GORGY RULA: Nakausap ng PEP Troika ang ilang celebrities na dumalo sa private dinner ni President Rodrigo Duterte, kasama ang partner nitong si Honeylet Avanceña, na ginanap sa Malacañang, Martes ng gabi, May 7.
Ayaw lang nilang magbanggit ng pangalan, pero nagtataka sila kung bakit may ilang naimbitahan doon sa dinner na alam nilang wala namang naitulong sa Pangulo.
Ilan lang daw sila roon na talagang todo ang suporta mula pa sa kampanya nito noong 2016 Presidential elections.
Mayroon pa raw roon na imbitado sa dinner na panay naman ang tira kay Pangulong Duterte.
Pero ang isa sa kapansin-pansin doon ay si John Lloyd Cruz.
Ibang-iba na raw ang kilos ng aktor kung ikukumpara noong aktibo pa ito sa showbiz.
Martin Andanar with John Lloyd Cruz
Ayon sa kuwento ng ilang celebs, hindi raw tinanggal ni Lloydie ang suot na dark shades kahit kaharap si Presidente Duterte.
Ang isa pa raw weird sa aktor, may cord na gawa sa lubid na nakakabit sa suot nitong salamin.
Yung simpleng lubid lang daw ang itinali sa salamin niyang mukha namang mamahalin.
Sa isang punto ay tinanggal daw ni John Lloyd ang kanyang salamin, at kitang-kita raw na maitim ang paligid ng mata nito.
Iba na rin daw itong magsalita, na hindi raw naman ganun dati.
Kaya kung ganoon ang ayos at attitude ni Lloydie, parang malabo pa raw makabalik ito sa pag-aartista, kung may balak pa siya.
JERRY OLEA: Mabituin ang naturang hapunan sa Malacañang, kung saan dumalo sina Richard Gomez, Robin Padilla, Cesar Montano, at Vhong Navarro.
Present din sina Toni & Alex Gonzaga, Ice Seguerra & Liza Diño, Phillip Salvador, Aiko Melendez, Vivian Velez, Arnelli Ignacio, Dulce, Bayani Agbayani, Jed Madela, Gladys Guevarra, Rodjun Cruz, Ryan Bang, Jimmy Bondoc, Luke Mejares, Chad Borja, Ynez Veneracion, Ai-Ai delas Alas, Ruffa Gutierrez & Annabelle Rama, at Dianne Medina.
Karamihan sa kanila ay todo-suporta kay PRRD noon pa man.
Alam nila kung sinu-sino ang balimbing sa kanilang grupo.
NOEL FERRER: No comment ako rito.