JERRY OLEA: Bidang-bida si Ruru Madrid at ang asong si Serena sa bagong Kapuso primetime series na magsisimula sa Lunes, Enero 29.
Title role si Ruru sa detective series na Sherlock Jr., at sidekick niya rito si Serena na nagpasiklab ng ilang tricks sa presscon kagabi, January 22, sa Cities Events Place, Sgt. Esguerra St, QC.
Leading lady ni Ruru si Gabbi Garcia, at may special participation si Janine Gutierrez.
Waley si Gabbi sa presscon kagabi dahil masama ang pakiramdam.
Si Janine ay tumalilis agad at hindi nagpainterbyu sa mga taga-media.
Kabilang sa mga suporta sa nasabing palabas sina Ai Ai de las Alas (na absent din sa presscon, dahil gaya ni Gabbi ay may sakit daw), Roi Vinzon, Tonton Gutierrez, Sharmaine Arnaiz (nagtapos ng Vet Med), Rochelle Barrameda, Matt Evans, Kate Valdez, Alyana Asistio, Sofia Pablo, at Andre Paras (na nag-host ng presscon).
Tamang-tama sa Year of the Earth Dog (na mag-uumpisa sa Pebrero 16) itong bagong Kapuso series!
NOEL FERRER: Good luck sa Sherlock Jr. na project for the Year of the Dog.
I remember, dapat may aso-serye din noon si Juday kasama sina Richard Yap at Diether Ocampo na Someone To Watch Over Me, pero hindi natuloy dahil nabuntis siya kay Luna.
Sana maging matagumpay itong project na ito na big boost sa career ni Ruru Madrid.
Sayang naman talaga at wala ang leading lady na si Gabbi Garcia sa presscon, pati rin kay Ai-Ai delas Alas na no show din.
Nagkasama na ang tatlo (Ruru-Gabbi-Ai-Ai) sa teleseryeng Let The Love Begin noong 2015 at magkakasama rin sila sa Sunday PinaSaya.
Sana hindi sila pagsawaan ng mga tao ngayong halos araw araw na silang mapapanood sa telebisyon.
Parang wala namang kaso dahil iba-iba naman ang pinaggagagawa nila sa kanilang mga proyekto.
GORGY RULA: Doon na rin sa presscon ng Sherlock Jr. sinagot ni Ruru ang kuwentong crush na crush daw siya ni Ryzza Mae Dizon.
Natatawa na lang si Ruru dahil close naman daw talaga sila ni Ryzza.
Meron pa nga raw silang group chat ni Gabbi Garcia dahil magkaka-text naman daw sila madalas.
Tinutukso silang dalawa kapag nasa Eat Bulaga! si Ruru, at parang kinikilig naman daw si Ryzza.
Sabi naman ng bida ng Sherlock Jr., “Si Ryzza po, baby ko yun talaga. Alagang-alaga sa akin.
"Pag nakikita ko, parang kapatid ko na 'yan na kakaargahin ko, ki-kiss ko.
“Nagkaka-text kami lagi nun, eh.
Inaasar ko rin kasi lagi siya, eh, pero hindi niya pinapakita.”
Sa ngayon ay focus daw muna si Ruru sa Sherlock Jr. kaya wala siyang balak na makipag-girlfriend sa ngayon.
Natutuwa rin siya dahil na-maintain nila ni Gabbi ang magandang friendship, at hanggang dun na lang daw muna.