Sa isang bihirang pagkakataon, pumayag si Ellen Adarna na makunan ng litrato kasama ang malapit na kaibigang si Beauty Gonzalez.
Base ito sa ibinahaging Instagram post ni Beauty ngayong Lunes, December 10.
Excited na pahayag ni Beauty, "Hey Stranger!"
Dagdag pa ng Kadenang Ginto actress, blooming ang hitsura ni Ellen ngayon.
"Isn't she lovely?" saad ni Beauty sa comments' section ng kanyang post.
Tila ito ang kauna-unahang pagkakataong nagkita ang dalawa mula nang manganak si Ellen noong Hunyo.
Lalo pa't nag-post din si Beauty sa kanyang Instagram Story ng litrato kuha ang paa ng baby nina Ellen at John Lloyd.
STAYING AWAY FROM SHOWBIZ
November 18, 2017 nang maiulat ng PEP.ph (Philippine Entertainment Portal) na buntis si Ellen, at si John Lloyd Cruz ang ama ng ipinagbubuntis ng sexy star.
Noong panahong iyon ay makailang-beses ding natanong si Beauty tungkol sa balitang pagbubuntis ni Ellen, pero hindi kailanman kinumpirma ng huli ang pagdadalantao ng kaibigan.
Tuluyang nakumpirma ang kundisyon ni Ellen nang kumalat sa social media ang kuha niyang may baby bump habang nagbabakasyon sila ni John Lloyd sa Palawan noong May 2018.
Nasundan ito ng pagkumpirma ng abugado ni Ellen tungkol sa pagbubuntis ng aktres, noong kasagsagan ng "paparazzi" controversy na kinasangkutan nito noong Mayo hanggang Hulyo.
October 2018 naman nang tuluyang ipinagmalaki nina John Lloyd at Ellen ang pagkakaroon nila ng supling, base sa posts ng mga ito sa Instagram.
WITNESS TO JOHN LLOYD-ELLEN LOVE STORY
Samantala, hindi kaila sa publiko na saksi si Beauty sa pag-usbong ng love story nina John Lloyd at Ellen.
Bandang March 2017 nang mamataan ang grupo nina Beauty, Ellen, at John Lloyd na nagbakasyon sa Ilocos Norte.
Naging saksi rin naman sina Ellen at John Lloyd sa engagement ni Beauty at boyfriend nitong si Norman Crisologo sa bakasyon nilang iyon.
Patunay ng closeness ng mga ito ay kinuha ni Beauty na godparents sina Ellen at John Lloyd ng anak ng una.
Sa parte ni Beauty, ilang beses na rin niyang nasabi na suportado niya sina Ellen at John Lloyd sakaling magdesisyong lumagay sa tahimik ang dalawa.
At hindi raw papayag si Beauty na hindi siya imbitado sa oras na magpakasal sina Ellen at John Lloyd.
"They're very close to me and to my family," dagdag ni Beauty sa panayam sa kanya ng PEP.ph noong November 2017.