Tumataginting na PHP55 million ang halaga ng emerald necklace at earrings ng isang aktres pero hindi nito ipinagyayabang ang isa sa mga prized-possession niya.
Nagkataon lang na nakita namin nang personal ang alahas at may nakapagsabi sa amin ng presyo nito.
Hindi nakapagtataka na nakapagpundar ang aktres ng mga alahas at ari-arian dahil likas na masipag at maabilidad siya sa negosyo.
Ginamit ng aktres ang utak noong active pa siya sa showbiz. Alam niyang hindi stable na propesyon ang pag-aartista kaya kahit pagod at puyat sa kanyang mga commitment, tinapos ng aktres ang pag-aaral.
Hindi itinatanggi ng aktres na nakaranas ito noon ng diskriminasyon sa showbiz, pero imbes na panghinaan ng loob, nagsikap siya, nagtayo ng mga negosyo at nagtagumpay.
Kumportableng-kumportable na ngayon ang pamumuhay ng aktres dahil inaani na niya ang mga bunga ng kanyang pagtitiyaga at pagsisikap.
Hindi na tumatanggap ng mga movie assignment ang aktres pero meron itong regular program sa telebisyon, at patuloy ang pagtulong niya sa mga nangangailangan kaya good karma siya.
Ang alahas na nagkakahalaga ng P55 million ang isa lamang sa maraming alahas at ari-arian na naipundar ng aktres na deserving sa mga tagumpay na tinatamasa ngayon dahil pinaghirapan niya.
Higit sa lahat, hindi siya nakakalimot na magpasalamat sa Diyos at ibinabalik niya ang mga biyaya na natatanggap sa pamamagitan ng pagtulong sa ating mga kapus-palad na kababayan.