Inilunsad kamakailan ni Faith Cuneta ang kanyang bagong album under PolyEast Records titled Twist of Faith sa Centerstage, Tomas Morato Ave., Quezon City.
Hindi maitago sa mukha ng 28-year-old singer ang excitement, dahil dalawang taon na ang nakararaan mula noong huli siyang naglabas ng album, ang Faith Begins (The Live Album).
Sa Twist of Faith, ipinagmamalaki ni Faith na kahit puro revival ang laman ng kanyang bagong album ay may sarili naman siyang take sa mga kanta.
"I gave a little twist to each song," sabi pa ng pamangkin ni Megastar Sharon Cuneta nang makausap ng PEP (Philippine Entertainment Portal).
Gusto raw kasi ng PolyEast na puro revivals talaga ang gawin ni Faith. Mas madali raw kasing ibenta ang revival albums, kesa sa original albums.
"At saka ang mga tao ngayon parang ang gusto nilang pakinggan ay yung familiar na sa kanila, yung alam na nila ang mga kanta," pagsang-ayon naman ni Faith sa desisyon ng kanyang record label.
Mga sumikat na kanta mula sa mga batikang artists ang nakapaloob sa album ni Faith.
Kabilang rito ang mga awitin nina Regine Velasquez ("Damdamin Ko Sa 'Yo," "Kung Maibabalik Ko Lang," "Hindi Na, Ayoko Na"), Ogie Alcasid ("Dito Sa Puso Ko," "Please Don't Go Away"), Jessa Zaragoza ("Paano Kaya?"), Eva Eugenio and Eugene Villaluz ("Gulong Ng Palad"), The Boyfriends ("Paniwalaan Mo"), Agot Isidro ("Sa Isip Ko"), Dingdong Avanzado ("Bakit Labis Kitang Mahal"), at Lea Salonga ("Mula Noon Hanggang Ngayon").
EASY LISTENING. Ang kaibahan pa raw sa bago niyang album na ito ay ang hindi niya pagbirit sa mga kanta.
"For a change naman, kasi ang mga recent albums ko ay medyo birit-birit ang mga kanta. Para maiba naman, kasi masarap din naman pakinggan ang easy listening music," aniya pa.
Itinuturing din ni Faith na challenge para sa kanya ang pagkanta nang hindi bumibirit nang husto o iyon ngang masasabing easy-listening music.
"Alam mo naman ang mga Pinoy, pag kumanta ka na mataas ang tono, doon nila nakikita na mas magaling ang isang singer. Yun ang batayan nila pag na-reach ng singer ang high notes.
"Sa pagkanta naman ng easy listening music like the songs in my album, dapat suwabeng-suwabe ang dating. Dahil kung hindi, pangit ang magiging effect nito. Kaya dapat maganda ang arrangement ng kanta," pahayag pa ni Faith.
Nagsimula noon si Faith bilang lounge singer, hanggang sa mapasikat niya ang awiting "Pag-ibig Ko'y Pansinin," ang theme song para sa Korean drama series sa GMA-7 na Stairway to Heaven.
Ni-revive at pinasikat din ni Faith ang hit song ng kanyang Tita Shawie na "Pangarap na Bituin" para naman sa Korean drama series ulit na Jewel in the Palace. Kaya't hindi maitatanggi na isa talaga si Faith sa mga kilalang singers ngayon sa bansa.
Pero pagkatapos ilabas ang kanyang live album na Faith Begins noong 2007, hindi masyadong napagkikita si Faith sa local music scene.
Katwiran naman ni Faith, naging busy raw siya sa kanyang shows abroad nang mga panahong iyon. Pero ngayong meron na naman siyang bagong album, makikita raw siyang muli rito para mag-promote.
Pero tanong ng PEP, ano ba ang bagong maibibigay ni Faith sa kanyang mga tagahanga, ngayong napakarami nang bagong singer ang namamayagpag?
"As a singer, gusto ko lang naman ay kumanta nang kumanta. Hindi naman ako competetive na tao. Hindi ako nandito para makipag-compete. I am here to sing and to share my talent to everyone," sagot ni Faith.
LACK OF RECOGNITION. Pero sa kabila ng angking husay sa pag-awit ni Faith, may mga nagtatanong pa rin kung bakit tila kulang sa nararapat na pagkilala kay Faith Cuneta.
"Hindi ko rin alam kung bakit ganyan. Ayoko rin naman magsalita kung bakit ganyan ang nangyayari. Di ko alam kung kulang ako sa support ng industry o namimili ba ang industry ng susuportahan. I really don't know. Pero siguro nasa palad ng tao iyon kung susuwertihin siya. I am trying my best naman.
"At saka as I've said, hindi naman ako competitive. Hindi naman ako nakikipag-compete. What is important is I am able to share my talent," pagtatapos ni Faith.
Available na ang Twist of Faith sa music stores nationwide, released by PolyEast Records.