Dalawa ang shows ni Eugene Domingo sa TV5, ang sitcom na Everybody Hapi at ang animal gag show na Ha-Ha Hayop! Ayon sa comedienne, enjoy na enjoy raw siyang gawin ang dalawang shows niya sa TV5.
Bago ang dalawang shows na ito ng TV5, huling napanood si Eugene sa Ako Si Kim Samsoon ng GMA-7. May bagong soap na raw na in-offer sa kanya ang Kapuso network, pero inaayos pa raw. Sigurado raw next year ay mapapanood siyang muli ng Kapuso viewers.
"Ako naman kasi, puwede naman ako kahit saan. Puwede ako sa Channel 2, sa Channel 7, at sa Channel 5," banggit ni Eugene.
Ano ba ang Ha-Ha Hayop at Everybody Hapi?
"Itong Ha-Ha Hayop, thirty minutes siyang nag-i-spiel ako ng planet's funniest animal videos. Yung Everybody Hapi naman is a sitcom, na riot na riot na sitcom, kasi si John Estrada at saka si Long Mejia, sila yung parang sidekick diyan. Ako naman at si Roxanne Guinoo, magkapatid kami rito. Pero siguro, magkaiba kami ng magulang!" tawa niya.
Pagdating naman sa movies, tapos na raw nilang i-shoot ni Ai-Ai delas Alas ang sequel ng Ang Tanging Ina. By next year, umaasa sila ni Direk Wenn Deramas na makakahanap na sila ng schedule at maisisingit na rin nilang i-shoot ang pelikula naman na pagbibidahan ni Eugene, Demetria, sa Viva Films.
Hindi raw ugaling manghinayang ni Eugene kaya wala siyang regrets na hindi siya natuloy sa dalawang pelikula niya sa Regal Entertainment, Shake, Rattle & Roll X at Desperadas 2.
"Hindi kasi ako mahilig magsisi, e," sabi ni Eugene. "Siyempre, lahat naman ng nangyari, nangyari na. So, bakit ka pa magdu-dwell do'n? Ang isipin na lang natin, yung mga susunod pang mas maraming projects. Parang there will always be another chance for everyone, mas brighter, more positive days, chances para mas makagawa ng mas magandang pelikula."
Kung magkita man daw sila ni Mother Lily Monteverde, ang may-ari ng Regal, definitely ay babatiin daw niya ito at magma-mano pa siya dahil, aniya, Pasko na.
"Si Mother naman kasi, lambingin mo lang naman ‘yan. Kaya nga Mother, di ba?"
WHITE CHRISTMAS. Masaya naman si Eugene dahil matutuloy na rin ang isa sa mga pangarap niya. Ito ay ang makapag-spend ng Christmas sa New York and have a white Christmas, literally.
"December 22, matutupad na ang pangarap ko!" masaya niyang sabi. "December 22 pa ko aalis para makapag-promote naman ako ng Ang Tanging Ina at mga shows ko sa Channel 5. Tapos, ‘ayun, tutuparin ko lang ang pangarap ko."
Almost two weeks siya sa New York kung kaya't doon niya raw talaga ise-celebrate ang Pasko at Bagong Taon.
"Titiisin ko, ang lamig-lamig daw!" bulalas niya. "Pangarap ko talaga yun. Puwede naman, di ba? Puwede namang tuparin. At saka makapanood ng Broadway plays, musical... Pangarap ko talaga yun, e."
Dagdag niya, "Aayusin ko na makabili ng ticket earlier. Kaya nga kapag nagkakapuyatan or kaya nagkakalagarian, isipin mo lang, basta pagdating ng December, mag-e-enjoy ako!"
First time pa lang ba niyang makakakita ng snow?
"First time...mga snow na nae-experience ko, styrofoam lang!" tawa niya. "At least ngayon, totoo na naman siguro ‘to. At talagang yung New York ang pupuntiryahin ko kasi yung mga kaibigan kong nagpupupunta ng Amerika, sinasabi nilang, ‘Mag-e-enjoy ka run. Mag-e-enjoy ka.' So, yun ang palaging tinatandaan ko. Kaya sabi ko, darating ang panahon..."
After New York, ano naman kaya ang susunod niyang papangarapin?
"Ay, babalik ako sa Europe! Actually, this coming November 15 [today], pupunta, kami ng Marrakesh! O, di ba, border siya ng Africa at Europe. Kaya sana, kami ni Mylene Dizon, makapag-segue kami na makapunta ng France para naman matupad ang pangarap naming makapagpa-picture sa Eiffel Tower."
Pupunta sina Eugene at Mylene sa Marrakesh para sa screening ng kanilang indie film na 100. Na-imagine ba ni Eugene na magiging ganito kainit at kaganda ang pagtanggap ng kanilang pelikula?
"Hindi! Hindi! Nakakaloka! Hindi talaga! Grabe! Grabe!" bulalas ni Eugene. "Tapos ngayon, unanimously, Graded A pa kami. So, ngayon, ang inaasahan naman namin, sana, sana maraming manood sa regular showing. Kaya blessing na rin na Star Cinema ang nag-release sa kanya. At least dun, malaking-malaking tulong talaga."
Mas lalo ba siyang na-inspire to do more indie films?
"Palagi naman akong inspired to do indie films. In fact, waiting na nga ako sa Cinemalaya. Kasi lumabas na yata yung mga semifinals for next year," banggit niya.