Hindi pinalagpas ni Jinkee Pacquiao ang pamba-bash sa kanya ng ilang netizens dahil sa video na pinapayungan siya ng isang bodyguard.
Sunud-sunod ang video content ni Jinkee sa kanyang Facebook page ng pagiging active sa paglalaro ng pickleball, na nauusong laro ngayon.
Sa pinag-uusapang video, makikitang paglabas niya ng pinto ng bahay sa General Santos City, pinayungan siya agad ng bodyguard.
May petsa itong October 17, 2026.
Makikita sa video na hindi umuulan subalit basa ang sahig at kalsada.
May mga nakapansin ding walking distance lamang ang gym kunsaan nagpi-pickleball si Jinkee.
Sunud-sunod ang komento ng netizens. Marami rito ay puna at batikos kay Jinkee na bakit kailangan pa raw siyang payungan ng kanyang bodyguard.
“Di siya marunong humawak ng payong dahil mapera. Sana all,” hirit ng isa.
“Hindi na marunong humawak ng payong nung yumaman,” banat ng isa.
Komento ng isa pa, “Mabigat pala yung ganung payong hahaha.”
"Masahol pa sa mga prinsesa may tagahawak ng payong,” pangungutya ng isa pa.
Marami pa ang ganitong komento na kinukutya si Jinkee dahil daw kinailangan pa siyang payungan kahit na malapit lamang ang gym.
Read: Mimiyuuuh sheds light on previous "clean-money girl" remark
JINKEE REACTS
Sa October 28 video na ipinost ni Jinkee, nag-react siya tungkol sa isyung ito.
Makikita ang misis ni Manny Pacquiao na naghahanda para lumabas at maglaro. May kausap siya sa cell phone.
Saka siya nagsalita habang may kumukuha ng kanyang video. Nagsalita siya ng magkahalong Tagalog at Bisaya.
“Kasi nag-discuss kami yung na-bash kami sa mga payung-payong.
"Na-bash kami sa payung-payong. Hindi po namin intensiyon na payungan ako doon,” may taray na sabi ni Jinkee.
“Char, nagalit!” sabay bawi niya at natawa.
Sabi pa ni Jinkee, “Siya [guard] lang yung nagpumilit na payungan ako, hindi ko naman sinabing payungan ako hanggang doon sa gym kaya hindi ko napansin.
“Pero kung alam ko lang yon, sabihan ko siya na, 'Bakit ka napayung-payung hindi naman umuulan?' O.A. lang yung bodyguard ko.”
Nag-react din siya tungkol sa pagkakaroon ng bodyguard na tagapayong.
Paliwanag ni Jinkee: “Ni-assign yun ni Manny. Hindi ako nag-aano ng bodyguard.
“[Si] Manny nag-assign sa akin ng bodyguard, pero ako, hindi ako nag-aano na may bodyguard ako.”
Hindi rito nagtatapos ang reaksiyon ni Jinkee tungkol sa isyu.
May patutsada si Jinkee sa pamamagitan ng video na ipinost niya nitong Biyernes, October 30, 2026.
Makikita si Jinkee na nasa kalsada at may kasamang tinatayang 13 katao.
“Ang payong,” sabay-sabay na sabi ng grupo.
Magkaka-partner sa dalawa ang grupo: may tagapayong at pinapayungan.
At may mga sarkastikong komento sila.
“Ayusin ang pagpayong!” malakas na sabi pa ni Jinkee.
Sabi pa ng isa sa kanila, “Thank you sa mga basher, ha. Nagpayong kami.”
Nagtatawanan din ang grupo at kinanta pa ang “Umbrella” song ni Rihanna.
“Hanggang dito, ha!” sabi pa ni Jinkee kahit na nasa loob pa sila ng gym.
“Thank you sa mga props,” pagtatapos ni Jinkee, na indikasyong sinadya nilang gawin ang video.
Read: Jimuel Pacquiao's wife Carolina wants baby Clara to embrace Mexican-Filipino roots