Sa kauna-unahang pagkakataon ay nagsalita si Sylvia Sanchez hinggil sa pagkaka-link ng kanyang anak na si Arjo Atayde sa Eat Bulaga! host na si Maine Mendoza.
Ayon sa 47-year-old actress, hindi lingid sa kanya ang mga lumalabas na larawan nina Arjo, 28, at Maine, 23, sa social media.
“Nakikita ko siyempre yung mga litrato. Nababalitaan ko.
"Mas nauuna yung social media sa 'kin," sabi ni Sylvia sa episode ng ABS-CBN morning talk show na Magandang Buhay, nitong Lunes, November 19.
Sabi pa ng award-winning actress, “Tinatanong ko si Arjo, ngingitian lang ako.
"Walang usapang ganun sa bahay."
Dagdag ni Sylvia, nirerespeto niya ang anak sa desisyon nitong huwag magsabi sa kanya.
“Basta ako, kung ano yung gusto niya, kung ano yung ayaw niyang sabihin sa amin, sirekto niya, respeto.
“So, kung anuman yung ginagawa ng anak ko, buhay niya 'yan, e.”
Ang tiniyak ni Sylvia ay masaya ang kanyang anak ngayon.
“Masaya ang anak ko, at yun ang importante sa akin bilang ina.”
Una nang nagsalita si Arjo sa napababalitang relasyon nila ni Maine.
Matipid ang sagot ng binata sa tunay na estado ng kanilang relasyon ni Maine, pero sinabi niyang masaya siya.