Ngayong araw ng Biyernes, June 8, nakatakdang ihatid sa kanyang huling hantungan ang namayapang ama ni Ellen Adarna na si Alan Modesto Adarna sa Queen City Memorial Gardens, sa Cebu City.
Pumanaw ang ama ng aktres sa edad na 58 dahil sa cardiac arrest noong nakaraang Huwebes, May 31.
Ngunit hindi nag-post sa social media ng anumang pahiwatig ng pagdadalamhati si Ellen, ang partner na si John Lloyd Cruz, at ang kanyang mga kapatid at iba pang kamag-anak.
Ninais daw kasi ng kanilang pamilya na maging pribado ang kanilang pagluluksa.
Noong nakaraang June 5, may nag-post naman sa Instagram ng larawang kuha sa lamay kung saan namataan sina Ellen at John Lloyd.
Ngayong araw, apat na magkasunod na videos ang ibinahagi ni Ellen sa kanyang Instagram Stories kung saan tila may ginaganap na huling selebrasyon para sa mga alaala ni Alan.
Tanging heart emoticons lamang ang nakalagay sa mga videos.
Si Ellen ay panganay at nag-iisang anak na babae sa limang magkakapatid.