Hindi lang nanalo ng award, kundi pinanindigan pa ng isang New Zealand film festival organization ang isang Filipino docu-film na tampok ang mga kababayan nating ipit sa isyu ng West Philippine Sea.
Ito ang pelikulang Food Delivery: Fresh from the West Philippine Sea, na idinirek ni Baby Ruth Villarama.
Nitong March 2025, una nang naging entry ang pelikula sa isang local film festival, pero last minute ay na-pull out ito dahil sa controversial subject ng pelikula.
Pero nito lamang June-July 2025, naipalabas ang pelikula sa Doc Edge Film Festival sa Auckland, New Zealand.
Ito rin ang pinakaunang screening ng Filipino docu-film.
Ang Doc Edge ay prestihiyosong docu-film festival sa New Zealand, at Oscar-qualifying festival para sa feature at short docus.
Bukod sa nabigyan ng screening, iginawad pa ng Doc Edge Film Fest organization ang Tides of Change Award sa Food Delivery: Fresh from the West Philippine Sea.
"This is for every Filipino defending the West Philippine Sea. In the face of silence and fear, we carry the truth and now the world hears us," post ng film sa official Instagram account nito.
Dagdag pa nito, simula pa lamang ito para mas marami ang makapanood ng pelikula.
Ang documentary film ay kuwento ng mga Pilipinong mangingisda, Philippine Coast Guard, at Navy personnel na naninindigan para sa kanilang karapatan at para ipagtanggol ang teritoryo ng Pilipinas.
Kuwento ito ng mga pinagdaraanan nila sa gitna ng hidwaan ng Pilipinas at ng China kung sino ang may karapatan sa West Philippine Sea.
Ang agawan sa Scarborough Shoal ay isang longstanding dispute sa pagitan ng bansa at China. Ito ay kahit pinaboran na ng Permanent Court of Arbitration sa The Hague ang Pilipinas sa inilabas nitong July 2016 ruling.
Nagmamatigas ang China at ayaw pa ring isuko ang Philippine territory.
Kaugnay nito, patuloy na tinatangka ng China na harangin ang pagpapalabas ng Food Delivery sa loob at labas ng bansa.
Lumalabas na hinarang ang pelikula kaya hindi ito naipalabas sa Puregold CinePanalo 2025 film fest noong Marso 2025.
Binanggit ito mismo ng Kapuso actress na si Therese Malvar, na associate producer din ng pelikula, sa kanyang Instagram post kasunod ng award na napanalunan ng docu-film sa New Zealand.
Bahagi ng kanyang post (published as is): “From being banned in its own country to now being screened internationally — and still, with a Filipino audience by our side (thank you NZ Filipino community for the support).”
Sinabi ng film creators na "external factors" ang dahilan ng pag-pull out noon sa pelikula sa Puregold CinePanalo 2025.
Read: Misis ni Emil Sumangil, nanawagan ng dasal para sa kaligtasan ng 24 Oras anchor
CHINESE CONSULATE TRIES TO STOP SCREENING
Sa kabila ng kinasasangkutang kontrobersiya ng Food Delivery, nilinaw ng film director na hindi political ang pelikula.
Simpleng kuwento ito ng mga ordinaryong tao—mga mangingisdang ipinaglalaban ang kanilang kabuhayan, at mga armed forces na naatasang ipagtanggol ang kanilang bayan.
“I was personally struck by the resilience of these people and the complex dynamics that they have to navigate every day between their livelihood, national security, and their own survival,” ani Villarama sa interview ng Asia Media Centre.
“So I felt this story needed to be told because it shines a light on the human aspect of what's often discussed in terms of national interests and geopolitical struggles, but at the heart of it, it's a human story.”
Sa recent report ng 1News, isang news outlet sa New Zealand, ibinunyag nitong tinangka ng Chinese Consulate na harangin ang paglabas ng pelikula sa New Zealand, tulad ng ginawa nila sa Pilipinas.
Ayon sa 1News, hiniling ng Chinese Consulate sa Doc Edge organizers na itigil ang mga susunod pang planong pagpapalabas sa Food Delivery…
Sinabi rin ng film-fest organizers na nakatanggap sila ng sunud-sunod na tawag mula sa Chinese Consulate para pigilan ang pag-screen ng Filipino docu-film.
Bahagi ng email mensahe ng Chinese Consulate, base sa ulat ng 1News: "The documentary... is rife with disinformation and false propaganda, serving as a political tool for Philippines to pursue illegitimate claims in the South China Sea. Its screening would severely mislead the public and send the wrong message internationally."
Sa kabila nito, tumanggi si Doc Edge General Manager Rachael Penman na sumunod sa gusto ng Chinese Consulate.
Sabi ni Penman, "We are a voice for independent filmmaker. We programmed a film that we felt was really important to be seen and brings up a conversation with so many people.
“I hope that everyone does go and see this now, and has their own opportunity to make their own decisions about this film."