Ikinasal na si Christian Bautista, 37, sa kanyang non-showbiz girlfriend na si Kat Ramnani, 34, ngayong Sabado, November 17.
Ginanap ang kanilang kasal sa Ocean Chapel sa Tirtha Uluwatu Resort, sa Bali, Indonesia ngayong hapon.
Kabilang sa mga dumalo sa kasal ay ang Star In A Million batchmate ni Christian na si Erik Santos at ang singer na si Cris Villonco.
Noong October 30, 2017 nag-propose si Christian kay Kat sa Venice, Italy.
Subalit inanunsiyo lang nila ang kanilang engagement noong November 3, 2017, o apat na araw pagkatapos ng proposal.
December 2015 unang ibinahagi ni Christian sa PEP.ph (Philippine Entertainment Portal) na mayroon siyang bagong dine-date, subalit hindi muna siya nagkuwento tungkol sa identity nito.
Pagkatapos ng pitong buwan, noong July 1, 2016, dinala ni Christian si Kat sa first public appearance nila bilang magkarelasyon noong Preview Ball.
Ayon sa eksklusibong panayam ng PEP.ph kina Christian at Kat na ipinublish noong November 13, 2018, taong 2014 sila unang nagkakilala sa isang gathering na inayos ng TV host na si Cesca Litton.
November 2015 naman nagsimulang ligawan ni Christian si Kat, na sa kasalukuyan ay head of Strategy and Program Management sa ilalim ng content business team ng isang telecommunications company.