Kabilang sa ginawang charity day ni Miss Universe 2018 Catriona Gray ay ang pagbisita sa mga batang naulila dahil sa kampanya ng gobyerno laban sa illegal drugs o ipinagbabawal na gamot.
Bumisita ang Filipino-Australian beauty queen sa St. Peter’s Parish sa Commonwealth Avenue, Quezon City, nitong February 27, Miyerkules.
Nakihalubilo si Catriona sa mga batang kabilang sa The Program for The Orphans, na proyekto ng Abot Kamay Alang-alang sa Pagbabago o AKAP, isang community-based drug rehabilitation program ng Diocese of Novaliches.
Ang AKAP ay pinangungunahan ni Father Tony Labiao, Vicar General for Pastoral Affairs ng Diocese of Novaliches.
Ayon sa ulat ng GMA News Online, nakikiisa si Catriona sa panawagan sa publiko dahil sa kakulangan ng konkretong “intervention programs” para sa mga naulila ng campaign against illegal drugs.
Sa kanyang speech, mensahe ni Catriona sa mga bata, "Never forget that you are loved and wanted, and that God loves you."
Bukod sa pagbisita sa mga batang kabilang sa The Program for the Orphans, bahagi rin ng Charity Day noong Miyerkules ang pagbisita ni Catriona sa Young Focus Foundation, ang sinusuportahan niyang non-government organization o NGO na tumutulong sa mga nangangailangang bata sa Tondo.
Pumunta rin siya sa LoveYourself, Inc., na organisasyon na nananawagan para sa edukasyon sa HIV; at bumisita sa mga bata ng Smile Train sa Philippine Band of Mercy sa Quezon City.