Parañaque shootout investigated in "Kalye"

Buhay na kinuha at buhay na ibabalik ang tampok ngayong Lunes ng gabi sa Kalye: Mga Kuwento ng Lansangan.

Mapapadpad sa bandang Parañaque si Sol Aragones upang busisiin ang kontrobersiya sa naganap na shooutout dito kamakailan lang. Limang sibilyan ang aksidenteng napatay sa gitna ng barilan sa pagitan ng mga pulis at ng Waray-Waray gang. Labing-anim na katao--kabilang ang isang pitong taong-gulang na batang babae--diumano ang napatay ng mga miyembro ng Special Action Force. Naganap ito sa United Parañaque Subdivision IV sa Sucat noong ika-5 ng Disyembre.

Tanging ang kalye ang saksi, kung sinong kampo ang kumitil sa buhay ng mga kawawang nadamay, kabilang ang mag-amang Alfonso at Lia De Vera. Hahanapin ni Sol ang mga bakas ng kasagutan mula sa lansangan.

Sa EDSA naman, punong-puno at siksikan ang mga daanan habang nakatiwangwang ang tahimik ngunit kasulasulasok na Ilog Pasig. Sisinghapin ni Atom Araullo kung may pag-asa pang pasiglahin at mapakinabangan ang naturingang pinakamahabang waterway sa bansa.

Sa kabilang dako, pa-Marikina naman si Anthony Taberna upang kamustahin ang naghihingalong industriya ng sapatos dito. Ilang pabrika na ang magsara dahil sa mga nagsulputang sapatos na gawa sa Tsina.

Aalamin ni Anthony kung saan na ba papunta ang sapatos na gawang Marikina at kung anong dapat gawin para hindi ito tuluyang mapudpod sa alalala.

Gumala kasama nina Anthony Taberna, Sol Aragones, at Atom Araullo para sa isang makabuluhang pag-pasyal sa Kalye, Lunes ng gabi sa ABS-CBN, pagkatapos ng Bandila.