Film producer na ang dating three-term Quezon City councilor na si Mr. Antonio "Ariel" Enrile-Inton, Jr.
Matatandaang pagkatapos ng kanyang last term bilang konsehal ng 4th District ng nasabing siyudad, inasam niya ring tumakbo sa mas mataas na posisyon bilang alkalde nitong May 2010 elections, ngunit nag-withdraw rin ito sa simula pa lamang ng kampanya.
After the elections, kumuha ito ng filmmaking workshop sa Mowelfund Film Institute, kunsaan marami siyang natutunan at mas lumawak pa ang kanyang kaalaman sa daigdig ng pagpo-produce ng pelikula.
Dito siya na-encourage na itayo ang sarili niyang movie outfit, ang AEI Productions.
At bilang first venture, nakisosyo para mag-produce ang bagong tatag na production ni Mr. Inton with XITI Films para sa pelikulang Ang Babae Sa Sementeryo.
Short for Experimental International Trading, Inc., XITI Films is owned by Maria Gracia A. Lara. Ang pelikula ay mula sa screenplay at direksiyon ni Neal Tan.
Ang Babae sa Sementeryo ay ipapalabas sa November 10, 2010 sa mga piling sinehan.
Ayon sa supervising producer ng Ang Babae sa Sementeryo na si Mr. Junne Quintana nang makausap kamakailan ng PEP (Philippine Entertainment Portal), "Ang pelikula ay isang horror-suspense thriller na may social relevance. In fact, it is also a police story where thorough investigation is conducted to search for truth.
"Three ingredients—exploitation of women, prostitution, and poverty, complete the theme of the movie with a touch of supernatural element embellished with social conscience."
Dagdag pa ni Mr. Quintana, ang story idea ng pelikula ay mula mismo kay Mr. Inton, base sa mga aktuwal na mga nangyayari sa isang remote area na alam nito personally.
Kasama sa cast ang mga beteranong artista na sina Boots Anson-Roa, Roi Vinzon, Tommy Abuel, Maria Isabel Lopez, Ella Guevarra, Mon Confiado, Roldan Aquino, at Mercedes Cabral.
Itinatampok din dito ang pababalik-pelikula nina Isadora (nagbida sa ilang bold films noong '80s), Jigo Garcia, at Brylle Mondejar (na parehong galing naman ng That's Entertainment show ni German Moreno, kunsaan marami ring sumikat na artista).
SYNOPSIS. Ang Babae sa Sementeryo ay isang horror/mystery-suspense thriller tungkol sa mga multo at patayang nagaganap sa loob ng isang sementeryo sa isang malayong lugar sa bandang Norte.
Bukod sa mga misteryong nagaganap dito, mistulang parausan daw ang sementeryo ng mga upahang babaeng nagbebenta ng aliw.
Misteryo para sa mga taong nakatira sa paligid ng sementeryo ang mga bangkay ng mga taong pinatay sa karumaldumal na paraan—tulad ng pagkakatanggal ng mga mata, daliri, at iba pang bahagi ng katawan ng mga ito.
Naging palaisipan tuloy para sa kanila kung demonyo, kaluluwa o tao ba ang pumapatay.
Ang matandang binging si Ilac (Tommy Abuel) naman ang nagsilbing tagapagsalaysay sa tunay na mga nangyayari sa loob ng sementeryo.
Ayon sa kanya, ilang taon na ang lumipas nang mapadpad si Barbara (Maria Isabel Lopez) sa sementeryo at nakipisan sa amang si Ernesto (Roldan Aquino) na noo'y nakatira sa loob ng sementeryo at nagtatrabaho bilang sepulturero.
Nabuntis nito si Barbara at namatay matapos na magsilang ng sanggol na babae si Barbara. Nang lumaki ang sanggol na pinangalanan ni Barbara na Agnes (Ella Guevarra), naging laman na rin ito ng sementeryo.
Kasama ang inang nagbebenta ng aliw sa ilang parokyano. Halos gutumin ni Barbara ang anak, hanggang sa tuluyan na rin niya itong ibugaw.
Namatay si Barbara sa isang nakapangingilabot na paraan ng pagkakapatay. Ang anak nitong si Agnes ay kinupkop ng madreng si Sister Sol (Boots Anson-Roa). Si Arnel (Roi Vinzon) ang bagong hepe ng naturang bayan ang pilit na tumutuklas sa nangyayaring patayan.
Sa pagtatagni-tagni ng bawat kuwento ng ilang mga tauhan, tulad nina Ilac, Uming (Mon Confiado) na isa ring sepulturero, at Aliway (Mercedes Cabral) na isa namang bayarang babae ay nadiskubre ni Arnel na ang salarin sa tatlong babaeng pinatay sa loob lamang ng isang buwan ay ang anak ni Barbara na si Agnes.
Natuklasan ng mga madre ang tinatago nitong mga ilang parte ng katawan ng mga biktima. Nakabalot ng diyaryo ang ilan, habang ang iba'y nakasilid sa garapa na may formalin.
Natapos man ang kuwento at nalutas man ang kaso, patuloy naman ang hiwagang bumabalot sa nasabing sementeryo. Patuloy sa paglabas ang mga kaluluwang hindi matahimik at nagdudulot ng sindak at palaisipan sa mga nakakakita rito.
LOCATION AND SHOOTING. Ayon pa rin kay Junne, "Nag-shoot kami sa San Jose del Monte Cemetery at sa St. Joseph Parish, at ang ilan sa cast ay mga local residents na. Si Roi Vinzon, sa Bacolod na nakatira. Lumuluwas lang siya kapag may work dito sa Manila.
Sa hiwalay namang panayam ng PEP sa director nitong si Direk Neal, sinabi nitong naging smooth-sailing ang takbo ng produksyon ng Ang Babae Sa Sementeryo, mula sa shooting hanggang sa post production.
"Never kaming naka-encounter ng anumang major problems with regards to the filming hanggang sa editing, paglalapat ng musika at mixing.
"Gathering din ito ng ilang artistang hindi naging aktibo noong nakaraang mga taon tulad nina Isadora na nakilala at nagbida sa mga pelikula noong 80's.
"Sina Jigo Garcia at Brylle Mondejar na mga miyembro noon ng That's Entertainment ay nagbabalik-pelikula. During their first scene, halos mangatog ang tuhod ng dalawa dahil kinalawang na raw sila when it comes to acting at nanibago sa bagong teknolohiya.
"Pero at the end of the day, na-enjoy nila ang trabaho na patuloy nilang hinahanap-hanap at ngayon ay naging katuparan. Lalong gumaling sa pag-arte si Isadora na hinangaan ng mga tao sa set. Malamang dumami pa ang mga proyektong gagawin niya.
"Ninety percent ng buong pelikula ay kinunan sa loob ng sementeryo. Wala man kaming naramdamang kakaiba o nakitang mga pangitain, pero ang kaba at takot ay naroon pa rin, especially during the night kunsaan inaabot kami hanggang madaling-araw.
"Since public cemetery ang aming location, di maiiwasang makaamoy kami ng masansang na amoy dahil maraming bukas na nitso ang nasa loob ng sementeryo.
"Yung eksena kunsaan nagparaos si Mercedes Cabral at isang extra sa loob mismo ng bukas na nitso, nasa tabi pa nito ang isang sakong naglalaman ng mga buto ng patay nanakalibing dito.
"Exciting at masaya naman ang naging experience ng lahat dahil kakaiba ang pagbuo naming ng pelikulang ito," kuwento pa ni Direk Neal.
PRODUCTION STAFF.
Producers: AEI Productions and XITI Films
Direction and Screenplay: Neal Tan
Producer: Ariel Inton
Supervising Producer: Junne Quintana
Assistant Director: Joshua Pacquiao
Story Idea: Ariel Inton
Director of Photography: Renato "Atoy" Devera
Production Design: Cyrus Khan
Editor: Rocky Ko
Music: Sherwin Castillo
Prosthethic Make-up: CecilleBaun
Make-up: Oscar Buara