Nagtipun-tipon ang pamilya at mga kaibigan ng komedyanteng si Ate Gay, o Gil Aducal Morales sa totoong buhay, para sa isang "living funeral" nitong Huwebes, Oktubre 15, 2026.
Sa halip na hintayin ang kanyang pagpanaw bago ipahayag ang kanilang pagmamahal at pasasalamat, nagkaroon ng pagkakataon ang mga mahal sa buhay ni Ate Gay na sabihin sa kanya ang mga bagay na nais nilang marinig niya habang naririto pa siya.
Ginanap ang living funeral ni Ate Gay sa Forest Lake Memorial Parks sa Biñan, Laguna.
Hindi tulad ng karaniwang burol na isinasagawa matapos pumanaw ang isang tao, ang living funeral ay isang pagtitipon habang buhay pa ang taong pinararangalan.
Sa ganitong paraan, personal niyang maririnig ang mga mensahe, alaala, at pagpapahalaga ng kanyang pamilya at mga kaibigan.
Kabilang sa nagbigay ng "eulogy" para sa kanya ay ang kapwa niyang comedienne na si Boobsie Wonderland at ang content creator na si Arman Salon.
Base sa mga ibinahaging larawan ni Ate Gay at ng mga dumalo sa kanyang living funeral, napapalibutan ng mga bulaklak at portraits niya ang lugar.
ATE GAY'S BATTLE WITH STAGE 4 CANCER
Isinagawa ang pagtitipon sa gitna ng mabigat na pinagdaanan ni Ate Gay sa kanyang kalusugan, isang pagsubok na ikinabahala rin ng marami niyang tagahanga at kasamahan sa industriya.
Noong Setyembre 2025, isiniwalat ni Ate Gay na na-diagnose siyang may Stage 4 cancer, partikular na mucoepidermoid carcinoma.
Ibinahagi ng komedyante ang kanyang kondisyon matapos sabihan na hindi na magagamot ang kanyang sakit at maaaring hindi na siya umabot sa taong 2026.
Sa isang panayam sa Kapuso Mo, Jessica Soho, ikinuwento ni Ate Gay ang bigat ng kanyang naramdaman nang malaman ang diagnosis. Humingi rin siya ng mga panalangin habang hinaharap ang kawalang-katiyakan ng kanyang kalagayan.
Marami ang nagpahayag ng pag-aalala at nagpaabot ng suporta sa komedyante, kabilang ang mga kapwa niya artista at tagahanga.
Kabilang sa mga nagpahayag ng malasakit ang komedyanteng si Allan K, na matagal nang kaibigan ni Ate Gay.
Sumailalim si Ate Gay sa chemotherapy at radiation therapy.
Ayon sa mga naunang ulat, isang hindi pinangalanang donor ang tumulong sa pagbabayad ng mga gastusin sa kanyang gamutan.
Noong Hulyo 2026, ibinahagi rin niya na may nakitang panibagong bukol malapit sa kanyang leeg at balikat. Ginamot ito sa pamamagitan ng CyberKnife, isang uri ng paggamot na gumagamit ng naka-target na radiation.
Sa isang health update noong Setyembre 2026, ibinalita ni Ate Gay na wala nang nakitang palatandaan ng cancer sa kanyang pinakahuling mga pagsusuri. Nagpasalamat siya sa Diyos at sa mga taong patuloy na sumuporta sa kanya sa buong proseso ng kanyang pagpapagamot.
Read: Ate Gay to undergo chemotherapy, radiation for free
CEEBRATION OF ATE GAY'S LIFE
Sa isang living funeral, hindi kailangang hintayin ang pagpanaw ng isang tao bago sabihin sa kanya ang mga salitang puno ng pagmamahal at pasasalamat.
Sa halip, binibigyan siya ng pagkakataong marinig at maramdaman mismo ang pagpapahalaga sa kanya ng mga taong mahalaga sa kanyang buhay.
Para kay Ate Gay, naging pagkakataon ang pagtitipon sa Forest Lake Memorial Parks upang magsama-sama ang kanyang mga mahal sa buhay at ipahayag ang kanilang pagmamahal sa kanya.
Kilala si Ate Gay sa pagpapatawa sa mga manonood sa pamamagitan ng kanyang mga pagtatanghal at panggagaya sa mga personalidad, kabilang ang kanyang paggaya sa yumaong National Artist na si Nora Aunor.
Sa kabila ng mga pagsubok sa kanyang kalusugan, naging bahagi rin ng kanyang kuwento ang pagsisikap na magpatuloy at ang pasasalamat sa mga taong hindi siya iniwan.
Bagamat maaaring mabigat pakinggan ang salitang living funeral, layunin nitong bigyan ang isang tao ng pagkakataong marinig ang mga alaala, mensahe, at pagmamahal ng kanyang mga mahal sa buhay habang maaari pa niya itong personal na tanggapin.
Para kay Ate Gay, ang pagtitipon ay pagkakataon upang iparamdam sa kanya ng mga taong malapit sa kanyang puso kung gaano siya kahalaga sa kanila.
Read: Ate Gay, itinuturing na himala sa buhay niya sina Chaye at Heart