Arnold Reyes portrays Manuel L. Quezon onstage

Bilang bahagi ng pagdiriwang sa ika-70 taon ng pagkakatatag ng Quezon City kasabay ng selebrasyon ng ika-131 kaarawan ng dating Pangulong Manuel L. Quezon, ipinalabas kagabi, August 19, ang dulang MLQ: Ang Buhay ni Manuel Luis Quezon, Isang Dula. Ang buhay ng yumaong bayani at unang Pangulo ng Phillippine Commonwealth ay itinanghal sa PETA-PHINMA Theater sa New Manila, Quezon City.

Kabilang ang PEP (Philippine Entertainment Portal) sa mga naimbitahan para saksihan ang pagtatanghal ng naturang dula kung saan naging panauhing pandangal ang ilang kapamilya ni Manuel Quezon sa pangunguna ng kanyang anak na si Maria Zeneida Quezon at apong si Manuel Quezon Avancena. Special guest din si Quezon City Mayor Feliciano "Sonny" Belmonte Jr. Marami sa mga nanood ng play ay mga estudyante mula sa iba't ibang paaralan sa Quezon City.

ABOUT THE PLAY. Ang play na MLQ: Ang Buhay ni Manuel Luis Quezon, Isang Dula ay istorya ng buhay ng ating bayani at naka-base sa librong A Good Fight: An Autobiography by Manuel Luis Quezon. Inilahad sa dula ang buhay ni Quezon mula pagkabata hanggang sa siya ay mag-aral at makatapos ng Law sa University of Santo Tomas kunsaan maging fourth placer siya sa bar exam noong 1903. Ipinakita rin sa dula ang pagpasok sa pulitika ni Quezon mula sa pagiging councilor, governor, assemblyman, commissioner to the US House of Representatives, senador hanggang sa siya ay manalo sa unang presidential elections sa Pilipinas noong 1935, at maging unang Pangulo ng Phillippine Commonwealth. Kasama rin sa dula ang makasaysayang pagpapasa ng Tydings-Mcduffie Law, na nagbigay daan sa kalayaan at pagiging independent ng Pilipinas.

Ang dula ay isinasalaysay mula sa pananaw ng tatlong college students na gumagawa ng research paper tungkol sa buhay ni Quezon. Nagsimula ang dula habang nakatingin ang talong estudyante sa epitaph ni Quezon na matatagpuan sa Quezon Memorial Circle - "Statesman and Patriot, Lover of Freedom, Advocate of Social Justice, Beloved of the People." Tumakbo ang istorya base sa mga naturang paglalarawan kay Quezon. At dito ay masasaksihan ang kabayanihan at paninindigan ni Quezon.

Kahanga-hanga ang naging pagtatanghal dahil ginawang moderno at napapanahon ang presentasyon upang maka-relate ang mga estudyanteng nanood sa bulwagan. Hinaluan ito ng mga elemento ng musika, komedya, pagbabalik-tanaw at talumpati. Sa bawat tanong ng tatlong estudyante sa dula ay buhay nilang nakakasama si Quezon upang ipaliwanag sa kanila ang mga pangyayari.

Magaling ang pagkakaganap ng Cinemalaya 2009 Best Supporting Actor na si Arnold Reyes sa role ni Manuel Luis Quezon. Mahusay din ang pag-arte nina Joel Molina, Joshua Deocareza at Analin Bantug bilang tatlong college students na gumagawa ng reserach paper tungkol kay Quezon. Kapuri-puri rin ang pagganap sa mahahalagang papel ng iba pang members ng cast na sina Ron Alfonso, Mayen Bustamante, Eric dela Cruz, Stella Cañete, Richard Cunanan, Chinie Nepomuceno, Jun Ofrasio, Juliene Mendoza, Joel Saracho at Melvin Sumalinog.

Kahanga-hanga rin ang naiibang panulat at pagdidirek ni George de Jesus III.

ARNOLD REYES AS MLQ. Pagkatapos ng dula, nagkaroon naman ng pagkakataon ang PEP na ma-interview ang gumanap bilang Manuel L. Quezon na si Arnold Reyes.

Ayon sa aktor, magandang paraan ang pagtatanghal ng naturang dula para mas makilala si Manuel L. Quezon ng mga kabataan ngayon, higit pa sa nababasa nila sa mga history books.

"Maganda yung tinatalakay para ma-educate yung mga kabataan, lalo na yung mga taga-Quezon City, kung sino talaga si Manuel L. Quezon. Kung ano yung mga pinagdaanan niya, mula pagkabata hanggang sa maging pulitiko and eventually ay maging Pangulo ng Pilipinas," sambit ni Arnold nang ma-interview siya ng PEP kagabi.

Sabi pa ni Arnold, sadya raw nilang ginawang moderno at nilagyan ng komedya ang play para magkaroon ng appeal sa mga estudyanteng manonood. Ayaw raw kasi nilang maging boring ang palabas.

Ano ang feeling na matapos niyang gampanan sa documentary film na The Forgotten War si dating Pangulong Fidel V. Ramos, ngayon ay isa pang dating pangulo si Manuel L. Quezon naman ang ginagampanan niya?

"Oo nga, e. Actually, medyo mahirap itong ngayon kasi nine days lang kaming nag-rehearse. Nine days lang. Tapos na-complete yung script, yung first half tapos yung kalahati naibigay lang sa amin nung Saturday, so meron kaming three days lang to memorize. Awa ng Diyos, natapos naman natin."

Ano ang ginawa niyang paghahanda sa pagganap bilang si Quezon?

"Yung preparasyon, after ng rehearsal amain, on my way home nagme-memorize na ako, pagtulog, paggising. Kumbaga naging kaibigan ko yung script ko for ilang days yun. Well, natutuwa ako na nagkaroon ng Quezon, kasi naging instrumento siya para matamo ng ating bayan ang kasarinlan at kalayaan na hinahangad. Kahit na lahat hindi sumang-ayon sa kanya, may mga sumalungat din, pero naipatupad pa rin niya yung gusto niyang mangyari sa bayan, na tinatamasa naman natin ngayon."

GREATEST DISCOVERY. Ano yung greatest discovery niya kay Quezon habang ginagawa nila itong play na ito?

"Mas nagulat ako doon sa kabataan niya, e. Normal din pala siyang tao na nagsisinungaling, nanampal ng kalaro, sumusuway sa utos ng magulang. Pero lahat ng iyan naging learnings para sa kanya. Sa tingin ko, yun ang dahilan kung bakit siya naging mapanindigan na tao, kung bakit ganun ang pananaw niya.

"Sa mga nangyari sa buhay niya, sa mga magulang niya, sa naranasan niyang pang-aapi, yun ang naging dahilan kung bakit gusto niyang palayain ang ating bansa laban sa mga Kastila, sa Amerika. Yun ang dahilan kung bakit niya gustong maging independent nation tayo. Yun ang mga pinagdaanan niya. Nagpapasalamat din ako na nangyari sa kanya yun para eto tinatamaasa natin kugn anuman yung nai-contribute niiya sa bansa natin."

Na-pressure ba siya na may members ng family ni Quezon na nanood sa play, idagdag pa ang presence ni Mayor Sonny Belmonte?

"Actually, hindi ko nga tinignan yung audience kanina, e. Basta ang alam ko lang nandidiyan sila. Kung alam n'yo lang yung nerbiyos na pinagdaanan namin. Unang-una kulang talaga kami sa rehearsal. Kahapon lang kami nabuo talaga. Siguro yun na lang yung magic ng theater na sinasabi natin. Talagang kinabahan ako talaga. Hanggang sa matapos na yung show. Tapos nung magliwanag nakita ko yung mga mukha nila, dun lang ako naniwala, nandito nga sila. At sana na-appreciate nila."

Sa tingin niya, ano ang relevance ng dulang ito sa nalalapit na eleksyon sa 2010?

"Siguro kasi parang... hindi ba sinasabi, history repeats itself. Parang meron. Actually, nakakakilabot dahil maraming sinasabi sa speeches ni Quezon na malaki ang relevance ngayon sa nangyayari sa ating bansa. Siguro iyong pag-aano sa atin ng mga Amerikano, yung hanggang ngayon gusto nila tayong makontrol. Yung mga ganung aspeto ba, na hanggang ngayon masasabi nating may mga pulitiko pa ring bumibigay sa ganung sitwasyon."

MORE PROJECTS. Nanibago ba siya sa muling pagsabak sa teatro dahil mas madalas siya ngayong gumagawa ng indie films at projects sa TV at movies?

"Medyo nanibago ako kasi matagal na akong nag-theater. Puro indie na yung ginagawa ko. Tapos medyo nag-mainstream ako sa ABS-CBN. Tapos may tinapos akong pelikula, yung kay Ate Vi [Vilma Santos]. Medyo nanibago ako kasi yung huling play na ginawa ko medyo contemporary. E, ngayon may pagka-period, historical. At saka kailangan maniwala ang mga tao na ako si Quezon."

Bukod sa pag-arte sa teatro, busy din sa iba't ibang projects si Arnold . Malaking blessing daw sa kanya ang pagkakapanalo niya ng Best Supporting Actor para sa pelikulang Astig sa nakaraang Cinemalaya. Dahil nga rito ay mas dumami ang projects niya.

"Katatapos ko lang ng Vilma Santos movie with John Lloyd Cruz at Luis Manzano, yung In My Life ng Star Cinema. Sa September na ito ipapalabas. Asawa ako rito ng anak ni Ate Vi, si Dimples Romana. Kami yung pamilya na naiwan niya at nakasama sa Pilipinas. Kasi di ba, nag-migrate sa Amerika yung isang anak niyang si Luis at saka yung isa pang anak niya na si Paw Diaz.

"Sa TV, may mga soap ako na parating. After ng Only You, mayroong niluluto sina Boy [Abunda] for me. Tapos yung Astig, magko-compete kami sa Pusan."

Mapapanood pa rin si Arnold Reyes sa MLQ: Ang Buhay ni Manuel Luis Quezon, Isang Dula ngayong araw na ito, August 20. May dalawang huling pagtatanghal pa sila sa ganap na 2 p.m. at 6 p.m. sa PETA-PHINMA Theater sa New Manila, Quezon City.