"Guilty beyond reasonable doubt."
Ito ang hatol ng Malabon Metropolitan Trial Court sa viral billboard suitor na si Xian Gaza.
Ito ay kaugnay ng kasong paglabag sa Batas Pambansa (BP) 22 o Anti-Bouncing Checks Law na isinampa laban sa kanya ng dati niyang business partners na sina Jaime Asuncion at Melinda Cruz.
Dahil sa hatol na guilty, makukulong si Xian ng hanggang limang taon at anim na buwan.
Pinagbabayad din siya ng PHP2,180,000 bukod pa sa "legal interests and costs."
Sa kanyang Facebook post ngayong hapon, June 28, mismong si Xian ang naglabas ng kopya ng desisyon na pinirmahan ni Judge Maya Joy Camposanto.
Dahil dito, "feeling hopeless" daw siya.
Sa pamamagitan ng Facebook messaging, tinanong ng PEP.ph (Philippine Entertainment Portal) ang kontrobersiyal na social media personality kung totoo ba ang post niya at hindi ito gawa-gawa lang niya.
Maiksing sagot ni Xian, "Yes."
Sabi pa niya, may 15 araw siya upang maghain ng motion tungkol sa desisyon.
Nakilala si Xian ng publiko halos isang taon na ang nakararaan dahil sa kanyang pag-anyaya sa aktres na si Erich Gonzales sa isang coffee date sa pamamagitan ng isang billboard.