Tinuldukan na ni Michela Cazzola at James Yap ang usap-usapang mayroon silang alitan nitong mga nakaraang araw.
Ito ay matapos bigyang kulay ng ilang netizens ang recent Instagram posts ni Michela kung saan hindi nito kasama ang partner na si James.
Tanging ang panganay na anak nilang si MJ ang kasama ni Michela sa pagbabakasyon nito sa Ilocos Norte.
Pinuna rin ng ibang nang-iintrigang netizens kung bakit hindi dumalo si Michela sa kasal ng kapatid ni James sa Tagaytay.
Ngunit kagabi, November 28, sabay na nag-post sina Michela at James sa kani-kanilang Instagram account ng litrato kasama ang dalawa nilang anak.
Nakasaad sa post ni James na ipinadiriwang nila na five months old na ang bunso nilang si Francesca.
"Happy 5th month to our princess Francesca! Papa and Mama will always be here for you [heart emoji] We love you very much [birthday cake]," saad ng PBA player.
Mayroon ding kahawig na post si Michela kasama ang buong pamilya nila.
Tila ito ang sagot nina Michela at James sa mga netizen na nang-iintriga sa kanila.
Lalo na't sinang-ayunan ni Michela ang isang comment ng netizen na nagsasabing hindi basehan ang posts sa social media ng magandang pagsasama ng dalawang tao.
