Narito sa Pilipinas ang international alternative rock band na Gin Blossoms para sa kanilang concert, Gin Blossoms in Manila and Cebu.
Kasama ang PEP (Philippine Entertainment Portal) sa mga dumalo sa presscon ng American rock/pop band na ginanap sa Crowne Plaza sa Ortigas kagabi, November 16.
Nakilala ang Gin Blossoms noong dekada '90 dahil sa kanilang mga kanta tulad ng "Til I Hear it From You," "Hey Jealousy," "As Long as it Matters," "Found Out About You," at "Follow You Down."
Nang gabing iyon, pinakita nina Robin Wilson (lead vocals), Jesse Valenzuela (guitars/vocals), Scott Johnson (guitars), Bill Leen (bass) at John Richardson (drums), ang kanilang angking sense of humor sa pagsagot sa mga tanong ng Philippine press.
Ano ang mae-expect ng mga tao sa kanilang concert na gaganapin bukas, November 18, sa Araneta Coliseum?
"We rented 50 smoke machines so you will not be able to see the band," biro ng frontman ng banda na si Robin Wilson.
Nang matanong naman kung ano ang inspirasyon nila sa kanilang mga kanta, muli na namang natawa ang press sa kanilang sagot.
"Most of our songs are about road trips and ex-girlfriends. Our inspiration tends to be roadtrips and ex-girlfriends," anila.
FIRST CONCERT IN THE PHILIPPINES. Ito ang kauna-unahang pagtatanghal ng Gin Blossoms sa Pilipinas. Pero bukod daw sa kagandahan ng bansa ay may iba pa silang napansin.
"It's our first time here and it's really beautiful. But I've noticed that the escalator steps are about an inch taller than they are in North America. I'm not sure why," sabi ni Robin.
But seriously, excited daw sila mag-perform para sa mga Pilipino.
"I would say that the ideal audience for us is the Filipino audience. We're excited to play for you, guys. So, we'll be focusing on remembering our parts. I think it's gonna be great and we'll have a lot of fun. So, I hope you guys could come and have fun with us."
Sa lahat daw ng kanilang mga kanta gustung-gusto nila ang hit single na "Hey Jealousy."
"It's always a thrill to perform 'Hey Jealousy' because that's when the crowd is most excited."
Siyempre hindi rin daw nila kakalimutang kantahin ang "As Long As It Matters" na naging popular rin dito sa Pilipinas.
Bukod sa kanilang concert sa Araneta, naka-schedule din na magtanghal ang Gin Blossoms sa Waterfront Cebu sa November 20. Ang front act nila ay ang Australian rock band na Fahrenheit 43, kasama rin ang mga sikat na local acts na kinabibilangan nina Cookie Chua, Gloc-9, De Lara at 6 Cyclemind.
BRIDGING THE GAP. Naniniwala si Christian Andoy, president ng Blue Dream Entertainment, producer ng Gin Blossoms concert, na isang rare chance ito para mapanood ng mga Pinoy ang naturang banda.
Aniya, "This is our way of bridging the gap between Filipinos and these musical geniuses. This happens only once in a Filipino rock fan's lifetime, so make it a point to join us in this event. Let's celebrate the artistry of Gin Blossoms and the power of music."
Ang Blue Dream Entertainment din ang nagdala kay American Idol Season 8 runner-up Adam Lambert dito sa Pilipinas. Nangangako ang Blue Dream na masusundan pa ito ng iba pang sikat na foreign acts.
"We promise everyone that we will continue to bring important foreign acts to the country. We are very thankful that people support us in our concerts," sabi pa ni Mr. Andoy.
BACKGROUND OF GIN BLOSSOMS. Nabuo ang Gin Blossoms noong 1987 sa Tempe, Arizona. Nakuha nila ang pangalan ng banda mula sa picture ng komedyanteng si W.C. Fields na may caption na "W.C. Field with gin blossoms" na tumutukoy sa "gin-ravaged nose" ng komedyante na dulot umano ng heavy drinking.
Bagama't matagumpay ang mga ini-release nilang albums na Dusted at New Miserable Experience (kung saan nakapaloob ang ilan nilang hits gaya ng "Hey Jealousy," "Found Out About You," "Mrs. Rita," "Allison Road," at "Until I Fall Away"), naharap din sa ilang pagsubok ang banda dahil na rin sa pagpapalit ng kanilang mga miyembro.
Sa kabila ng mga pagsubok, muling naglabas ng album ang banda, ang Congratulations, I'm Sorry, kunsaan nagmula ang hits nilang "As Long As It Matters," "Follow You Down," "Till I Hear It From You," at "Day Job." Ang mga naturang kanta ay pumasok sa Billboard Top 10 at nagbigay pa sa album ng platinum status.
Ang hit song nilang "As Long As It Matters" ang nagbigay sa Gin Blossoms ng kanilang kauna-unahang Grammy nomination para sa Best Performance by a Duo or Group.
Ang kanilang mga kanta ay ginamit din bilang soundtrack sa ilang memorable movies noong '90s, gaya ng Empire Records ("Till I Hear It From You") at Wayne's World 2 ("Idiot Summer").
Noong 1997 ay na-disband ang Gin Blossoms dahil sa kagustuhan ng ibang miyembro na magtrabaho nang solo.
Pero muli silang nag-reunite noong 2002 para sa kanilang 80-city performance tour sa Amerika kasabay ng pagre-release ng album nilang Major Lodge Victory.
Noong 2009 naman ay nag-release sila ng kanilang unang Live in Concert album.
At ngayong taon nga ay muli na namang nagpo-promote ang Gin Blossoms ng kanilang bagong album, No Chocolate Cake, bannered by their first single na "Miss Disarray."
Para sa tickets sa Araneta Coliseum concert ng Gin Blossoms sa November 18, maaring tawagan ang Ticketnet sa Tel. No. 911-5555.
Para sa Waterfront Cebu concert on November 20, tumawag sa Tel. No. (032) 232-6888. For inquiries, pwede ring tumawag sa Blue Dream Entertainment sa Tel. No. 750-0790 to 91.