Ilan pang personalidad at mga kaanak ng kilalang pulitiko at artista ang tatakbo sa 2019 elections.
Kabilang dito sina Janella Estrada ng San Juan, Jerika Ejercito ng Maynila, at Jaycee Parker-Aguas ng Angeles, Pampanga.
Si Janella ay kasalukuyang vice mayor ng lungsod ng San Juan at anak ni dating Senador Jinggoy Estrada.
Nais ni Janella na mapanalunan ang puwesto bilang mayor na ilang taon ding hinawakan ng kanyang ama.
Lolo ni Janella ang kasalukuyang mayor ng Maynila na si former President Joseph “Erap” Ejercito-Estrada.
Ang kanya namang tiyahin na si Jerika Ejercito—anak ng kanyang lolo kay Laarni Enriquez—ay tatakbo sa pagka-konsehal sa ika-4 na distrito ng Maynila.
Tatakbo ang mag-tiyahin sa ilalim ng political party ni Erap na Partido ng Masang Pilipino (PMP).
Nag-file ng kanyang certificate of candidacy (COC) si Jerika ngayong araw, October 12, ngunit si Janella ay sa susunod na linggo pa magsusumite ng kanyang COC.
Samantala, tatakbong konsehal sa Angeles, Pampanga ang dating Viva Hot Babes member na si Jaycee Parker.
Ang kanyang mister na si Jericho Aguas—kasalukuyang konsehal at dating asawa ng namayapang si Isabel Granada—ay tatakbo naman bilang party-list representative ng ABE-Kapampangan party.
Si Jaycee ay tatakbo rin sa ilalim ng nasabing local political party.
Nag-file siya ng kanyang COC kahapon, October 11.