Hindi itinatanggi ni Paolo Bediones na nalulungkot siya sa nalalapit na pamamaalam sa telebisyon ng S-Files. Naging bahagi ng buhay ni Paolo ang S-Files sa loob ng walong taon.
Hindi naitago ni Paolo ang lungkot na nararamdaman dahil mahal niya ang show at ang production staff ng S-Files.
Pormal na magpapapalam sa April 8 ang S-Files at papalitan ito ng bagong showbiz-oriented talk show, ang Showbiz Central.
Isang game show ang ibibigay ng GMA-7 kay Paolo kapalit ng S-Files at mapapanood din ito tuwing araw ng Linggo. Kung isasali pa siya sa Showbiz Central, magiging tatlo na ang Sunday shows ni Paolo bukod sa kanyang game show at ang Pinoy Meets World.
Ngayong mawawala na ang S-Files, iniisip ni Paolo na maging bahagi ng Unang Hirit. Hindi bago kay Paolo ang mga early morning shows dahil mainstay siya ng isang programa na pang-umaga noong nag-uumpisa ang kanyang television career, ang mornings@gma.