Bago ito tuluyang ipalabas sa Lunes, January 14, ay nagkaroon muna ng preview ang Indio, ang bagong serye ng GMA-7 na pinagbibidahan ni Bong Revilla Jr.
Ginanap ang pagpapalabas ng ilang mga unang episodes sa mga imbitadong media at iba pang mga bisita kagabi, January 9, sa Cinema 5 ng SM Megamall.
Ang Indio ay likha ni Suzette Docotolero na siya ring sumulat ng kuwento ng Amaya at Enkantadia.
Mula naman ito sa direksiyon ni Dondon Santos na siyang director ng award-winning indie film, Noy.
Ayon pa rin sa head writer ng Indio na si Suzette, ang kuwento ng nasabing serye ay pinagsanib mula sa Philippine history at Pinoy mythology.
Iikot ito sa panahong bago sakupin ng España ang Pilipinas hanggang sa pagdating ng mga nasabing dayuhan sa ating mga isla.
