Sinabi ni Philippine Sports Commission (PSC) Chairman Butch Ramirez na hindi nagkulang ang gobyerno ng suporta kay Hidilyn Diaz, ang weightlifter na silver medalist sa Rio Olympics noong 2016.
Ayon kay Ramirez, isa si Hidilyn sa mga tumatanggap ng pinakamataas na allowances sa national pool.
Hindi pa nangangalahati ang taon pero apat at kalahating milyong piso (P4.5 million) na raw ang naibigay ng PSC kay Diaz para sa training nito sa China.
Ang naturang agency rin daw ang nagbabayad sa monthly salary at food allowance ni Julius Kaiwan Gao, ang coach ng female weightlifter.
Umaani ng mga batikos ngayon si Hidilyn dahil sa kanyang now-deleted message sa kanyang Instagrm feed:
"Is it okay to ask sponsorship sa mga private companies towards Tokyo 2020?
"Hirap na hirap na ako. I need financial support.
"Sa tingin niyo, okay lang kaya? Nahihiya kasi ako, pero try ko kapalan mukha ko para sa minimithi kong pangarap para sa ating bansa, na maiuwi ang gold medal sa Olympics."
Ito ang na-screenshot na binurang mensahe ni Hidilyn:
Idinagdag pa ni Ramirez na bukod sa tulong ng PSC, tumatanggap din umano ng suporta mula sa Philippine Air Force si Hidilyn dahil enlisted personnel ito.
Sa pagkakaalam ni Ramirez, nagbibigay rin ng tulong kay Hidilyn ang private companies tulad ng MVP Foundation ni PLDT Chair Manny V. Pangilinan.
Iniimbitahan ni Ramirez si Hidilyn na bumisita sa kanyang opisina para mapag-usapan nila ang problema.
Nang mapanalunan ni Hidilyn ang gold medal sa 2018 Asian Games weightlifting competition sa Jakarta noong August 2018, P6 million cash incentives ang knyang natanggap.
Tig-dalawang milyong piso naman ang ibinigay kay Hidilyn ng Philippine Olympic Committee at ng Philippine Sports Commission, at P1 million each ang kanyang natanggap mula kay Philippine ambassador to Indonesia Lee Hiong Wee at Siklab Pilipinas Sports Foundation.
Limang milyong piso naman ang ipinagkaloob ng PSC kay Hidilyn nang manalo siya ng silver medal sa Rio Olympics noong 2016.