Kumalas na ang Kapuso Primetime Queen na si Marian Rivera mula sa pangangalaga ng kanyang longtime manager na si Popoy Caritativo.
Ngayon ay ang Triple A na ni Mr. Tony Tuviera ang mamamahala sa career ni Marian.
Ginawa ang announcement ng pag-alis ni Marian sa Luminary Talent Management ni Popoy at paglipat niya sa Triple A ngayong tanghali, April 26, sa Luxent Hotel, Timog Avenue, Quezon City.
"Opo, hindi na po ako kay Popoy... effective nung isang araw pa," pagkumpirma ng aktres sa mga imbitadong miyembro ng media.
Marami ang nagulat sa desisyon na ito ni Marian dahil bago ito ay walang nababalitang tampuhan o samaan ng loob sa pagitan nila ni Popoy. Ang akala kasi ng marami ay maayos ang samahan nila bilang talent at manager.
Pero sabi ni Marian, "Hindi na nagiging productive yung relationship namin bilang talent manager at kaibigan.
"Isa lang ang sinabi ni Popoy: 'Rerespetuhin ko anuman ang nais mo.'"
Dagdag pa ng Kapuso actress, hindi raw ito biglaang desisyon.
Tumanggi si Marian na sabihin ang tunay na dahilan ng pagkalas niya kay Popoy.
Ito raw ay bilang respeto na rin kay Popoy na naging manager niya sa napakahabang panahon.
"Sabihin na lang nating may mga hindi pagkakaintindihan," sambit ni Marian.
DISCOVERER. Hindi naman ibang tao para kay Marian si Mr. Tony Tuviera dahil ito ang itinuturing ng aktres na "nag-discover" sa kanya.
Unang nabigyan ng break sa telebisyon si Marian sa mga afternoon soap na iprinodyus ng APT at TAPE Inc. para sa GMA-7: Kung Mamahalin Mo Lang Ako (2005), Agawin Mo Man Ang Lahat (2005), at Pinakamamahal (2006).
Hanggang sa mapansin siya ng Kapuso network at kunin sa mga proyekto nito.
Si Mr. Tuviera rin ang producer ng longest-running noontime show sa Pilipinas, Eat Bulaga!.
LIPATAN ISSUE. Inusisa rin ng press si Marian kung kasabay rin ba ng pagpapalit niya ng manager ang maugong na balitang lilipat na siya ng network.
Sagot ng aktres, "Antayin ninyo sa August."
Sa August 2013 kasi magtatapos ang kontrata niya sa GMA-7.
Ang huling teleserye ni Marian ay Temptation of Wife, ngunit wala pang nababalitang bagong proyekto na sisimulan niya sa Kapuso network.
INSTAGRAM ACCOUNT. Inanunsiyo rin ni Marian na mayroon na siyang Instagram account na ang user name ay "thereal marian." Ito ang kauna-unahang social-networking account ng aktres.
Ngunit kakaunti pa lang daw ang posts niya dahil "siyongaers" pa siya sa paggamit ng photo-sharing website na ito. Nagsimula raw siya noong Miyerkules ng gabi, April 24.
Forty-four accounts daw ang pina-follow niya sa Instagram—at hindi kasama rito ang dati niyang manager na si Popoy.
Paano kung mag-post ng mensahe ang kanyang bashers?
Sagot ni Marian: "Basher? Delete, block... tinuruan na ako ni Dong, tapos report abuse."
Si Dingdong Dantes ang kasintahan ni Marian.
Click here to watch the video