Bagamat regular na screening lamang ang pinakita sa limang minutong sneak preview ng RPG: Metanoia, marami pa rin ang namangha sa animation na ginawa para sa pelikula.
Pinakita ang sneak peek ng pelikula sa atrium ng Shangri-la Mall noong Linggo, Disyembre 5.
Ang RPG: Metanoia ay kauna-unahang 3D animated na pelikula sa bansa, sa direksyon ni Luis Suarez. Ayon sa producers ng RPG, ang 3D film na ito ay graded A ng Cinema Evaluation Board.
Ayon sa director, inabot ng halos limang taon ang paggawa ng pelikula at lahat ng animation ay ginawa dito sa bansa. Gayunman, sa loob ng panahong ito, hindi raw nawala ang kanilang interes para gawing maganda at tapusin ang pelikulang ito na kalahok sa 36th Metro Manila Film Festival ngayong taon.
"On our part, 'yong producer namin from Ambient Media, we have the full support from them. Wala po talagang pressure na binibigay sa amin sa ginagawa namin. Ang expectations lang nila, which is all they can really ask from anyone, is that we do our best, we give our hundred percent while we're putting together the film.
"I think, in that respect, we didn't disappoint them. We really give a hundred percent in each and everything," pahayag ni Direk Luis Suarez.
Aminado ang direktor na alam niyang hindi masyadong naging patok sa takilya ang mga nakaraang local animated films.
"Aware na kami talaga doon," sabi ni Direk Lui. "Actually, noong lumabas ang Urduja (2008) at saka Dayo (2008), we were already at work on this film, ginagawa na talaga namin siya. If we look at 'yong performance noong other films, it's just a piece of what we're trying to do.
"We just kept doing the best we possibly can. In the end kasi, it all boils down to the quality and amount of love you put into the film. So, we support all those other movies. But we try not to think about how those movies affected the industry. We're just trying to make sure that when we come out, we'll still be able to do the movie right."
Positibo rin ang grupo nina Direk Lui na tatangkilikin ng Pilipinong manonood ang RPG Metanoia sa darating na Disyembre 25.
Ayon kay kay Direk Lui, "We understand that 'yong Filipino audience has grown a lot the last few years. And we think that they're ready for a movie like this. I think everybody is capable of appreciating the movie na ginawa namin. So, we're really hoping for the best."
Bukod pa rito, inengganyo rin niya ang mga manonood, "I think we should support all the other movies. They are all well made. And I think we all have a pretty good chance."
ANG MUNDO NG METANOIA. Ang istorya ng RPG: Metanoia ay iikot sa buhay ng pangunahing karakter na si Nico (boses ni Zaijian Jaranilla), ang batang mahilig maglaro ng role-playing game na Metanoia.
Ang paglalaro ng virtual games ang mas gustong libangan ni Nico sa halip na maglaro sa labas ng bahay. Parehong abala sa kani-kanilang mga trabaho ang kanyang nanay (boses ni Eugene Domingo) dito sa Pilipinas habang ang kanyang ama (boses ni Aga Muhlach) ay naka-destino sa ibang bansa.
Kung sa totoong buhay, sinasabing isang lampang bata si Nico, kabaligtaran naman ito sa tuwing maglalaro na siya bilang Zero sa Metanoia.
Kasama ang kanyang mga kaibigan, na kapwa babad din sa paglalaro ng online game na ito, sasali si Nico sa pinakamalaking online tournament ng taon, ang Metanoia 2.0: World War.
Subalit sa bisperas ng tournament, habang ang mga online gamers ay naghahanda, isang puwersa rin ang nagbabalak sakupin ang mundo.
Alamin kung papaano haharapin ni Nico at ng kanyang mga kaibigan ang pinakamalaking hamon ng kanilang buhay—ang sagipin ang milyung-milyong tao mula sa di kilalang kalaban.
Bukod kina Zaijian, nandito rin ang ilang Kapamilya child stars na sina Aaron Junatas (as Bobby aka Sumpak), Basty Alcances (as Mark aka Ahdonis), Jairus Aquino (as Bryan aka Mang Ernie), at Mika dela Cruz (as May aka C4ss4ndr4) na magbibigay boses sa mga kaibigan ni Nico.
Maririnig din sa pelikula ang mga boses nina Vhong Navarro (as Cel), Ketchup Eusebio (as Andrew), and Igiboy Flores (as David).
Ang RPG: Metanoia ay opisyal na entry ng Ambient Media, Star Cinema, at Thaumatrope Animation sa 36th Metro Manila Film Festival na magsisimula sa Disyembre 25, 2010.
