Tunay ngang may forever sa pagmamahalan nina Aljur Abrenica at Kylie Padilla, na ikinasal pitong taon mula nang una silang naging magkarelasyon.
Pero hindi lang ang mag-asawang Kylie at Aljur ang nagpamalas ng kilig moments sa kanilang pag-iisang dibdib sa Villa Milagros ancestral home, sa Rodriguez, Rizal, kagabi, December 11.
VIN ABRENICA & SOPHIE ALBERT
Pati ang matagal nang magkasintahang sina Vin Abrenica at Sophie Albert ay hindi nagpahuli sa pagiging sweet sa isa't isa.
Si Vin ay nakababatang kapatid ng groom na si Aljur.
Nagpakuha ng litrato sina Vin at Sophie habang nakatingin sa isa't isa, base sa kanilang posts sa Instagram.
Sabi ni Sophie, "So much love in the air today. [heart emoji] #AljurKyliEpicAfter"
Limang taon nang magkarelasyon ang Kapamilyang si Vin at Kapusong si Sophie.
Bukas si Vin sa pagsasabing si Sophie na ang babaeng gusto niya makasama habambuhay.
Nagsimula ang kanilang relasyon nang pareho pa silang nasa bakuran ng TV5, kung saan sila ang itinanghal na winners sa artista search na Artista Academy.
GABBI GARCIA & KHALIL RAMOS
Ang rumored sweethearts na sina Gabbi Garcia at Khalil Ramos ay kabilang din sa celebrity guests na dumalo sa kasal nina Aljur at Kylie.
Ang maiksing caption ni Gabbi sa litrato nila ni Khalil, "Oohhh so formal [smiley with tongue sticking out] #AljurKyliEpicAfter."
Nito lang November umamin sa PEP.ph (Philippine Entertainment Portal) si Khalil na isang taon na silang "exclusively dating" ni Gabbi.
Hindi pa man daw sila opisyal na magkarelasyon, nabanggit ng ABS-CBN singer-actor na si Khalil na umaasa siyang tuluyan niyang magiging girlfriend ang GMA star na si Gabbi.
Nakatutuwa ring isipin na ang tatlong couples na nabanggit ay mula sa magkaribal TV stations, isang patunay na walang network war pagdating sa pag-ibig.