Eksaktong dalawang linggo pagkatapos ikasal ni Christian Bautista kay Kat Ramnani sa Bali, Indonesia, ang ex-girlfriend naman ng singer na si Carla Dunareanu ang ikinasal.
Ikinasal ang Romanian-Chinese actress-VJ sa Filipino radio DJ at sportscaster na si Boom Gonzalez sa Sentosa Resort, Singapore, noong Sabado, December 1.
Sa kanyang Instagram account, nag-post si Carla ng mga larawan na kuha sa kasal nila ni Boom.
Dito ay inilarawan niya si Boom bilang kanyang “best friend” at “love of my life.”
Sunud-sunod din ang pagpu-post ni Boom sa Instagram Stories tungkol sa kasal nila ni Carla.
Bukod sa pagiging VJ at aktres, si Carla ay host sa HBO Asia.
Si Boom naman ay kilalang sportscaster sa ABS-CBN sports channel na Sports+Action.
Kinumpirma ni Carla ang paghihiwalay nila ni Christian noong August 2013, pagkatapos ng higit isang taong relasyon.
Ikinasal si Christian kay Kat Ramnani sa Bali, Indonesia, noong November 17.
Kahapon, December 2, ginanap ang grand reception nila sa The Manila Hotel.