaso sa kapatid bilang isa sa pinakamabigat na desisyong kinailangan niyang gawin.
Aniya, “This decision did not come easily. It is one of the most painful steps I have ever taken in my life.”
Ang pinagmulan ng reklamo ay ang finances ng House of Little Bunny Philippines, Inc. (HOLB), ang fashion business na itinatag nina Kim at Lakam.
Sa naging review ng transactions ng HOLB, unang kinuwestiyon ng kampo ni Kim ang mahigit PHP69 million na withdrawals at transfers mula sa corporate accounts para sa period na October 2022 hanggang July 2025.
May isinagawang audit kalaunan kung saan natukoy na humigit-kumulang PHP36.65 million ang inilista bilang missing, unaccounted for, o potentially misappropriated funds.
Gayunman, ang halagang naging basehan ng 124 qualified theft charges ay PHP44,396,331.65, ayon sa 21-page resolution ng Office of the City Prosecutor of Quezon City na may petsang September 1, 2026.
Ayon sa prosecutor, ang PHP44.396 million ay nagmula sa 124 magkakahiwalay na withdrawals at online transfers mula sa corporate bank accounts ng HOLB.
Itinuturing ang bawat questioned transaction bilang magkahiwalay na criminal act, kaya umabot sa 124 ang bilang ng qualified theft counts.
Sa resolution, sinabi ng prosecutors na may sapat na basehan para isulong ang mga kaso laban kay Lakam.
Iginiit sa findings na ang perang nasa accounts ay sales at revenues ng HOLB at hindi personal na pera ng alinman sa magkapatid.
Ayon pa sa resolution, walang ipinakitang board resolution, secretary's certificate, o iba pang corporate authorization na nagpapahintulot kay Lakam na gamitin ang corporate funds para sa personal na investment activities o casino-related transactions.
Nakasaad din sa resolution: “The evidence on record establishes that respondent Lakambini unlawfully took and appropriated corporate funds in aggregate amount of PHP44,396,331.65, fully aware that the same did not belong to her.”
Read: Kim Chiu's sister Lakam charged in PHP44.4M qualified theft case
LAKAM CHIU DENIES ALLEGATIONS
Mariing itinanggi ni Lakam ang akusasyon ng qualified theft.
Sa kanyang panig, sinabi niyang hindi siya HOLB's treasurer o general manager, kundi corporate secretary, at kinuwestiyon niya ang characterization sa kanyang role sa kumpanya.
Iginiit din niyang joint accounts ang ginagamit nila ni Kim at may naging pagkakaunawaan silang magkapatid na maaaring gamitin ang pera para sa iba pa nilang business ventures.
Kabilang sa kanyang depensa ang alegasyon na ang ilang pondong kinuwestiyon sa kaso ay inilagay sa isang casino-related business venture o “junket” na umano'y layuning kumita para sa kanilang negosyo.
Itinanggi ni Lakam na ginamit niya ang pera para sa personal na pagsusugal at sinabi niyang nabigo lamang ang naturang investment.
Bukod kay Lakam, una ring isinama sa reklamo ni Kim ang kanyang longtime personal accountant na si Helena Tayag.
Ngunit sa parehong prosecutor's resolution, ibinasura ang complaint laban kay Tayag dahil walang sapat na ebidensiyang nag-uugnay sa kanya sa umano'y transactions.
Ayon sa prosecutor: “Mere suspicion, speculation, relationship association, and companionship do not prove conspiracy. Conspiracy must be established, not by conjectures, but by positive and conclusive evidence.”
Bago ang pagkakaaresto kay Lakam, sinabi ng kanyang abogado na si Atty. Dominic Solis na umaasa pa rin ang kanyang kliyente na maaayos ang problema nila ni Kim bilang magkapatid.
“Our client is saddened by her sister's decision to pursue the case but remains hopeful that the matter can still be resolved amicably within the family. She will address the charges through the proper legal process.”
Samantala, ipinagpapatuloy ni Kim ang kanyang business activities habang nagpapatuloy ang legal proceedings.
Ang pagkakaaresto kay Lakam noong September 20 ang pinakabagong yugto sa kasong nagsimula sa isang family and business dispute at nauwi sa 124 criminal charges.
Sa ngayon, nasa kustodiya siya ng QCPD habang inaasahang magpapatuloy ang proseso ng mga kasong kinakaharap niya sa korte.
Additional Report by Rachelle Siazon
Read: Kim Chiu stands firm on pursuing legal case vs. sister Lakam