Masayang-masaya ang StarStruck V First Prince na si Enzo Pineda nang mag-celebrate siya ng kanyang 20th birthday kagabi, August 11, sa Sofra Lounge Bar sa The Fort, Taguig City. Pero ngayong araw, August 12, ang actual birthday niya.
Special guest ni Enzo sa kanyang birthday party ang Pambansang Kamao at Sarangani congressman na si Manny Pacquiao. Sa mga hindi nakakaalam, ang ama ni Enzo na si Eric Pineda ang business manager ni Pacman.
"Kuya Manny has been a part of our family for such a long time, at hindi raw siya puwedeng hindi dumating sa birthday ko. Nag-promise siya na darating siya despite his busy schedule," sabi ni Enzo nang makausap siya ng PEP (Philippine Entertainment Portal).
Dagdag niya, "Kuya Manny has been a big brother to me. And he's very supportive lalo na noong sumali ako sa StarStruck. Marami na siyang naipayo sa akin, at isa na ang mahalin ko ang trabaho at huwag mawala ang respeto sa parents ko. Lagi ko raw silang mamahalin."
Dumating din sa party ni Enzo ang ka-batch niya sa StarStruck V na sina Sarah Lahbati, Rocco Nacino, at Rox Montealegre; StarStruck alumni Stef Prescott, Dion Ignacio, and Alvin Aragon; choreographer Geleen Eugenio and son Miggy Tanchangco; fashion designer Pepsi Herrera; at ilan pang kaibigan niya mula sa showbiz. Naroon din ang ilang kaibigan at classmates ni Enzo sa University of Asia and the Pacific.
FIRST BIG PARTY. First time daw na magkaroon ng malaking birthday celebration si Enzo, kung saan ang naging punong-abala ay ang kanyang ina na si Mrs. Macy Pineda.
"Never naman akong nagkaroon ng ganitong party talaga kapag birthday ko," sabi ni Enzo. "Kadalasan, kami-kami lang sa bahay. Or, mag-a-out of town kami. Simple lang talaga ako mag-celebrate ng birthday. Ngayon lang na ganito. Kasi nga, sabi ng Mommy ko, hindi na ako teenager. Twenty years old na raw ako kaya mag-celebrate na ako na medyo malaki na. Lalo na't nasa showbiz na ako, mas marami na akong mga kaibigan at katrabaho.
"Kaya parang treat ko na ito para sa mga friends ko, old and new, at sa mga taong naniniwala sa akin. It's about time na raw na subukan kong mag-party na ganito kasi ako naman daw magbabayad!" sabay tawa niya.
BEING RESPONSIBLE. Since kumikita na si Enzo dahil sa kanyang pag-aartista, mas nagkakaroon na raw siya ng responsibilidad, lalo na sa mga gastusin sa bahay nila.
"Kusa naman po akong nagbibigay," nakangiting sabi ni Enzo. "Hindi naman ako inoobliga nina Mommy at Daddy, e. Pero ako na yung nagbibigay talaga. Kasi nga, kumikita naman na ako, and I like to share my blessings in my own little way. Siguro simulan ko muna sa sarili kong bahay, di ba? Tumutulong na ako sa pagbayad ng kuryente, tubig, telepono at sa kung anu-ano pang kailangan sa bahay.
"Nagugulat nga sina Mommy at Daddy sa ginagawa ko. Natutuwa rin sila kasi marunong na raw ako at hindi na ako kailangang pagsabihan pa. But they always tell me to save. Meron naman akong tinitira for myself. Masarap lang ang feeling na may iba kang pinapasaya na mga tao at hindi lang ang sarili mo."
Regular na napapanood si Enzo sa musical-variety show na Party Pilipinas at sa sitcom na Kaya ng Powers. Naging part din siya ng cast ng Diva at sa Lovebug Presents Exchange of Hearts. Dahil sa maraming blessings niya ay magkakaroon siya ng outreach program para sa ilang kabataan.
"Birthday wish ko ay ang magtayo ng isang foundation," sabi ni Enzo. "Gusto kong makatulong sa kabataan, lalo na yung mga hindi nakakapag-aral. Importante kasi ang edukasyon sa kabataan.
"This Saturday [August 14], may gagawin kaming charity work somewhere sa Quezon City for underprivileged children. Magbibigay kami ng food, medicines, clothes, at marami pang ibang kailangan nila. This is my own way of sharing my blessings with them sa birthday ko. Gusto kong makapagbigay ng kasiyahan sa maraming tao and magandang simula itong sa mga bata."
ABOUT SARAH. Sa personal life naman ni Enzo, masaya siyang close sila ni Sarah Lahbati. Hindi pa raw niya girlfriend si Sarah dahil priority raw nila ang kanilang career.
"Kami ni Sarah, we're very good friends pa lang," ngiti niya. "Yung ligaw-ligaw, hindi pa naman nangyayari talaga. We are taking our time at ayokong malagyan ng pressure ang pagkakaibigan naming dalawa.
"We are still both young at marami pa kaming puwedeng gawin in our careers. May usapan naman kami ni Sarah, e, kaya yun ang pinanghahawakan ko. Kung ano 'yon, sa amin na lang 'yon."
Pero boto naman daw ang parents ni Enzo kay Sarah kung sakaling maging girlfriend niya ito.
"That's nice to hear," sabi ng binata. "Kasi siyempre, kailangan mo rin ng approval ng parents mo. Kumbaga, blessing nila 'yon. Alam ko naman na magugustuhan nila si Sarah. Pero I tell them na magkaibigan pa lang naman kami. But Sarah is always welcome sa family namin because everyone likes her."
Ano naman ang birthday gift sa kanya ni Sarah?
"Nang tanungin sa akin 'yan ni Sarah, I said na nothing expensive kasi mas gusto ko yung simple lang. Something na kapag makita ko, it will remind me of her parati. Sentimental akong tao kaya little things mean so much to me, lalo na kung ang nagbigay ay isang tao na special sa akin. Kaya whatever na iregalo ni Sarah, I will forever treasure it, kasi galing 'yon sa kanya," sabi ni Enzo.