Kinumpirma ng twins na sina Joj at Jai Agpangan na may hindi pagkakaunawaan ang dating JuanBie love team na sina JM de Guzman at Barbie Imperial.
Sina Joj at Jai ay malapit na kaibigan ni Barbie.
Nakatrabaho rin ni Jai sina JM at Barbie sa defunct ABS-CBN prime time series na Araw Gabi.
Hindi idinetalye ng kambal kung anong pinag-ugatan ng alitan nina JM at Barbie, pero nagulat daw sila nang madawit sa isyu si Axel Torres.
Kaugnay ito ng patutsada ni JM na ang dapat kuwestyunin ng netizens ay ang ugnayan nina Barbie at Axel, imbes daw na ang aktor ang nagiging tampulan ng pambabatikos sa social media.
"Ako ang magsabi, wala talaga sila, promise!" sabi ni Jai patungkol sa diumano'y ugnayan sa pagitan nina Barbie at Axel.
Baka raw na-misinterpret ni JM ang pagiging magkaibigan nina Barbie at Axel.
Dagdag ni Joj, "Minsan baka naprapraning ang tao or nagko-conclude ng things, pero wala talaga.
"Kaibigan din kasi namin 'yan si Axel, e. So, alam ko talaga na wala, na friends lang sila ni Barbie."
Eksklusibong nakapanayam ng PEP.ph (Philippine Entertainment Portal) sina Joj at Jai sa Star Magic Gives Back 2018, na ginanap sa Good Samaritan Nursing Home sa Marikina Heights, Marikina City, noong Sabado, December 1.
REAL-LIFE ROMANCE?
Natatawang umiwas ang kambal nang usisain namin ang tungkol sa away-bating relasyon nina JM at Barbie.
"Naku, Ate! Hahaha!" pakli ni Joj.
Naging magkarelasyon ba sina JM at Barbie?
Sagot ni Joj, "Hindi siguro maiiwasan na magkaka-develop-an kayo kapag love team kayo.
"Pero for me lang, it's up to them talaga.
"Respeto ako sa kanila, both sides, kung anong relationship nila."
Naniniwala ang kambal na maaayos din nina JM at Barbie kung anuman ang naging alitan ng mga ito.
"Kasi minsan sobrang busy ko naman, hindi ako nakaka-check ng social media.
"Pero ang wish ko lang sana, magbati sila.
"Magbati 'yan, sus, sila pa bang dalawa!"
Sabi ni Joj, "At saka kung anong nabuong bond nila sa Araw Gabi, for sure, if it's genuine, di ba..."
Dugtong ulit ni Jai, "Oo, babalik 'yan. In time siguro."
Bilang malapit na kaibigan ni Barbie, anong ipinapayo nila rito?
Sagot ni Jai, "Always guard your heart. At saka, naku, career muna!"
Sabi naman ni Joj, "Sabi ko, 'Bata ka pa naman, enjoy mo lang 'yan. Be thankful sa blessings mo. Mag-strive hard ka pa sa work field mo.'
"Kasi dami niyang blessings, e."
Dagdag ni Jai, "Pag may pinagdadaanan, dapat palakas ka lang nang palakas para maging stronger version ka ng sarili mo."
BACK STORY
Hindi kaila sa mga sumusubaybay kina JM at Barbie na umani ng pambabatikos ang aktor dahil sa diumano'y panggagamit at panloloko niya sa dalaga.
Inakusahan si JM ng ilang netizens na nasaktan si Barbie nang malamang may ugnayan diumano sa pagitan ng aktor at ng leading lady niya sa Kung Paano Siya Nawala na si Rhian Ramos.
Sunud-sunod ang naging pagsagot ni JM sa netizens upang linawin na magkaibigan lang sila ni Rhian.
Humingi rin ng dispensa si JM kay Rhian at pati na rin sa fans na na-offend sa isyu.
Sa kabilang banda, hindi nakaligtas sa netizens ang malamang "young but not stupid" tweet ni Barbie gitna ng espekulasyong may alitan sila ni JM.
Noon lamang November 12 ay sweet na sweet pa sina JM at Barbie, na ipinost pa sa Instagram ang regalong teddy bear at love letter sa kanya ng binata.
Nakasaad sa bahagi ng love letter ni JM kay Barbie: "I will love you with all my heart."